Mateo 24 - Libuka Lya Kuyela

Yeshu ukwamba bya ku shiwuka kwa Litala lya Nyambi

¹ Yeshu wafumine mu Litala lya Nyambi, pe oho ayilenga bandongesha bendi bezile mu kumumonesha mitumbwe ya matala eshe yazikiwile kuyo.

² Yeshu wambile kukwabo ngayi, “Mu ku mona byuma ebye nimwabyo ndi? Mwa shikuma nikumitongweza ngayi, kowa limanya limo lilihayilu ya limanya lyamina, likabula kwandumukila hanci.”

Makando na malwa

³ Oho Yeshu ekalile ha lipili lya mitondo ya Olive, bandongesha bendi bezile kukwendi kwaninkayabo, pe bambile ngayi, “Tutongweze shikati oho ebye bikatendiwe, kami shilimukisho shiti shakwiza kwobe na sha kukotoka kwa kaye?”

⁴ Yeshu wakumbwile kukwabo ngayi, “Keyenu, kutina muntu wamina amyongeze.

⁵ Ndaba babengi bakeza mu lizina lyami, bakamba ngayi, ‘Ami Kilishitu,’ pe bakongeza bantu babengi.

⁶ Oho mukayuvwa bya zinzita na mpupo ya zinzita, hinga mukalikekula. Ndaba ebye binafwanini ku moneka ngoboni mamaninino shilolo akume.

⁷ Ndaba litunga likafutukila litunga lyamina, kami wene ukafutukila wene wamina. Kukekala kapande na kukanka kwa litunga ku zimbalila zazingi.

⁸ Byuma ebye nimwabyo bikenga ngonehe kutatika kwa makando a mbuyama ha kuhema mwana.

⁹ “Bakamimanga na kumiyaka mu maboko a bayo bakamiyandisha, pe mukazihiwa. Matunga nimwawo akamizimba ndaba ya lizina lyami.

¹⁰ Ha shikati shiyo babengi bakashiya kukulupila kwabo, bakalibeba umo na wamina, bakalizimba umo na wamina.

¹¹ Bamiluwe ba mahalo babengi bakeza, pe bakongeza bantu babengi.

¹² Ndaba wubi wukahanya, pe shishemo sha babengi shikapola.

¹³ Ngoboni ou ukazumanana kukuma na ku mamaninino, niye ukapulwishiwa.

¹⁴ Eze ncango zaziwahe za Wene zikashimikiwa mu kaye nimwamo kwinga wupaki ku bantu nimwabo, nihoboni mamaninino akeze.

Makalikiza amanene

¹⁵ “Mukamona ‘Wunyengwe Wakunonga’ ou atoyele muluwe wa Nyambi Ndanyele, hinga wemana mu mwanya wa kuyela. (Niye ukulaba ayuvwishishe.)

¹⁶ Pe obo bali mu Yundeya bakatinina ku mapili.

¹⁷ Ou uli hayilu ya litala lyendi hinga ahuluka na kwingina mu litala ngayi ashimbemo shuma shamina.

¹⁸ Kami ou uli mu mfuba hinga aboka ngayi akashimbe shivwalo shendi.

¹⁹ Makando wabo baya bakemita na baya ba kuyamwisha ha matena ayo.

²⁰ Lombelenu kuli Nyambi ngayi kutina kwenu hinga kukekalako ha shikati sha mupepo, hinga ha Mutena Wakukatala.

²¹ Ndaba ha shikati shiyo kukekala makalikiza amanene, akupitakana makalikiza nimwawo ekalileko ku balika ku kutatika kwa kaye kuleta na ku shikati shino, kami kukekalako kumbili afwako.

²² Shinga ayo matena akabula ku shepeshiwa, shinga kowa muntu ukapuluka. Ngoboni ndaba ya baya banahatiwi, ayo matena akashepeshiwa.

²³ “Ha shikati shiyo ndi muntu ukamba kukwenu ngayi, ‘Monenu, Kilishitu uli kuno!’ Hinge ngayi, ‘Kilishitu uli Kuyo!’ Hinga mumukulupila.

²⁴ Ndaba Bakilishitu ba mahalo na bamiluwe ba mahalo bakeza na ku monesha bimonekesho byabinene na bikomokesho ngayi bakashanwishe hinge ba kuhatiwa ndi shinga shikatwesheka.

²⁵ Yuvwenu namitongweze oho shikati shilolo shikume.

²⁶ “Nohobene ndi bantu bakamitongweza ngayi, ‘Monenu, uli mu libelelengwa!’ Hinga mukayako. Hinge ngayi, ‘Monenu, unaliholeke kuyo!’ Hinga mu kulupila.

²⁷ Ndaba kwiza kwa Mwana Muntu kukenga ngonehe lumuni lwa mvula lwamweshanga ku balika ku mushamuko, kukakuma na ku mponci.

²⁸ “Oku nimwako kuli mutuntu, niko akungulukilanga makubi.

Kwiza kwa Mwana Muntu

²⁹ “Wanguwangu munyima ya makalikiza a matena ayo, mutena ukashipa, kami ngonda kukatuba wezi wendi wufwako, nyenye zikawa muyilu, pe ngovu za mayilu zikanyenkanishiwa.

³⁰ Niho shilimukisho sha Mwana Muntu shikamoneka muyilu. Bantu nimwabo ba hano hanci bakalila, oho bakamona Mwana Muntu heza na makumbi na ngovu na wuwahe shikuma.

³¹ Niho ukatuma mangeloyi bendi na kutendoka kwakunene kwa mpandula, pe bakakungulula bakakuhatiwa bendi ku zimbalila zinaa za hanci, kutatika ku mamaninino amo a liyilu kutwala ku mamaninino amina.

Shilongesha sha ha mutondo wa mukuyu

³² “Lilongeshenu bya nguli ya ha mutondo wa mukuyu. Oho myahi yawo yikutundula na kuzobela mabizi, mu kulimuka ngayi mayinza ali hahepi.

³³ Nohobene nanenu oho mukamona ebye nimwabyo, limukenu ngayi shikati shili kwakwipi, wuluno shinakumu.

³⁴ Mwa shikuma nikwamba kukwenu ngayi, mukoka owe kukamana wufwako, hantu ebye nimwabyo binatendiwi.

³⁵ Liyilu na hanci bikamana, ngoboni mazu wami kukamana afwako.

Kowa muntu ukulimuka mutena na shikati

³⁶ “Ngoboni bya mutena uyo na shikati shiyo kowa muntu ukubilimuka, hinge mangeloyi a muyilu, hinge Mwana wufwako, ndele tuhu Tate ukulimuka.

³⁷ Ngoboni nehe kwekalile ha matena a Nowa, nisho kami enze shikekale hakwiza kwa Mwana Muntu.

³⁸ Ngonehe kwekalile ha matena ayo libazi oho shilolo lize, bantu balilenga na kunwa na kuyeka na kuyekishiwa, hantu mutena uyo enginine Nowa mu wato.

³⁹ Bantu kaliha balimukile shamina, hantu libazi lya kumine, pe lya ba kupwile nimwabo. Kukenga nahiyo kami hakwiza kwa Mwana Muntu.

⁴⁰ Ha shikati shiyo balume babili bakekala mu mfuba, umo ukashimbiwa wamina ukashala.

⁴¹ Bambuyama babili bakekala na kutwa mu nkunzu, umo ukashimbiwa wamina ukashala.

⁴² “Nohobene keyenu, ndaba kulimuka mutena ou akeza Mwene wenu mufwako.

⁴³ Ngoboni limukenu eshe, shinga mwine litala walimukile shikati sha wushiku osho mwizi akeza, shinga watonene, ngayi litala lyendi hinga litibiwa.

⁴⁴ Nohobene nenu Libalakanyenu, ndaba Mwana Muntu ukeza ha shikati shiya mu kubula kulimuka.

Mukamulimo wakulunga hinge wakubula kulunga

⁴⁵ “Kati yani mukamulimo wakukulupiliwa wangana? Nengi uya anayaka hekulyendi ha mulimo wakulama baka litala lyendi, ngayi abapanenga byakulya ha shikati shinafwanini.

⁴⁶ Shikenga shashiwahe kuli uya mukamulimo, ndi hekulyendi ukamuwana hatenda milimo.

⁴⁷ Mwa shikuma nikumitongweza ngayi, uya mukamulimo, hekulyendi ukamwinga mukakulama wuheti wendi nimwawo.

⁴⁸ Ngoboni ndi uya mukamulimo wamubi hakwamba mu mutima wendi ngayi, ‘Hekulyami unehala kwiza,’

⁴⁹ pe ha kutatika kukama baminendi bakamilimo na kulya na kunwa hamo na bakakukolwa.

⁵⁰ Hekulyendi ukeza ha mutena uyo mukamulimo akabula kumutatilila naha shikati osho a kubula kulimuka.

⁵¹ Ukamuyuvwisha kukola shikuma na kumuyumbila ku mbalila hamo na bakashishweka, kuya akalila na kulikekenya ku mayewe.