Malila 1 - Libuka Lya Kuyela

Wunginga wa Yelushalema

¹ Ha! Yelushalema, lukena lwenzalile na bantu, wuluno lwafutukakale lipembe. Lukena luya bayemezelenga mukaye nimwamo, haya lwafutukakale ngonehe Mfwile. Lukena lwengile ngonehe lihano ha zinkena nimwazo, wuluno lwafutukakale ngonehe ndungo.

² Wushiku nimwawo uli na kulila, mihozi yendi yili na kukunkula ku mulevu. Bakakuhakiwa bendi ekalile nabo, kowa hinge umo waku fwanina kumubengezeka. Bahoni bendi banamubebe, nimwabo bamufutulukilakale na kumulwisha.

³ Bantu bamu Yunda bayakale mu wuntampwa, banashiyi minzi yabo, ndaba ya makando amanene na makalikiza shikuma, bali na kuyoya mu matunga ashenge, bafwalyo litunga lyabo. Bamalamo babo banabazinguluku, ku zimbalila nimwazo, kami kowa kwa ku fwanina kutinina.

⁴ Mikwakwa ya kuya ku Ziyoni yili na kulila ngonehe bantu, ndaba kowa muntu ulinakwendamo, ha kuya ku Litala lya Nyambi ya Ngula, mu kulemesha ha matena a bimbo. Batunkanga baya bembililenga kuyo bali na kuyanda, pe bakankombela bali na ku shunga. Mapangati amu lukena nimwawo ali tuhu nahiya, niho Ziyoni uli mu wukalu.

⁵ Bamalamo bendi banamukomo, pe uli mu maboko abo. Nyambi ya Ngula unamushushulu ndaba ya wubi wendi wawingi bana bendi bana bakomo na kubatwala.

⁶ Wuwahe wa Ziyoni unamana, bantwamina bendi banafweke ngonehe bineke, baya banakwanga na nzala, nyala zabo zinamana oho ba kutina bakakuyomba.

⁷ Mu matena a makalikiza Yelushalema, uli na kwanuka kuyoya kwakuwahe kuya ekalile nako mu matena akunyima, ngoboni hano hi lipembe. Oho ekalile mu maboko a bamalamo bendi kowa hinge umo wamuyavwile. Bamalamo oho bamumonenenga bamuhengamininenga ha kuwa kwendi.

⁸ Yelushalema una bipishi shikuma, pe wengakale wa mazilo, nimwabo bamu lemekeelenga bali na kumu hengamina. Bana mumono uli muhelengwa, uli na ku cincazala ku shunga kuholeka lupala lwendi ndaba ya lisheni.

⁹ Wubi wendi unaholoko mu bivwalo byendi, ngoboni niye kaliha watwalileko bihanganiko ku wubi wendi. Kuwa kwendi kwengile kwakukomokesha, kowa wamubengezekele. Yelushalema uli na kulila ngayi, “Bamalamo bami banampitakana, Obe Nyambi ya Ngula, nyuvwileko nceshe!”

¹⁰ Bamalamo bendi banamuyibili, wuheti wendi nimwawo. Wabamonene bengina mu Litala lya Nyambi, omu niyemwine Nyambi ya Ngula, akanishile bakamatunga kwinginamo.

¹¹ Bantu bendi nimwabo bali na ku shunga, oho bali na kushinga byakulya, bali na kutambashana wuheti wabo na byakulya ngayi mwanga bibayoyeshe. Yelushalema uli na kulila ngayi, “Nyambi ya Ngula, mona kami penza eshe nili na kuyanda.”

¹² Kati eshe kutontolola shuma kukwenu muli na kupita munzila shifwako ndi? Monenu kuli wamina namono makando ngonehe ami, makando aya anandetele Nyambi ya Ngula hashikati sha wukali wendi wawunene.

¹³ Watumine mundilo kufuma kuyilu mundilo wahokeshele mukati kami. Niye wamvwimine linkambwila, pe wantulumwinine hanci, wanciyile hinga na lunguka, pe nabulukile nyala mutena nimwawo.

¹⁴ Niye walimukile wubi wami nimwawo, pe wawumangilile hamo nimwawo, wawuzengelele mu ncingo yami, niho wankwangishile shikuma ndaba ya wulemu yawo. Nyambi ya Ngula wampanine mu maboko a bamalamo bami, baya nabulile kutwesha kulwisha.

¹⁵ Nyambi ya Ngula unabweshe bakanzita bami bangovu, watumine kanzunga ka bakanzita mu kulobesha bandumbana bami. Wacancwele bantu ba Yunda ngonehe mushizongelo sha mikabo ya shinyanca.

¹⁶ Ndaba ya neshe nibyo nikulilila na kuvwisha mihozi. Kowa hinge umo wakumbengezeka, hinge kunkalamanisha. Bamalamo banankomo, pe bantu bami hikowa kulumbeza balinako.

¹⁷ Nolwele maboko wami muyilu, ngoboni kowa hinge umo wa ku nyavwa. Nyambi ya Ngula unanyihanini bamalamo, kufuminina kuzimbalila nimwazo kwiza mu kundwisha. Yelushalema banamfutulu kwinga shuma sha mazilo.

¹⁸ Nyambi ya Ngula wenga wakulunga, ndaba ami ninabulu kwombatala ndayano zendi. Nyuvwililenu enu bantu nimwenu, monenu makando wami. Bandumbana na batunkanga bami banabatwala mu untampwa.

¹⁹ Nehanine bakakuhakiwa bami, ngoboni bakanine kunyavwa. Bakankombela hamo na bantwamina, bafwililile mu mikwakwa yamu lukena, oho bekalile na ku shingashinga, byakulya bya ku fwanina kubayoyesha.

²⁰ Nyambi ya Ngula mona ha makando wami, moyo wami unakalikizi. Mutima wami uli na kulwa mushali, ndaba ya wubi wami. Kuli kuliziha mu mikwakwa, hinge mu matala muli lufu.

²¹ Bantu bayuvwile ku shunga kwami, ngoboni kowa wakumbengezeka. Bamalamo bami nimwabo banawahilili hanebye unatende hahami. Leta wangu mutena uya wakuyata wakulupishile, yandisha bamalamo bami ngonehe ami nilinakuyanda.

²² Banyance ndaba ya wubi wabo. Bashushule ngonehe unatende kukwami, ndaba ya wubi wami. Nilinakushunga shikuma, pe kulumbeza kwami nimwako kunamana.