Mateo 16 - Libuka Lya Kuyela

Bafwalishi na Bashanduki bakushinga shikomokesho

¹ Bafwalishi na Bashanduki bezile kuli Yeshu na kumwezeka, pe bamunyepele ngayi abamoneshe shikomokesho sha kufuma muyilu.

² Yeshu waba kumbwile ngayi, “Mutena oho ukulela, mu kwamba ngayi, ‘Nzona kukekala linanga ndaba liyilu linafubili.’

³ Pe lumenemene mukwamba ngayi, ‘Lelo mvula ukuloka, ndaba liyilu linafumbuluku na ku shipa.’ Mukulimuka kutontolola eshe liku moneka liyilu, ngoboni kutwesha kutontolola bimonekesho bya bikati mufwako.

⁴ Mukoka ou wawubi na wa wunjenge ukushinga shikomokesho, ngoboni kowa shikomokesho shikatendiwa kukwenu, ndele shikomokesho sha Yona.” Niho Yeshu abashiyile, pe wayile.

Mumena wa Bafwalishi na Bashanduki

⁵ Oho bandongesha ba Yeshu bazabukilile mu nciza ya liziba, bavulamine kushimba mankende.

⁶ Yeshu wambile kukwabo ngayi, “Keyenu, bengukenu ku mumena wa Bafwalishi na Bashanduki.”

⁷ Nohobene balyambashanine umo na wamina ngayi, “Unamba nehe ndaba shilolo tushimbe mankende.”

⁸ Yeshu walimukile ebye balyambashaninenga, pe wabepwile ngayi, “Enu bakakukulupila kwakushe! Bishini mu kulyambashana ngayi mankende mufwawo?

⁹ Kati ku yuvwishisha mufwako ndi? Kati kwanuka eshe napabwile mankende mutanu na kulisha bantu makulukazi mutanu mufwako ndi? Kati mwenzalishile zintumba zinga za ncankuncanku?

¹⁰ Hinge mankende mutanu na abili aya ekutishile makulukazi anaa, kati mwenzalishile bibondo binga bya ncankuncanku?

¹¹ Ndaba ngani mu kubula ku yuvwishisha ngayi kwamba bya mankende nifwako. Ngoboni keyenu ku mumena wa Bafwalishi na Bashanduki?”

¹² Niho bandongesha bayuvwishishile ngayi kaliha wabatongwezelenga bya kukeya ku mumena wa mankende, ngoboni ngayi bakeye kuku longesha kwa Bafwalishi na Bashanduki.

Pita ukutontolola Yeshu

¹³ Oho Yeshu akumine mu litunga lya Sheshaliya Fwilipu, wepwile bandongesha bendi ngayi, “Kati bantu ba kutoya Mwana Muntu ngayi yani?”

¹⁴ Niho bakumbwile ngayi, “Bamo bakwamba ngayi Yowano Mukakuzubilisha, bamina bakwamba ngayi obe Eliya, kami bamina bakwamba ngayi obe Yelemiya, hinge umo wa bamiluwe.”

¹⁵ Yeshu wabepwile ngayi, “Haya enu mukwamba ngayi ami yani?”

¹⁶ Shimoni Pita wakumbwile ngayi, “Obe uli Kilishitu Mwana Nyambi wakuyoya.”

¹⁷ Yeshu wakumbwile ngayi, “Obe Shimoni, mwana Yona uli na mfuywezi, ndaba ebye unatontololo kufuma ku muntu bifwako ngoboni kuli Tate uli muyilu.

¹⁸ Ami nikukutongweza ngayi, obe uli Pita, pe ha limanya elye nikatendaho litengo lyami, kami ngovu za lufu kukatwesha kulipitakana zifwako.

¹⁹ Nikakupanika makiyi a Wene wa muyilu. Eshe nimwasho ukamanga hano hanci shikamangiwa kami muyilu, pe nimwasho eshe ukamangulula hano hanci, shikamangululiwa kami muyilu.”

²⁰ Niho Yeshu acincikile bandongesha bendi ngayi hinga bamutontolola ku muntu ngayi niye Kilishitu.

Yeshu ukwamba bya makando na lufu lwendi

²¹ Kufuma ku shikati shiyo Yeshu watatikile kutongweza bandongesha bendi ngayi, “Nafwanini kuya ku Yelushalema, mwanga nikayandishiwe shikuma ku bakulwane ba Bayunda na bakankombela ba bakulwane na bakakulongesha ndayano. Pe nikazihiwa, ngoboni nikashanguka ha mutena wawuhatu.”

²² Niho Pita amutwalile ku mbali, pe watatikile kumukalihila ngayi, “Nyambi akane ngayi ebye hinga bitendiwa kukwobe, obe Mwene.”

²³ Ngoboni Yeshu wafutukile, pe wambilile Pita ngayi, “Fuma kukwami obe Shatana. Uli shipukalisho kukwami. Ndaba bihanganiko byobe, kaliha nibyo bihanganiko bya Nyambi, ngoboni bya bantu.”

²⁴ Niho Yeshu ambile ku bandongesha bendi ngayi, “Nimwendi ukushinga kunkonka, alihupwize niye mwine, ashimbe shishempakano shendi, pe ankonke.

²⁵ Ndaba nimwendi ukushinga kupulwisha wumi wendi ukawuyongesha, ngoboni niye ukuyongesha wumi wendi ndaba yami ukawuwana.

²⁶ Kati muntu ukuwanaho bihi, ndi ukuheta byuma nimwabyo bya mu kaye, ngoboni ha kuyongesha wumi wendi? Hinge kati muntu ukapana bishini ngayi atambashane na wumi wendi?

²⁷ Ndaba ngayi Mwana Muntu ukeza na mangeloyi mu wuwahe wa Tatiyendi, niho shikati osho ukapana ncuungu ku muntu na muntu ngo ku milimo yendi.

²⁸ Mwa shikuma nikwamba kukwenu ngayi kuli bamo bali hano, baya bakabula kufwa, hantu banamono Mwana Muntu heza mu wene Wendi.”