Malila 3 - Libuka Lya Kuyela

Kushushula, kutenguluka na kulumbeza

¹ Ami nikulimuka kushushula kwa Nyambi.

² Wantandilile mu mincimpwe mwakubula wezi wakutwesha kwinginamo.

³ Wankamine ku bokelaho na ku bokelaho kwakubula kunyuvwila nceshe.

⁴ Washiyile lutu lwami hinga lwekala na mizizi mizizi, napokozolo bifupa byami.

⁵ Nancinkili mu tolongo ya makalikiza na makando.

⁶ Nankandamiki kwikala mu mincimpwe ya lufu, ngonehe muntu uya wafwile mwaka.

⁷ Nyambi namanga mawenge hinili kayili, kulumbeza nifwako kwa ku fwanina kupanza.

⁸ Hinge niho nikubilikiza na kulombela kushinga kuyavwiwa, ngoboni wufwako kukumbula.

⁹ Niye naziki mu nzila yami na mamanya. Nikupelyangila ha kwendamo.

¹⁰ Nyambi wengile ngonehe Mbeya, unakumbelamina kunkumo ya nzila, ngonehe kami shimbwi ukushinga kunkilukila.

¹¹ Wantulumwinine kumfumisha mu nzila wantabwezele mapinzi mapinzi, pe wanciyile nahiya mu mukwakwa.

¹² Wananine shipando shendi sha mukunzi, ngayi ami ninge ha kuyaha mivwi yendi.

¹³ Niho mivwi yanyahile, yenginine shikuma ha lutu lwami.

¹⁴ Bantu bali na kuhepa mutena nimwawo, nafutukakale kwinga shuma sha kuhengamina kukwabo.

¹⁵ Nyambi wankandamikile kulya na kunwa byabilulu.

¹⁶ Wavumbile lupala lwami mu limvu, na bunkulu mayewe ami na mamanya.

¹⁷ Moyo wami wufwako kuwana ku mwena, navulamakale ku wahilila eshe kwekalilamo.

¹⁸ Nikulyambashana ngayi, “Namanakale, nifwawo matena amengi akuyoya, kulumbeza kwami muli Nyambi kunamana.”

¹⁹ Kwanuka makalikiza wami na kuyambangila kwami, byafutukakale kwinga byabilulu ngonehe wulembe.

²⁰ Nilinakubihanganika bikati nimwabyo, moyo wami unapopo.

²¹ Ngoboni kulumbeza kwabokanga oho nanukanga shuma eshe shimo.

²² Shishemo sha Nyambi ya Ngula, kaliha shakwanganga, kami nceshe zendi kumana zifwako.

²³ Byenga byabipya, lumenemene na lumenemene, kulunga kwobe Nyambi ya Ngula, kwenga kwakunene shikuma.

²⁴ Nikulyamabashana ngayi, “Kowa shuma nikashinga ndaba Nyambi ya Ngula, uli na nami, mumwendi nikulumbeza.”

²⁵ Nyambi ya Ngula, wenga wanceshe ku muntu nimwendi ukumukulupila na kumwombatala,

²⁶ nohobene, Nyambi wamuwahe kunobo ba kumutatilila na lunzewe ngayi atupulwishe.

²⁷ Nyambi wamuwahe kunobo ba kushimba mpongoho oho bashili batwanuke.

²⁸ Oho tukuyanda twafwanina kwikala ninkayetu nee na kutatilila,

²⁹ tushungumane na kulishisha kampe kuli kulumbeza kumbili.

³⁰ Tutengekele ntanta kuli ou ukushinga kutukama, tunafwanini kutambula byuma nimwabyo.

³¹ Nyambi ya Ngula kukatukana mwaya myaka wufwako.

³² Hinge ngayi ukutuletela makando, ngoboni nceshe na shishemo shendi hahetu shashinene na ku shuma.

³³ Mwene kaliha wa wawahililanga kutuyandisha hinge kutuyuvwisha kukola.

³⁴ Wakukangana alimuka oho myoyo yetu ba kuyiyandisha mu tolongo,

³⁵ Alimuka oho ba kutukanina kupwisha kuya atupanine,

³⁶ oho bakubula kuyata mu kupwisha mu zinkuta, Mwene alimuka.

³⁷ Kowa muntu ukutwesha kutenda shuma kwakubula kulayelela kwa, Nyambi ya Ngula.

³⁸ Wuwahe na wubi nimwabyo bikutendiwa, ha kulayelela kwa nou Wakukangana.

³⁹ Kati shumangani tukulinyenga kuli, Nyambi ya Ngula, oho akutushushula ndaba ya wubi wetu?

⁴⁰ Tuyenu tulibelulenu shiwahe na ku bokela kuli Nyambi ya Ngula.

⁴¹ Tushinkululenu mitima yetu na kukatula maboko wetu muyilu kuli Nyambi, na kulombela ngayi,

⁴² “Obe, Nyambi ya Ngula, tunatende wubi na ku kufutulukila ngoboni obe shilolo utuyatile.

⁴³ Mu kupilama kwobe watutandile na kutuziha kubula kutuyuvwila nceshe.

⁴⁴ Walifwikile mu likumbi lyalinene shikuma nohobene malombelo wetu kutwesha kukuma kukwobe afwako.

⁴⁵ Unetabilishi kaye nimwako kutufutula kwinga lilala kwa kuyumbila byabibi.

⁴⁶ Bamalamo betu nimwabo bali na kutuhandula, na kutuhengamina.

⁴⁷ Tunekala mu makando amanene na kuloba, tuli na kuyoya mu malamo namu bowa.

⁴⁸ Meho wami akukunkula mihozi, ha kuloba kwa bantu bami.

⁴⁹ Mihozi yami yili na kukunkula ngonehe mishinzi ya kubula kuyuma,

⁵⁰ kutwala noho Nyambi ya Ngula, akupenza hanci kufuminina kuyilu na kutumona.

⁵¹ Mutima wami unakalikizi, oho niku mona biya byatendiwile ku bambuyama bamu lukena.

⁵² Bamalamo bami bankwatile, ngonehe kayoni wakubula mulandu.

⁵³ Bashingile kunziha ha kunyumbila mu liteke, oku hiniyoya, pe bampuhile mamanya.

⁵⁴ Mema abalikile kumfwika pe nahanganikile ngayi kufwa kuli hahepi na nami.

⁵⁵ Oho nekalile mu nceto mu liteke, nabilikizile kukwobe Nyambi ya Ngula.

⁵⁶ Oho nakulambililile ngayi wuyuvwe kulila kwami, pe wanyuvwile.

⁵⁷ Obe wezile hahepi pe wankumbwile ngayi, ‘hinga wutina.’

⁵⁸ Nyambi ya Ngula wezile na kunkuliza, pe wapulwishile moyo wami.

⁵⁹ Nyate shiwahe, obe ukulimuka wubi ou banatende kukwami.

⁶⁰ Ulimuka bamalamo bami ebye ba kunzimbila, naneshe bali na kuyongola kundwisha.

⁶¹ Obe Nyambi ya Ngula, unayuvwu eshe bali na kuhandula, ulimuka na biyongola byabo nimwabyo.

⁶² Mwaana nimwawo ba kutungula byami na kuyongola, mwaku fwanina kuntendela.

⁶³ Kufuma ku lumenemene kukuma ku wushiku banakuhengamina.

⁶⁴ Obe Nyambi ya Ngula, bashushule kuya nanebye banatende.

⁶⁵ Bapanike mitima ya wulube, mwanga shikuto shobe shize hahabo.

⁶⁶ Obe Nyambi ya Ngula, batande na kupilama kwobe na kubalobesha hano ha kaye.”