Mateo 17 - Libuka Lya Kuyela

Yeshu ukufutuka kubyazima

¹ Munyima ya matena mutanu na umo, Yeshu washimbile Pita na Yakoba na Yowano mukonzo wa Yakoba, wabakankalalishile ku lipili lyalitali kwaninkayabo.

² Kuyo akafutukile kubyazima ku meho abo. Lupala lwendi lwabyazimine ngonehe mutena, kami bivwalo byendi byengile bya kutuba too ngo mwaana.

³ Hohobene kukwabo kwaholokele Moshesha na Eliya hibambola na Yeshu.

⁴ Niho Pita ambile kuli Yeshu ngayi, “Mwene, shikwinga shashiwahe kwikala kuno. Ndi ukushinga, nitende makunka ahatu, limo linge lyobe, lyamina lya Moshesha na lyamina lya Eliya.”

⁵ Oho ushili kwamba, likumbi lya kubyazima lya bafwikile kami kwayuvwanikile lizu mu likumbi ngayi, “Ou niye Mwanami nahaka, niye ukungwahililisha, muyuvwililenu!”

⁶ Bandongesha oho bayuvwile lizu, batinine shikuma, pe bawile na kukinka zimpala hanci.

⁷ Yeshu wezile, wabakwatile niho ambile ngayi, “Pindukenu, hinga mutina!”

⁸ Oho bayimbwile meho wabo kaliha bamonene muntu wamina ndele Yeshu tuhu.

⁹ Oho ba kunkulukilenga kufuma ha lipili, Yeshu wabatongwezele ngayi, “Hinga mukashimikila muntu wamina byuma ebye munamono, hantu Mwana Muntu unashanguku ku bafu.”

¹⁰ Pe bandongesha bamwipwile ngayi, “Ndabangani bakakulongesha ndayano bakwamba ngayi Eliya uku fwanina kwiza ha kutatika?”

¹¹ Yeshu wakumbwile ngayi, “Mwa shikuma Eliya ukwizangaho, ngayi abalakanye byuma nimwabyo.

¹² Ngoboni nikumitongweza ngayi Eliya wezile mwaka, kami kaliha bamulimukile, pe bantu batendele kukwendi eshe nimwasho bashingile. Nohobene na Mwana Muntu kami ukayandishiwa ku maboko wabo.”

¹³ Niho bandongesha bayuvwishishile ngayi watoyele Yowano Mukakuzubilisha.

Yeshu ukunyongomanisha ndumbana wekalile na mayimbwe

¹⁴ Oho bezile ku likunge lya bantu, mulume wezile kuli Yeshu wafunkamine, pe wambile ngayi,

¹⁵ “Mwene, yuvwila mwanami nceshe. Ndaba ukukola kamfunya, pe uli na kuyanda shikuma. Kami bikati byabingi wawilanga mu mundilo na mu mema.

¹⁶ Namuleta ku bandongesha bobe, ngoboni banakwanga kumunyongomanisha.”

¹⁷ Yeshu wakumbwile, ngayi, “Enu mukoka wakubula kukulupila na wa mashewinizi! Kati nikekala nenu shikati sha kukuma hati? Kati mukanyuvwishisha shikati sha kukuma hati? Letenu ndumbana kuno kukwami!”

¹⁸ Yeshu wakalihilile mayimbwe, pe afumine mumwendi, niho ndumbana anyongomanine ha shikati shiyo bene.

¹⁹ Niho bandongesha bezile kuli Yeshu kwaninkayabo, bepwile ngayi, “Ndaba ngani etu twabula kutwesha kumufumisha aya mayimbwe?”

²⁰ Yeshu waba kumbwile ngayi, “Ndaba kukulupila kwenu kwakushe.” Mwa shikuma nikwamba kukwenu ngayi, “Shinga muli na kukulupila kwakukuma ha luncaca lwa mashitandi, shinga mukwamba ku lipili elye ngayi, ‘Tuntuka ufume kuno uye kuyo,’ shinga likutuntuka. Kami kowa shika kwangana kukwenu.

²¹ Ngoboni mayimbwe a mushobo ou afwako kufuma nahiya ndele kulombela na kuzila kulya.”

Yeshu ukwamba kami byaha lufu lwendi

²² Oho bandongesha nimwabo bakungulukile hamo mu Ngalileya, Yeshu wambile kukwabo ngayi, “Mwana Muntu ukupanikiwa mu maboko a bantu,

²³ pe bakamuziha, kami ha mutena wawuhatu ukashanguka.” Niho bandongesha bahombele shikuma.

Kupana mutelo wa mu Litala lya Nyambi

²⁴ Oho Yeshu na bandongesha bendi bakumine ku Kapenauma, bakakutelesha bantu mu Litala lya Nyambi bezile kuli Pita na kumwipula ngayi, “Kati mulongeshi wenu kaliha watelanga ndi?”

²⁵ Pita wakumbwile ngayi, “Ingoi, watelanga.” Oho enginine mu litala, Yeshu watatikile kwamba kukwendi ngayi, “Ukuhanganika nahiti Shimoni? Bamyene ba hano hanci ba kutelesha bayani? Bana babo ndi bashenge?”

²⁶ Pita wakumbwile ngayi, “Bashenge.” Yeshu wambile kukwendi ngayi, “Ndi shili noho, pe bana babo banashoboloko.

²⁷ Ngoboni kutina tubapukalisha, yanga ku liziba na ku hanta. Pe nyinci ukahanta wa muntanzi ukamufukulule mu kanwa, ukawanamo mali a muwayawaya, pe ukawashimbe, ukabapane ukenge mutelo wami na nobe.”