Malila 2 - Libuka Lya Kuyela

Nyambi ya Ngula wengile ngonehe kamalamo ku Yelushalema

¹ Ha! Nyambi ya Ngula mu wukali wendi, nafwiki Ziyoni na likumbi lya mincimpwe. Nawishili hanci wuwahe wa Ishalela na kuwu futula kwinga wakubula shimina. Ha mutena wawukali wendi Nyambi ya Ngula washiyile hinge Litala lyendi.

² Nyambi ya Ngula walobeshele minzi nimwayo ya Yakobo kwa kubula kubayuvwila nceshe, mu wukali wendi wawishilile hanci bipata nimwabyo biya byalamine litunga lya Yunda, wayuvwishile lisheni wene na batulela babo.

³ Mu wukali waketwile ngovu za Ishalela, wakanine kutuyavwa oho bamalamo batulwishilenga. Watupilaminine ngonehe mundilo wabangilenga muli Yakobo ou ukutwesha kulobesha byuma nimwabyo.

⁴ Wananine mivwi yendi hahetu ngonehe kamalamo, niye wazihile nimwabo baya twawahililile kwikala nabo. Muno mu Ziyoni twayuvwile wukali wendi ngonehe mundilo.

⁵ Nyambi ya Ngula, wafutukakale ngonehe kamalamo, nalobeshe Ishalela. Nashiyi zinkena nimwazo na bipata mu mapembe. Nalete wunginga ha bantu bamu Yunda wakubula kumana.

⁶ Washiwile Litala lyendi muya twamulemeshelelenga. Niye namanishi bimbo na Matena aku Katala. Mu kupilama kwendi kwakunene wakanine mwene na mukankombela.

⁷ Nyambi ya Ngula washiyile kaala kendi, na ku shiya kami Litala lyendi lya kuyela. Niye wetabilishile bamalamo ku shiwula twimbi twabo. Bamalamo batendele miyoyo mu Litala lya Nyambi ya Ngula, ngonehe ha mutena wa shimbo.

⁸ Nyambi ya Ngula, wafungile ngayi kembi ka Ziyoni kashiwuke, wayongwele shiwahe ha kuloba kwabo. Waleteshele ngayi tupeshi na twimbi tulile na kukanka ngonehe bantu.

⁹ Mapangati nimwawo analobo hanci, mikambo yabyo nimwayo yinacancozoko. Mwene na babilolo bali mu wuntampwa, wuluno kowa muntu waku longesha ndayano, pe bamiluwe nabo bafwabyo bimono, bya kufuminina kuli Nyambi ya Ngula.

¹⁰ Bakulwane bamu Ziyoni, banekala hanci hinga bamwena nee, banalifukwili limvu ha mitwe yabo, pe banavwala bicancolo. Batunkanga bamu Yelushalema banazebwili mitwe yabo hanci.

¹¹ Meho wami afubilakale na kulila, moyo wami uli mu wukalu. Napopo na wunginga ha kuloba kwa bantu bami. Batwanuke na bambututu bali na kulungukila mu mikwakwa yamu lukena ndaba ya kapande.

¹² Bali na kulilila kuli bamandizabo byakulya na bya kunwa, pe ba kuwila mu mikwakwa ngonehe baya banalemana, oho nibo bali na kutula moyo wabo, pe ba kufwila mu maboko a bamandizabo.

¹³ Obe Yelushalema, Ziyoni nahaka, nikamba bishini hahobe? Nikakubengezeka nahiti? Kowa wayandile ngonehe obe, makando wobe anavulu shikuma, ngonehe mema a liwate, yani ukutwesha kukunyongomanisha?

¹⁴ Bamiluwe bobe bakwongezele na bimono bya mahalo, bakwongezele ha mazu wabo, kaliha ba kushiwulwile ngayi utoshe wubi wobe, ngayi mwanga utenguluke na kupuluka ku wukalu.

¹⁵ Bantu bakupita mu lukena ba kukama mu maboko. Bakuhengamina oho ba kupenza, na kunengokesha mitwe yabo ha kuloba kwa Yelushalema na kwamba ngayi, “Kati olu nilo lukena lwatumbiwile ngayi lwa lu wahe shikuma, ku wahilila kwa kaye nimwako?”

¹⁶ Bamalamo bobe nimwabo bali na kukuhandula na kukuhengamina. Bakulikumba mayewe na kufooma hibamba ngayi, “Tunalulobeshe. Ou niwo mutena twatatilililenga.”

¹⁷ Nyambi ya Ngula natende biya ashingile kutenda, Niye unakulobeshe kwakubula kukuyuvwila nceshe, ngonehe akushiwulwile kushikale. Niye unaleteshe bamalamo bobe kuliyemeza. Niye nabawahililishi ha kuwa kwobe.

¹⁸ Obe kembi ka Ziyoni, yitabilisha twimbi twobe kulilila kuli Nyambi ya Ngula. Mihozi yipite mwaana na wushiku ngonehe mushinzi, hinga ukwanga kulila na kulihohoma.

¹⁹ Pindukanga wushiku nimwawo, nohobene ulombelenga kuli Nyambi ya Ngula, lipanike kukwendi na kumulomba ngayi mwanga akuyuvwileko nceshe, ha bana bobe bali na kulungukila ha mahambanzila amu mikwakwa ndaba ya nzala.

Yelushalema ulinakwamba

²⁰ Mona! Obe Nyambi ya Ngula, aba uli na kuyandisha. Bakazi bali na kulya banababo ba kulibelekela. Bakankombela na bamiluwe bali na kubazihila mu Litala lyobe.

²¹ Bandumbana na batukulukazi banalala mu mikwakwa banafu. Bandumbana na batunkanga, banabazihi na mikwale. Obe wabazihile kubula kubayuvwila nceshe, ha mutena wawukali wobe.

²² Oho wapilamine wehanine bamalamo bami, ngonehe bayeni banezi ku shimbo, ngayi banyuvwishe kukola bamalamo bami bazihile bana bami nimwabo, kowa hinge umo wapulukileko.