Mateo 12 - Libuka Lya Kuyela

Liyipu lya ha Mutena Wakukatala

¹ Ku shikati shiyo Yeshu wapitile mu mafuba a loto ha Mutena Wakukatala. Bandongesha bendi bekalile na nzala, pe batatikile kupulula loto na kulya.

² Oho Bafwalishi bamonene eshe, bambile kuli Yeshu ngayi, “Mona, bandongesha bobe ba kutenda sha kubula ku fwanina ha Mutena Wakukatala.”

³ Yeshu wambile kukwabo ngayi, “Hinga mwatanga shilolo mulabe eshe atendele Ndavita, shikati shiya oho ekalile na nzala, hamo na bantu bendi.

⁴ Ndavita wenginine mu Litala lya Nyambi, niye na bantu bendi balile mankende aya atupuliwile kuli Nyambi ayo abulile ku fwanina kulya ndele bakankombela tuhu nibo bafwanini ku walya.

⁵ Hinge kati shilolo mulabe mu Ndayano za Moshesha eshe bakankombela bazilululanga Mutena Wakukatala mu Litala lya Nyambi ngoboni bawanangaha mulandu?

⁶ Nikumitongweza ngayi umo wakupitakana Litala lya Nyambi uli kuno.

⁷ Shinga mu kulimuka kutontoloka kwa mazu awa akwamba ngayi, ‘Nashinga nceshe, kaliha nkombela.’ Shinga mufwako kuyata bakubula mulandu.

⁸ Ndaba Mwana Muntu wenga Mwene wa Mutena Wakukatala.”

Mulume wakunyata liboko

⁹ Yeshu wafumine ku mwanya uyo, niho ayile na kwingina mu shinangonge.

¹⁰ Muyo mu shinangonge mwekalile mulume wakunyata liboko. Bantu bashingile kubangila Yeshu byambo, pe bamwipwile ngayi, “Kati shinafwanina kunyongomanisha muntu ha Mutena Wakukatala ndi?”

¹¹ Ngoboni wabatongwezele ngayi, “Kati yani hakati kenu uli na mbelele ndi ukuwila mu liteke ha Mutena Wakukatala, ha kubula kumukwata na kumufumishamo?

¹² Muntu ukupitakana mbelele shikuma. Nohobene shinafwanini kutenda shiwahe ha Mutena Wakukatala.”

¹³ Niho Yeshu ambile ku mulume wakunyata liboko ngayi, “Olola liboko lyobe.” Wolwele, pe lyanyongomanine, lyolokele nehi lyamina.

¹⁴ Niho Bafwalishi bafumine bayile na kulyambashana ngayi bawane mwakuzihila Yeshu.

Mukamulimo wa Nyambi wakuhatiwa

¹⁵ Oho Yeshu alimukile ebye balyambashaninenga, wafumine ku mwanya uyo. Bantu babengi bamukonkele, pe wanyongomanishile nimwabo bakolelenga.

¹⁶ Wabacincikile ngayi hinga bamutumbalalisha.

¹⁷ Kwatendiwile eshe ambile muluwe Ishaya ngayi,

¹⁸ “Monenu mukamulimo wami ou nahatile, wakuhakiwa, wangwahililishanga shikuma, nikayaka Moyo wami hahendi, pe ukaleta kwoloka ku matunga.

¹⁹ Kukakuwa hinge kukabilika na lizu lyalinene wufwako, hinge kuya na kubilika mu mikwakwa wufwako.

²⁰ Kukapokola litete lya ku bofwoka wufwako, kami kukazima lumuni lwa ncishilile wufwako, hantu kwoloka kukakone.

²¹ Mu lizina lyendi matunga bakalumbeza.”

Yeshu na Mbelezebule

²² Niho baletele kuli Yeshu mulume wa mayimbwe, wengile wakubula kwamba. Yeshu wamunyongomanishile, pe watatikile kwamba na ku mona.

²³ Bantu nimwabo bakomokele bambile ngayi, “Kati ou kaliha niye Mwana Ndavita ndi?”

²⁴ Ngoboni Bafwalishi oho bayuvwile noho bambile ngayi, “Ou ukufumisha mayimbwe na ngovu za Mbelezebule mwene wa mayimbwe.”

²⁵ Yeshu walimukile bihanganiko byabo, pe wabatongwezele ngayi, “Wene nimwawo ukulitapulula na kulilwisha ukaloba. Kami munzi nimwawo hinge litala linalitapululu na kulilwisha kukatwesha kwimana bifwako.

²⁶ Ndi Shatana ukutanda Shatana unalitapululu na kulilwisha niye mwine. Pe wene wendi ukashuma nahiti?

²⁷ Ndi nikufumisha mayimbwe na Mbelezebule, pe bandongesha benu ba kuwafumisha na yani? Nohobene bandongesha benu bakenga bakakumiyata.

²⁸ Ngoboni ndi nikufumisha Mbelezebule na Moyo wa Nyambi, limukenu ngayi Wene wa Nyambi wakumakale hahenu.

²⁹ “Kami muntu ukutwesha nahiti kwingina mu litala lya muntu wa nyala ngayi apukule byuma byendi? Ndele atatike taha kumanga uya muntu wanyala, niho akapukule litala lyendi.

³⁰ “Muntu nimwendi wakubula kundwila, ukundwisha, nimwendi wakubula kukungula na nami, ukupanzanisha.

³¹ Nohobene nikumitongweza ngayi, wubi nimwawo na lihandu bikayatiliwa ku bantu, ngoboni ou ukuhandula Moyo wa Kuyela kukayatiliwa wufwako.

³² Kami ou ukutoya shibi Mwana Muntu, ukayatiliwa, ngoboni ou ukutoya shibi Moyo wa Kuyela kukayatiliwa wufwako hinge mu myaka yino hinge mu myaka yikeza kumbili.

Mutondo na mikabo yawo

³³ “Lamenu mutondo shiwahe mwanga wikale na mikabo yayiwahe, ndi mukwikala na mutondo wawubi, pe mukekala na mikabo yayibi. Ndaba mutondo walimukiwanga na mikabo yawo.

³⁴ Enu bana bampili, mu kutwesha nahiti enu bababi kwamba byambo byabiwahe? Ndaba ngayi kanwa kambanga ebye byenzala mu mutima.

³⁵ Muntu wamuwahe watutwishanga byabiwahe bili mu shikongelo shendi shashiwahe, kami muntu wamubi watutwishanga byabibi bili mu shikongelo shendi sha shibi.

³⁶ “Ngoboni nikwamba kukwenu ngayi ha Mutena wa Kuyata muntu nimwendi ukayatiwa na mazu wendi owa aya nimwawo ambile.

³⁷ Ndaba na mazu obe ukashambishiwa, kami na mazu obe ukayatiwa.”

Bakunyepa shikomokesho

³⁸ Niho bamo bakakulongesha ndayano na Bafwalishi bambile kuli Yeshu ngayi, “Mulongeshi! Tukushinga tumone shikomokesho kukwobe.”

³⁹ Ngoboni Yeshu waba kumbwile ngayi, “Enu mukoka wa wubi wa wunjenge! Mukushinga shikomokesho, ngoboni kowa shikomokesho nikumipanika, ndele shikomokesho sha muluwe Yona.

⁴⁰ Ngonehe Yona ekalile mu livumo lya inci wamunene matena ahatu mwaana na wushiku na Mwaana Muntu ukekala mu limvu mwa kunonka matena ahatu mwaana na wushiku.

⁴¹ Ha Mutena wa Kuyata, bantu ba ku Nineva bakemana na kuyata ou mukoka. Ndaba Bakanineva batengulukile na ku shimikila kwa Yona, ngoboni wakupitakana Yona uli kuno!

⁴² Lihano waku mabukubuku ukemana na nou mukoka ha Mutena wa Kuyata, pe ukawuyata. Ndaba niye wafumine kwakumina hanci kwiza mu kuyuvwa ngana za Sholomoni, ngoboni wakupitakana Sholomoni uli kuno!

Kuboka kwa mayimbwe

⁴³ “Oho mayimbwe anafumu mu muntu, ayanga mu ngawungawu na kushinga mwanya wakukatalila, ngoboni abulanga kuwana kukatala,

⁴⁴ niho akwamba ngayi, ‘Nikaboka mu litala lyami omo nafumine.’ Oho akukuma akuwana litala lya mukungulu, linakombiwi na kuwahishiwa.

⁴⁵ Niho akaya mu kuleta mayimbwe amina a mutanu na abili akupitakana niwo, pe akwingina na kwikalamo. Nohobene nyinkalo ya muntu uyo yikenga yayibi kupitakana ya kutatika. Kukenga nahiyo kami ku mukoka ou wa wubi.”

Mandiyendi Yeshu na bakonzobendi

⁴⁶ Oho ushili kwamba ku likunge lya bantu, kwezile mandiyendi na bakonzobendi. Bemanine ha munkanda, bashingile kwamba nendi.

⁴⁷ Muntu wamina watongwezele Yeshu ngayi, “Bamandiyobe na bakonzobobe bali ha munkanda, bakushinga kwamba nobe.”

⁴⁸ Yeshu wakumbwile ngayi, “Kati bamawa bayani? Na bakonzobami bayani?”

⁴⁹ Niho enikile bandongesha bendi, pe wambile ngayi, “Aba nibo bamawa na bakonzobami.

⁵⁰ Ndaba muntu nimwendi ukutenda shamutima wa Tate uli muyilu, niye mukonzowami na mpanzami na bamawa.”