Mateo 20 - Libuka Lya Kuyela

Nguli ya bakamilimo ba mu mfuba ya shinyanca

¹ “Ndaba Wene wa muyilu ukufweka ngo mwine litala, watutikile lumenemene kuya na kushinga bakamilimo ba mu mfuba yendi ya mikabo ya shinyanca.

² Waliyuvwashanine nabo ngayi abapane shiliva yimo ha mutena, oho abatumine mu mfuba yendi ya mikabo.

³ Oho shikati shashingile kukuma sha mutanu na binaa watutikile ku mwanya wakulandishila, wamonene bamina hinga bemana ha munkanda kwakubula kutenda shamina.

⁴ Wabatongwezele ngayi, ‘Yenunga nenu mukatende milimo mu mfuba ya mikabo na nami nikamipana binafwanini.’

⁵ Pe niho bayile. Wayile kami oho shikati shashingile kukuma ku sha walikumi na bibili na shikati sha wulikumi na mutanu.

⁶ Oho shashingile kukuma ku shikati sha wulikumi na mutanu na babili, wayile, pe wawanine bamina hinga bemana, niho ambile kukwabo ngayi, ‘Munemanini bihi kuno mutena nimwawo kwakubula kutenda shamina?’

⁷ Bakumbwile kukwendi ngayi, ‘Ndaba kowa muntu unatwihana.’ Wambile kukwabo ngayi, ‘Yenunga nenu mukatende milimo mu mfuba ya mikabo.’

⁸ “Ku shikati sha mazolo, mwine mfuba wambile kuli mukakutwaminina bakamilimo ngayi, ‘Yihana bakamilimo, pe ubapane mali abo, utatike na bamamaninino, kutwala ku ba mabalikilo.’

⁹ Oho bezile, baya benginine ha milimo ku shikati sha wulikumi na mutanu na wubili, muntu na muntu watambwile shiliva yimo.

¹⁰ Pe oho bakakutatika bezile, bahanganikile ngayi bakatambula kupitakana baminabo, ngoboni nanibo batambwile shiliva yimo muntu na muntu.

¹¹ Oho batambwile, bekalile na ntongawushi kuli mwine mfuba,

¹² pe bambile ngayi, ‘Aba balume bamamaninino banatende milimo mu shikati shimo, ngoboni unabezekele hamo nanetu, etu, tunatende milimo nimwayo kami tunayuwu ntukumina ya mutena.’

¹³ “Ngoboni wakumbwile kuwamina ngayi, ‘Muhoni, kukutenda shibi nifwako, kati kaliha twaliyuvwashanine ngayi mwanga nikupanike shiliva yimo ndi?

¹⁴ Shimba shobe uye. Shinengi shifungo shami ngayi nipane bamamaninino ngonehe ninakupana.

¹⁵ Kati kaliha niku fwanina kutenda byami ngonehe nikushinga ndi? Kati uli na mwili ndaba ya shishemo shami ndi?’

¹⁶ Nohobene bamamaninino bakenga ba kulimeneka, kami ba kulimeneka bakenga bamamaninino.”

Yeshu ukwamba kawuhatu ha bya lufu lwendi

¹⁷ Oho Yeshu ayilenga ku Yelushalema, watwalile bandongesha bendi balikumi na babili ku mbali.

¹⁸ Pe wabatongwezele ngayi, “Monenu, tuli na kuya ku Yelushalema, oko Mwana Muntu akapanikiwa ku bakankombela ba bakulwane na bakakulongesha ndayano. Kami bakamuyata afwe.

¹⁹ Bakamupana ku Bakamatunga obo bakamukumangiza na kumuzipola na kumukoleka, ngoboni ha mutena wa wuhatu ukashangukila ku wumi.”

Kunyepa kwa mukaza Zebende

²⁰ Niho mukaza Zebende ezile kuli Yeshu hamo na bana bendi babalume babili, wafunkamine kukwendi, pe niho amunyepele shuma shamina.

²¹ Niye wambile kukwendi ngayi, “Ukushinga bishini?” Wambile ngayi, “Yitabila ngayi aba bana bami babalume mwanga bakekale, umo ku liboko lyobe lya shilyo, wamina ku liboko lyobe lya shimoho mu Wene wobe.”

²² Ngoboni Yeshu wakumbwile ngayi, “Kulimuka eshe ukulomba wufwako. Kati mu kutwesha kunwina mu shinwino sha makando eshe nikanwina ndi?” Bambile ngayi, “Tukutwesha.”

²³ Yeshu wambile kukwabo ngayi, “Mwa shikuma mukanwina mu shinwino shami, ngoboni kwikala ku liboko lyami lya shilyo, hinge ku liboko lyami lya shimoho, kaliha ami nikafungulasho, myanya eye yikapanikiwa kukwabo baya Tate awahishilileyo.”

²⁴ Oho baya bandongesha likumi bayuvwile ebye, bapilaminine muntu na mukonzo wendi.

²⁵ Ngoboni Yeshu wabehanine nimwabo, wambile ngayi, “Mukulimuka ngayi, bamyene ba bakamatunga bali na nyala ha bantu, kami babilolo babo bali na ngovu za ndayano ha bantu.

²⁶ Ngoboni hinga kwinga noho kukwenu. Haya nimwendi ukushinga kwinga wamunene kukwenu, enge mukamulimo wenu.

²⁷ Kami nimwendi ukushinga kwinga ntwamina, enge ndungo yenu.

²⁸ Ndaba hinge Mwana Muntu, kaliha wezile ngayi bamutendele milimo, ngoboni wezile mukutenda milimo, kami mwanga apane wumi wendi mu kukuliza bantu babengi.”

Yeshu ukunyongomanisha tushishitwa babili

²⁹ Oho Yeshu na bandongesha bendi bafumine ku Yeliko, likunge lyalinene lya bantu bamukonkele.

³⁰ Tushishitwa babili bekalile kunkumo ya mukwakwa oho bayuvwile ngayi Yeshu uli na kupita, babilikizile ngayi, “Obe Hekulu, Mwana Ndavita, tuyuvwileko nceshe!”

³¹ Likunge lya bantu babakalihilile ngayi bamwene, ngoboni babilikizile shikuma ngayi, “Mwene, tuyuvwileko nceshe, obe Mwana Ndavita!”

³² Niho Yeshu emanine wabehanine. Wabepwile ngayi, “Mukushinga nimitendele bishini?”

³³ Bakumbwile ngayi, “Mwene, tukushinga ngayi utoneshe meho wetu.”

³⁴ Yeshu wabayuvwilile nceshe, pe wakwatile ha meho wabo, wanguwangu meho wabo amonene, pe bamukonkele.