Malaki 3 - Libuka Lya Kuyela

¹ Nyambi wa Makunge ukwamba ngayi, “Monenu, nikutuma ntumwana yami mu kuwahisha nzila kumbili yami. Niho Nyambi ya Ngula ou mukushinga, ukeza ku Litala lyendi na ku bazumuna. Monenu, ntumwana wakulimama ou mu ku wahilila mumwendi ulinakwiza.”

² Ngoboni yani ukatwesha ku shuma ha mutena wakwiza kwendi? Kami yani ukatwesha kwimana oho akaholoka? Ndaba unafweke ngonehe mundilo wa mu ngaanze wayungululanga, nafweke ngonehe mulola wa mukakuyowesha makwiza.

³ Ukeza mu kuyata ngonehe mfuzi mukakushamisha na kuyelesha shiliva, ukayelesha Balevi na ku bashamisha ngonehe ngolinde na shiliva. Bakaletelanga zintupu za kupwisha kuli Nyambi ya Ngula.

⁴ Nohobene zintupu za Yunda na Yelushalema zikawahilisha Nyambi ya Ngula ngonehe ku matena aku mwaka.

⁵ Nyambi wa Makunge ukwamba ngayi, “Nikahenyena hahepi nanenu mu kumiyata. Hohobene nikapaka shawangu kulwisha bakamalele na baka wumambe na baya babezanga bya kwongeza na naba balyatililanga bakamilimo kubula kubapanika mali wabo batambulanga naba balyatililanga bamfwile na banginga na mapukwenda na naba bakubula kuntina.

Kupanika shimo sha wulikumi

⁶ “Ami Nyambi ya Ngula kufutuka nifwako, nohobene nanenu kami, bazukulya Yakobo, mufwako kulobeshiwa.

⁷ Ku balika ku matena a bankakazenu munafumu ku mazu wami kami mwabulile kuwalama. Ami Nyambi wa Makunge nikwamba ngayi, ‘Bokenu kukwami pe na nami nikaboka kukwenu.’ Ngoboni mukwamba ngayi, ‘Tukaboka nahiti kukwobe?’

⁸ Kati muntu ukutwesha kuyibila Nyambi ndi? Ngoboni muna kunyibila. Mukwipula ngayi, ‘Tukukuyibila nahiti?’ Mukunyibila ndaba mufwako kumpana ku shimo sha wulikumi namu zintupu zenu.

⁹ Munakutiwi nimwenu, ndaba litunga nimwalyo muli na kunyibila.

¹⁰ Letenu ku shimo sha wulikumi ku bya kuteza shanzimba mu Litala lyami, ngayi mwanga mwikale byakulya. Nyezekenu taha mu shuma eshe, Nyambi wa Makunge nibyo anamba, ndi kukamishinkwilila mampananga akuyilu na kumiyitila mfuywezi zazingizingi ngayi mukabule nanoku kwakubikongela.

¹¹ Nikakanisha mikumbi ngayi yikabule kulobesha mikabo yenu na mikolobozi ya shinyanca mu mafuba kukaleha kuyima yifwako. Nisho anamba Nyambi wa Makunge.

¹² Niho matunga nimwawo akamitoya ngayi bamfuywezi, ndaba litunga lyenu likenga lya kuwahilisha. Eshe nisho anamba Nyambi wa Makunge.”

Shikulupisho sha nceshe za Nyambi

¹³ Nyambi ya Ngula ukwamba ngayi, “Mwambanga mazu amabi hahami akundwisha. Ngoboni mukwamba ngayi, ‘Mazu ngani amabi twambile akukulwisha?’

¹⁴ Mwambile ngayi, ‘Shinengi shuma showa kutendela milimo Nyambi. Tukuwanaho bishini ha kutenda ebye Nyambi wa Makunge akushinga, hinge kwezeka ku monesha kukwendi ngayi tunatenguluku hanebye tunatenda?

¹⁵ Ngoboni tuku mona bantu ba kulilundumika nibo ba ku wahilila, bantu ba Kubipisha ba kutangama, hinge niho bakwezeka Nyambi bakapanza.’”

¹⁶ Nimwabo aba ba kutina Nyambi ya Ngula ba kulyambashana umo na wamina ngayi, Nyambi ya Ngula watengekele litu na kuyuvwako. Mazina a baya balemeshelenga Nyambi naku mulemeeka atikitiwile mu libuka. Nyambi ukabanuka.

¹⁷ Nyambi wa Makunge ukwamba ebye ngayi, “Bakenga bantu bami, bakenga ba likona lyami lya kuhatiwa ha mutena uyo nemikile, kami nikabayuvwila nceshe ngonehi muntu ayuvwilanga nceshe mwanendi wa mulume uya wamutendelanga milimo.

¹⁸ Niho bantu bami bakamona kutapuluka mukati kabakakulunga na bakuluwa, mukati kanaba ba kutendela milimo Nyambi na baya bakubula kumutendela milimo.”