Malila 4 - Libuka Lya Kuyela

Kunyima ya kuwa kwa Yelushalema

¹ Ha! Wuwahe wa ngolinde yetu yakubyazima wunamana, mamanya aku Litala lya Nyambi ya Ngula, anapanzanini mu mikwakwa nimwamo.

² Bandumbana ba Ziyoni bengile babawahe ngonehe mamanya a ngolinde kukwetu, ngoboni lelo bali na kubatendesha milimo ngonehe zinyungu za lima za kubumba.

³ Hinge bamimbwe bayamwishanga na kulela banababo shiwahe, ngoboni bantu bami banafweke ngonehe kayoni yimpye unaleyeke bana bendi.

⁴ Bakulehelela banababo hibafwa kunzala naku linyontwa, batwanuke bali na kunyepa byakulya, ngoboni kowa waku bapanabyo.

⁵ Bantu bekalile na kulya byabiwahe bali na kufwa nzala mu mikwakwa, bantu bayo bekalilenga shiwahe bali na kushingashinga byakulya mu mateke mwakuyumbila bya mazilo.

⁶ Bantu bami banabashushulu shikuma, kupitakana baka Shondoma, lukena luya lwalobele shikati shashishe na ngovu za Nyambi.

⁷ Babilolo betu kaliha balibipishile, ngoboni bengile ba kutuba ngonehe mahwe, bekalile na nyala pe kami bengile bantu ba kushuma, ba kubyazima na kupinduka shiwahe ngonehe mamanya a shafwila.

⁸ Zimpala zabo zinashipi bwii pe bikonde byabo binayuminini, ha zinyutu zabo ngonehe mitondo. Haya hikowa wakubalimuka mu mikwakwa,

⁹ Bayo bafwilile mu nzita bafwile shiwahe, kupitakana bafwile ku nzala. Aba bafwile bapopele kanikani kutwala ha kumana ndaba ya kubula bya kulya.

¹⁰ Makando amanene aya ezile ha bantu bami, bambuyama banceshe lelo bana kuteleka banababo kwinga byakulya byabo.

¹¹ Nyambi ya Ngula wapilamine shikuma, niho abangizile mundilo uya wahokeshele Ziyoni nimwayo.

¹² Bamyene hano kaliha bakulupilile hinge muntu nimwendi muno mu kaye, ngayi bamalamo ba kutwesha kwingina mu Yelushalema.

¹³ Ngoboni eshe shatendiwile, ndaba bamiluwe na bakankombela bamu Yelushalema batendele wubi, aba baleteshele lufu ha bantu bakubula mulandu.

¹⁴ Bendanganinenga mu mikwakwa ngonehe batushishitwa, balibipishile ha bivwalo byabo nimwabyo na mukeza, pe kowa hinge umo watweshele kubakwata.

¹⁵ Bantu babilikizilenga ngayi, “Fumenu kukwetu, munalibipishi hinga mutukwata.” Nohobene bekalile bakakwendamo kufuma litunga kuya ku litunga limina, ngoboni kowa na muntu wabatambwile.

¹⁶ Nyambi ya Ngula niyemwine wabapanzanishile, kaliha wekalile na nceshe kukwabo. Kaliha wanukile bakankombela hinge bantwamina betu.

¹⁷ Twekalile na kutatilila kuyavwiwa, kutwala noho twakwangile kupenzelela. Twapenzelele ngayi tuwane kuyavwiwa, kufumina ku bantu bamina, ngoboni kowa nanaba batuyavwile.

¹⁸ Bamalamo betu batupenzelelenga, pe kaliha twatweshele hinge kwenda mu mikwakwa. Matena etu amanine, twakumine ku mamaninino awo.

¹⁹ Bakakutukonka batutandile shawangu kupitakana bangonga bakakutuka. Batukonkele naha binkanda, batubazumwishilenga kutukwata mu libelelengwa.

²⁰ Pe bakwatile likota lya kuyoya kwetu, uya mwene Nyambi ya Ngula ahatile, ou twakulupilile ngayi ukatulama ku bamalamo bakatwingina.

²¹ Enu bantu ba Endoma na Uzi, wahililenu, ngoboni nanenu kami kushushula kuli na kwiza, nanenu kami mukayanda na kupelyangila muhelengwa na kuyuvwa lisheni.

²² Ziyoni natambulu ncuungu yendi ya wubi, pe Nyambi ya Ngula wufwako kami kukabekalika mu wutampwa. Ngoboni Endoma, Nyambi ya Ngula ukakushushula na kuholola milimo yobe ya wubi.