Mateo 18 - Libuka Lya Kuyela

Yani wamunene shikuma

¹ Shikati shiyo bene bandongesha bezile kuli Yeshu, bepwile ngayi, “Kati yani wamunene shikuma mu Wene wa muyilu?”

² Yeshu wehanine kanuke wamwimikile hakati kabo,

³ pe wambile ngayi, “Mwa shikuma nikumitongweza ngayi ndi mu kubula kutenguluka na kwinga ngo batwanuke babashe kukengina mu Wene wa muyilu mufwako.

⁴ Nohobene, nimwendi wakulilimbwilisha nehi kanuke ou, niye ukenga wamunene mu Wene wa muyilu.

⁵ Pe nimwendi ukatambula kanuke wamushe wanehe mu lizina lyami unantambulu.

Byezeko bya kutwala ha wubi

⁶ “Muntu nimwendi ukupukalisha umo wababashe aba banakulupili mumwami ngayi batende wubi, shikenga shashiwahe kukwendi ngayi bamumangilile limanya mu ncingo na kumuyumbila mu limpunga lya liwate.

⁷ Makando ku kaye ndaba ya byuma bikupukalisha bantu ngayi batende wubi! Ndaba byuma ebye binafwanini kwiza, ngoboni makando wendi muntu ukuletesha byezeko.”

⁸ Kami liboko lyobe hinge liwulu lyobe ndi likukupukalisha ngayi utende wubi, liketule, pe liyumbe. Ndaba shashiwahe kwingina mu wumi hinga wenga shihole kupitakana kwikala na maboko abili na kuyumbiwila mu mundilo wa mwaya myaka.

⁹ Kami ndi liho lyobe likukupukalisha ngayi utende wubi, litompolemo, pe uliyumbe. Ndaba shashiwahe kwingina mu wumi na liho limo tuhu kupitakana kwikala na meho abili na kuyumbiwa mu mundilo wa ngehena.

Nguli ya mbelele wakuyongala

¹⁰ “Keyenu ngayi hinga mukenda umo wa naba babashe. Ndaba nikumitongweza ngayi, mangeloyi wabo muyilu ekalanga shikati nimwasho ku meho a Tate wa muyilu.

¹¹ Ndaba Mwana Muntu wezile na kulamwina banayongala.

¹² “Mukuhanganika nahiti? Muntu ndi uli na bambelele ba mwanda, ndi hanayongala umo kukwabo, kati ukubula ku shiya ba makumi mutanu na anaa na ba mutanu na banaa ku mapili, ha kuya na kushinga uya mbelele umo unayongala ndi?

¹³ Kami ndi unamuwana, mwa shikuma nikumitongweza ngayi, ukawahilila shikuma ndaba ya mbelele umo kupitakana bambelele ba makumi mutanu na anaa na mutanu na banaa banabulu kuyonga.

¹⁴ Nohobene kaliha sha mutima wa Tate wa muyilu ngayi umo ku naba babashe ayongale.

Kawushinda natende wubi

¹⁵ “Kami ndi kawushinda wobe unakubipishili, uye kukwendi kuwi, pe umutongweze wubi wendi mukati kenu muli babili. Ndi ukakuyuvwa, pe walamwini kawushinda wobe.

¹⁶ Ngoboni ndi kukuyuvwa wufwako, pitulako umo hinge bantu babili, ngayi shambo nimwasho shishumishiwe mu tunwa twa bapaki babili hinge bahatu.

¹⁷ Ndi kubayuvwa wufwako, ushimikile litengo, ndi litengo kuliyuvwa wufwako, umwinge ngo mukakubula kukulupila hinge ngo mukakutelesha.

Kumanga na ku mangulula

¹⁸ “Mwa shikuma nikumitongweza ngayi, eshe nimwasho mukamanga hano hanci shikamangiwa muyilu, eshe nimwasho mukamangulula hano hanci shikamangululiwa kami muyilu.

¹⁹ “Kami nikumitongweza ngayi, ndi babili hakati kenu bakuliyuvwashana hano hanci ha shuma nimwasho bakanyepa, Tate uli muyilu ukabatendelasho.

²⁰ Ndaba ngayi oku banakungulukili bantu babili hinge bahatu mu lizina lyami na nami nili mukati kabo.”

Nguli ya mukamulimo wakubula kuyatila

²¹ Niho Pita ezile kuli Yeshu, pe wamwipwile ngayi, “Mwene, kawushinda wami ndi unambipishili, kati nikamuyatila kanga? Kampe ka mutanu na kabili ndi?”

²² Yeshu wakumbwile ngayi, “Kaliha nikwamba ngayi ka mutanu na bibili,” ngoboni bikati makumi mutanu na abili kubihanyisha na bikati mutanu na bibili.

²³ Nohobene, Wene wa muyilu ukufweka ngo mwene washingile ku mona bakamilimo bekalile na mali endi.

²⁴ Oho atatikile kulaba, baletele wamina kukwendi owo wekalile na mukuli wa mali makulukazi likumi.

²⁵ Ngoboni wabulile bya kuhingisha, hekulyendi wambile ngayi alandishiwe hamo na mukokwendi na bana bendi na byuma byendi nimwabyo ngayi mukuli umane.

²⁶ Mukamulimo wafunkamine ku manungo kumbili wamulambililile ngayi, “Mwene, nyimanine, nika kuhingishila nimwawo.”

²⁷ Niho hekulyendi wamuyuvwilile nceshe, wamuyatilile ku mukuli wendi.

²⁸ “Ngoboni mukamulimo ou atutikile, wawanine minendi mukamulimo, uya wekalile na mukuli wendi wawushe wa mali ukukwana mwanda, wamukwatile niho amushikile nkozo, pe wambile ngayi, ‘Hingishile mukuli wami.’

²⁹ Minendi mukamulimo wafunkamine ku manungo, wamulambilile ngayi, ‘Nyimanine, nika kuhingishila.’

³⁰ Ngoboni wakanine, pe wamushimbile niho amuyakile mu tolongo, kutwala ku shikati osho akamuhingishila mukuli.

³¹ Oho baminendi bakamilimo bamonene osho shatendiwile, bayenene shikuma, bayile mu ku shimikila hekulyabo ebye byatendiwile nimwabyo.

³² Nohobene hekulyendi wamwihanine, wambile kukwendi ngayi, ‘Obe mukamulimo wamubi nakuyatilile mukuli wobe nimwawo, ndaba wandombele.

³³ Kati kaliha unafwanini ngayi uyuvwile minobe nceshe ngonehe ami nakuyuvwilile nceshe ndi?’

³⁴ Hekulyendi wakalihile, wamutwalile kubakakulama tolongo ngayi bamushushule kutwala ku shikati osho akamuhingishila mukuli wendi nimwawo.

³⁵ Nohobene na Tate wa muyilu ukatenda kami kukwendi nimwendi ukubula kuyatila kawushinda wendi na mutima wendi nimwawo.”