Mateo 14 - Libuka Lya Kuyela

Lufu lwa Yowano Mukakuzubilisha

¹ Ha shikati shiyo, Helonda ou wengile mwene wa Ngalileya wayuvwile mpupo ya Yeshu.

² Pe wambile ku bakamilimo bendi ngayi, “Ou niye Yowano Mukakuzubilisha unashanguku ku bafu. Nisho shikuletesha ngayi ekale na ngovu za kutenda bikomokesho.”

³ Ndaba Helonda wakwatile Yowano, wamumangile na kumuyaka mu tolongo ndaba ya Helondiyashi mukaza Fwilipu, mukonzo wendi.

⁴ Ndaba Yowano Mukakuzubilisha watongwezele Helonda ngayi, “Kaliha shinafwanini obe kuyeka Helondiyashi.”

⁵ Helonda washingile kumuziha, ngoboni watinine Bayunda, ndaba bambilenga ngayi Yowano nengi muluwe.

⁶ Ha mutena wa kwanuka kuhemuwa kwa Helonda, mwana Helondiyashi washindile kumbili yabo. Helonda wawahililile shikuma.

⁷ Niho alibezele ngayi ukamupanika shuma nimwasho akanyepa.

⁸ Mushimbi walombele ebye amuhongele mandiyendi, pe wambile ngayi, “Mpanike mutwe wa Yowano Mukakuzubilisha ha lulonga.”

⁹ Mwene wayenene, ngoboni ndaba ya mbeza zendi, kami wekalile na baya ehanine ku kulya, wambile ngayi mushimbi apanikiwe eshe akushinga.

¹⁰ Watumine lizu mu tolongo ngayi mutwe wa Yowano wuketuliwe.

¹¹ Mutwe wa Yowano bawuletele ha lulonga, niho bawupanikile mushimbi, pe wawutwalile kuli mandiyendi.

¹² Bandongesha ba Yowano bayile na kushimba mutuntu wendi, bawufundile, niho bayile na kutongweza Yeshu.

Yeshu ukulisha makulukazi mutanu a bantu

¹³ Oho Yeshu ayuvwile ebye byatendiwile, wafuwile wato wayile kwa ninkayendi. Oho makunge a bantu ayuvwile eshe, afumine mu minzi yabo bamukonkele na mawulu.

¹⁴ Oho Yeshu afumine mu wato, wamonene likunge lyalinene lya bantu. Niho abayuvwilile nceshe, pe wanyongomanishile baya bakolelenga.

¹⁵ Oho kwengile mazolo bandongesha ba Yeshu bezile kukwendi, bambile ngayi, “Muno tuli mu libelelengwa, kami mutena walelakale, tongweza makunge aye ku minzi bakalilandile byakulya.”

¹⁶ Yeshu waba kumbwile ngayi, “Kufwanina kuya bafwako. Bapanikenu byakulya.”

¹⁷ Bakumbwile kukwendi ngayi, “Tuli tuhu na mankende mutanu na zinci zibili.”

¹⁸ Yeshu wambile ngayi, “Biletenu kuno kukwami.”

¹⁹ Watongwezele bantu ngayi bekale ha mwila. Niho ashimbile mankende mutanu na zinci zibili, wapenzele kuyilu, pe wakambililile kuli Nyambi, wapabwile, pe wapanikile bandongesha bendi ngayi batapishile bantu.

²⁰ Nimwabo balile kami bekutile. Pe bandongesha benzalishile zintumba likumi na zibili.

²¹ Baya balile bengile balume bashingile kwinga makulukazi makumi mutanu, kubula kulabako bambuyama na batwanuke.

Yeshu ukwenda ha mema

²² Hohobene Yeshu watongwezele bandongesha bendi ngayi bengine mu wato bayengaho mu nciza ya liziba, oho niye ushili kupanzanisha likunge lya bantu.

²³ Munyima ya kupanzanisha likunge lya bantu, wayile ha lipili mu kulombela. Oho kwengile mazolo wekalile ninkayendi.

²⁴ Ngoboni wato wekalile ha liziba kwakutali na lukandwa, watengatengele na mankanyi, ndaba bayilenga kwafuminenga nkuli.

²⁵ Ha shikati sha malungashiku, Yeshu wezile kukwabo, henda hayilu ya mema.

²⁶ Oho bandongesha bamumonene henda hayilu ya mema, batinine, bekalile na bowa, pe bakalokele ngayi, “Kanengi kayebela!”

²⁷ Wanguwangu Yeshu wambile kukwabo ngayi, “Tulenu mitima! Ami. Hinga mutina!”

²⁸ Pita wakumbwile kukwendi ngayi, “Mwene, ndi obe, nyintabilishe ngayi nize kukwobe hinenda hayilu ya mema.”

²⁹ Yeshu wambile ngayi, “Yeka,” niho Pita afumine mu wato, wendele hayilu ya mema kuya kuli Yeshu.

³⁰ Ngoboni oho amonene nkuli watinine. Pe watatikile ku ndokama, niho abilikizile ngayi, “Mwene, ndamwine.”

³¹ Yeshu wanyankupile, wolwele liboko lyendi wamukwatile, wambile kukwendi ngayi, “Unengi muntu wakukulupila kwakushe! Bishini wekala na nkani?”

³² Oho benginine mu wato, nkuli yemanine.

³³ Niho baya bekalile mu wato bamulemeshele, pe bambile ngayi, “Mwa shikuma uli Mwana Nyambi.”

Yeshu ukunyongomanisha bakakukola ku Ngeneshaleta

³⁴ Oho Yeshu na bandongesha bendi bazabukile liziba, bakumine ku litunga lya Ngeneshaleta.

³⁵ Pe oho bantu ba ku mbalila iyo balimukile Yeshu, batumine lizu mu litunga nimwalyo. Pe bantu baletele kukwendi bakakukola nimwabo.

³⁶ Bamulombele ngayi etabilishe bakakukola, kukwata tuhu ku mungundo wa shivwalo shendi. Pe nimwabo bakwatileko banyongomanine.