Malila 5 - Libuka Lya Kuyela

Lilombelo lya nceshe

¹ Obe Nyambi ya Ngula anuka biya binatendiwi kukwetu. Penza, pe mona kuyeneshiwa kwetu.

² Likona lyetu linapanikiwi ku bayeni, bakakwenda bali na kwikala mu matala wetu.

³ Bakankole banazihi batatizetu, pe bamandizetu bengakale bamfwile.

⁴ Tunafwanini kuyumbila mema tukunwa, pe tunafwanini kulanda nkuni.

⁵ Bali na kutuyandisha shikuma, tunakwanga ngoboni kutwitabilisha kukwanguluka bafwako.

⁶ Ha kuwana byakulya byabingi, twayile na kunyepa ku Engepita naku Ashiliya.

⁷ Bankakazetu batendele wubi, ngoboni nimwabo banafu, haya tuli na kuyandilamo ndaba ya wubi wabo.

⁸ Bandungo bali na kutulela, pe kowa hinge umo wakutulamwina mu maboko wabo.

⁹ Ndaba ya bamalamo betu, myoyo yetu yili mu kampwe, oho tukuya mukushingashinga byakulya mu libelelengwa.

¹⁰ Nzala yinatuletele wulweli wa mashikashika, pe na shitembe shikutukuma ngonehe mundilo.

¹¹ Bamalamo betu banakandamiki kulala bakazi na batunkanga, mu minzi ya Yunda naha lipili lya Ziyoni.

¹² Bantwamina betu banabatwala mu kubakoleka, pe batukulukazi betu bafwako kubapana maleema.

¹³ Bandumbana bali na kubakandamika kutwa ngonehe bandungo, batwanuke babalume bali na kupalyangila na miziho yayilemu ya nkuni.

¹⁴ Bakulwane nabo banalehesho kwikala ku bikungulukilo bya mu lukena, pe bandumbana banalehesho kwimbila.

¹⁵ Ku wahilila kunafumu mu mitima yetu, pe kulila niko kunahingi mu mwanya wakushinda.

¹⁶ Kowa shuma shinashalaho kubiya twaliyemezele nabyo. Twabipishile, haya twalobakale.

¹⁷ Tulinakukola ku mitima, pe kutwesha ku mona tufwako ndaba ya mihozi.

¹⁸ Ndaba Lipili lya Ziyoni lili mu lipembe, pe bamimbwe nibo bali na kwendelamo.

¹⁹ Ngoboni obe Nyambi ya Ngula, wenga mwene mwaya myaka. Ukalela mwaya myaka.

²⁰ Shuma ngani unatushiyili shikati shashitali, Kati wufwako kukatwanuka kami ndi?

²¹ Nyambi ya Ngula tubweshele kukwobe, pe tukaboka. Tubweshele kami wuwahe wetu wa mwaka.

²² Hinge unatukaninini bene ndi? Kati kowa aha ha kumina kupilama kwobe ndi?