Mateo 1 - Libuka Lya Kuyela

Shihemunwino sha Yeshu Kilishitu

¹ Ou niwo muhoko wa mazina a lupashi lwa Yeshu Kilishitu, mwana Ndavita, mwana Abulahama.

² Abulahama wengile tata Ishaki na Ishaki wengile tata Yakobo. Yakobo wengile tata Yunda na bawushinda wendi.

³ Yunda wengile tata Pelizi na Zela mandiyabo wengile Tamale. Pelizi wengile tata Heziloni, Heziloni wengile tata Lamu.

⁴ Lamu wengile tata Aminandabe, Aminandabe wengile tata Nahishoni. Nahishoni wengile tata Shalimoni.

⁵ Shalimoni wengile tata Mbowazi, mandiyendi wengile Lahambu. Mbowazi wengile tata Ombendi, mandiyendi wengile Lute. Ombendi wengile tata Njeshi.

⁶ Pe Njeshe wengile tata mwene Ndavita. Ndavita wengile tata Sholomoni, mandiyendi wengile mukaza Uliya.

⁷ Sholomoni wengile tata Lehombowami, Lehombowami wengile tata Ambiya. Ambiya wengile tata Asha,

⁸ Asha wengile tata Yehoshafwati. Yehoshafwati wengile tata Yeholamu. Yeholamu wengile tata Uziya.

⁹ Uziya wengile tata Yotamu, Yotamu wengile tata Ahazi. Ahazi wengile tata Hezekiya,

¹⁰ Hezekiya wengile tata Manashe. Manashe wengile tata Amoni, Amoni wengile tata Yoshiya.

¹¹ Pe Yoshiya wengile tata Yekoniya na bawushinda wendi, ha shikati shiya batwaliwile mu wuntapwa ku Mbambiloni.

¹² Munyima ya kutwaliwa mu wuntapwa ku Mbambiloni, Yekoniya wengile tata Shelatiyele, Shelatiyele wengile tata Zelumbambelu.

¹³ Zelumbambelu wengile tata Ambiyundi, Ambiyundi wengile tata Eliyakimu, Eliyakimu wengile tata Azole,

¹⁴ Azole wengile tata Zandoki. Zandoki wengile tata Akimu, Akimu wengile tata Eliyundi.

¹⁵ Eliyundi wengile tata Eliyazala, Eliyazala wengile tata Matani. Matani wengile tata Yakobo,

¹⁶ Yakobo wengile tata Yoshefwa, ou wengile mukokwa Maliya, ou wabelekele Yeshu, ukutumbiwa Kilishitu.

¹⁷ Nohobene ku balika kuli Abulahama kuleta kuli Ndavita kwengile mikoka likumi na yinaa, kami ku balika kuli Ndavita kuleta kukutwaliwa mu wuntapwa ku Mbambiloni, kwengile mikoka likumi na yinaa. Kami kufuma kukutwaliwa mu wuntapwa, kukuma ku shikati sha kuhemuwa kwa Kilishitu kwengile mikoka likumi na yinaa.

Kuhemuwa kwa Yeshu Kilishitu

¹⁸ Kuhemuwa kwa Yeshu Kilishitu kwekalile nehe. Maliya bamubalikilile kuli Yoshefwa, oho shilolo baliyeke, wawaniwile ngayi uli na livumo lya ku Moyo wa Kuyela.

¹⁹ Haya mukokwendi Yoshefwa wengile mulume mukakutenda byakwoloka, kaliha washingile kumuyuvwisha lisheni ku bantu, nohobene wekalile na bihanganiko bya kuleha kumuyeka kuwi.

²⁰ Ngoboni oho ekalile na bihanganiko bya noho, lingeloyi lya Mwene lyalimonekeshele kukwendi mu mulo, pe wambile ngayi, “Obe Yoshefwa mwana Ndavita, hinga utina kuyeka mukazobe Maliya. Ndaba eshe shinamwimitishi sha kufuma ku Moyo wa Kuyela.

²¹ Ukabeleka mwana wa mulume, pe ukamutumba ngayi Yeshu, ndaba niye ukalamwina bantu bendi ku wubi wabo.”

²² Haya ebye nimwabyo byamonekele ngayi kutendiwe ebye ambile Mwene muli muluwe ngayi,

²³ “Kankanga ukemita, na kubeleka mwana wa mulume, ukatumbiwa Imanuwele,” (kutontolola ngayi, “Nyambi uli na netu”).

²⁴ Oho Yoshefwa apindukile, wayekele Maliya, ngonehe amutongwezele lingeloyi lya Mwene,

²⁵ ngoboni kaliha walanganine nendi hantu noho abelekele mwanendi wa mulume. Pe Yoshefwa wamutumbile ngayi Yeshu.