Mateo 28 - Libuka Lya Kuyela

Kushanguka kwa Yeshu

¹ Munyima ya Mutena Wakukatala, ku lumenemene kwa mutena wa Shunda, Maliya waku Mangandalena na Maliya wamina bayile mu ku mona ku shinzimbi.

² Kwekalile kukanka kwakunene kwa hanci, ndaba lingeloyi lya Mwene lyafumine kuyilu, lyezile mukwandumuna limanya lya ku shinzimbi, pe lyekalileho.

³ Shifwekesha shendi shafwekele ngo lumuni, shivwalo shendi shengile sha kutuba ngo wutonge.

⁴ Ndaba ya kutina shikuma bakakulama shinzimbi bakankile, pe bafutukile ngo bafu.

⁵ Lingeloyi lyambile ku bambuyama ngayi, “Hinga mutina, nikulimuka ngayi muli na kushinga Yeshu, ou wakolekiwile.

⁶ Wufwamo muno unashanguku ngonehe ambile. Yekenu kuno mumone omu alanganine.

⁷ Haya nyankupenu mukatongweze bandongesha bendi ngayi, ‘Unashanguku ku bafu nalimeneke kuya ku Ngalileya, kuyo niko mukamuwana.’ Anukenu ebye namitongweze.”

⁸ Niho bambuyama bafumine na wangu ku shinzimbi, batinine, ngoboni bawahililile shikuma, niho betukile kuya na kutongweza bandongesha bendi.

⁹ Wanguwangu Yeshu walihanganine nabo, pe wambile ngayi, “Ku mwena kwikale nenu.” Bezile kukwendi, bamukwatile ku mawulu, bamulemeshele.

¹⁰ Niho Yeshu ambile kukwabo ngayi, “Hinga mutina, yenunga mukatongweze bawushinda wami ngayi baye ku Ngalileya, kuyo niko eze bakamonene.”

Lushango lwa bakakulama

¹¹ Oho bambuyama bayilenga, bakanzita bamo baya balaminenga ku shizimbi bayile ku munzi na kutongweza bakankombela ba bakulwane nimwabyo biya byatendiwile.

¹² Bakankombela ba bakulwane bakungulukile hamo na kulyambashana na bakulwane ba Bayunda. Bapanikile mali amengi ku bakanzita,

¹³ pe babatongwezele ngayi, “Enu mwambe ngayi, bandongesha bendi beza wushiku na kumuyiba etu oho hinga twalangana mu tulo.

¹⁴ Ndi Kalela ukayuvwa eshe shambo, tukamutongweza shiwahe, mwanga enu hinga mwikala mu wukalu.”

¹⁵ Pe bakanzita bashimbile aya mali, batendele nehe babatongwezele. Olu lushango lwatumbalalile mukati ka Bayunda kukuma na ku mutena walelo.

Yeshu ukulimonekesha ku bandongesha bendi

¹⁶ Niho bandongesha likumi na umo bayile ku Ngalileya ku lipili liyo Yeshu abatongwezele.

¹⁷ Oho bamumonene, bamulemeshele, ngoboni bamo bekalile na nkani.

¹⁸ Niho Yeshu ezile hahepi nabo wambile ngayi, “Ngovu nimwazo za muyilu na hanci zinapanikiwi kukwami.

¹⁹ Nohobene yenunga ku bantu nimwabo mukabenge bandongesha bami. Muka bazubilishe mu lizina lya Tate na lya Mwana na lya Moyo wa Kuyela.

²⁰ Pe mubalongeshe kwombatala nimwabyo ebye ninamilaya. Nikekala nenu shikati nimwasho, kutwala ku kukotoka kwa kaye.”