Mako 9 - Libuka Lya Kuyela

¹ Niye wambile kukwabo ngayi, “Mwa shikuma nikwamba kukwenu ngayi, kuli bamo bali hano, baya bakabula kufwa, hantu banamono Wene wa Nyambi hiwiza na ngovu.”

Yeshu ukufutuka kubyazima

² Kunyima ya matena mutanu na umo, Yeshu wapitwile Pita na Yakoba na Yowano, wabatwalile ku lipili lyalitali kwaninkayabo, kuyo akafutukile kubyazima ku meho abo.

³ Bivwalo byendi byengile bya kubyazima too. Byatubile shikuma ngayi kowa muntu hano hanci ukutwesha kubitubisha nahiyo.

⁴ Kwaholokele kukwabo ba Eliya na Moshesha, hibambola na Yeshu.

⁵ Niho Pita ambile kuli Yeshu ngayi, “Mulongeshi, shashiwahe ngayi twikale kuno. Pe tutende makunka ahatu, limo linge lyobe, lyamina lya Moshesha na lyamina linge lya Eliya.”

⁶ Pita kaliha walimukile eshe afwanina kwamba, ndaba niye na baminendi, batinine shikuma.

⁷ Niho kwezile likumbi lya bafwikile. Kami lizu lyafumine mu likumbi lyambile ngayi, “Ou niye Mwanami nahaka, muyuvwililenu!”

⁸ Wanguwangu oho bandongesha bapenzele noku, noku, kaliha bamonene muntu wamina ndele Yeshu tuhu wekalile nabo.

⁹ Oho ba kunkulukilenga kufuma ha lipili, Yeshu wabakanishile ngayi, “Hinga mushimikila muntu wamina byuma ebye munamono, hantu Mwana Muntu nashanguku ku bafu.”

¹⁰ Bombatalile lizu liyo, ngoboni mukati kabo balyambashanine ngayi, “Kushanguka ku bafu nisho shumangani?”

¹¹ Niho bamwipwile ngayi, “Ndabangani bakakulongesha ndayano bakwamba ngayi Eliya uku fwanina kwiza ha kutatika?”

¹² Yeshu wakumbwile ngayi, “Mwa shikuma Eliya ukwizangaho, ngayi abalakanye byuma nimwabyo. Haya ndabangani kwatikitiwile ngayi Mwana Muntu unafwanini kuyandishiwa shikuma na kukaniwa?

¹³ Ngoboni nikumitongweza ngayi Eliya unezi mwaka, kami bantu bamutendele nimwamo omu bashingile ngonehe kwatikitiwile byendi.”

Yeshu ukunyongomanisha ndumbana wekalile na mayimbwe

¹⁴ Oho Yeshu na bandongesha bahatu babokele oku kwashalile bamina, bamonene likunge lyalinene lya bantu hinga lya bazinguluka na bakakulongesha ndayano hibalikanangana nabo.

¹⁵ Oho bantu nimwabo bamonene Yeshu bakomokele shikuma, pe betukilile kukwendi mu kumushangwisha.

¹⁶ Niho abepwile ngayi, “Ebye mu kulikanangana nabo bishini?”

¹⁷ Mulume umo mukati ka likunge wakumbwile ngayi, “Mulongeshi nalete mwanami kukwobe, uli na mayimbwe akumukwangisha kwamba.

¹⁸ Oho amuwananga amuwishilanga hanci, pe amutupwishanga kafulututu ku kanwa na kulikekenya ku mayewe na kuyuminina lutu. Nalombo bandongesha bobe ngayi bawafumishe, ngoboni shilolo batweshe.”

¹⁹ Yeshu wakumbwile ngayi, “Enu mukoka wakubula kukulupila! Nikekala nenu shikati sha kukuma hati? Nikalilumikila nenu shikati sha kukuma hati? Letenu ndumbana kukwami!”

²⁰ Bamuletele kukwendi. Oho mayimbwe amonene Yeshu, wanguwangu anyukwile ndumbana, niho amuwishile hanci, wayile na kwalangana, pe watupwile kafulututu ku kanwa.

²¹ Yeshu wepwile tatiyendi ngayi, “Kati eshe shamubalikile mwaka ngani?” Wakumbwile ngayi, “Kufuma kuwanuke wendi.

²² Kami bikati byabingi amuyumbilanga mu mundilo na mu mema ngayi amunongeshe. Ngoboni ndi ukutwesha kutenda shuma shamina, tuyuvwileko nceshe, kami utuyavwe!”

²³ Yeshu wambile kukwendi ngayi, “Ingoi, ndi obe ukutwesha, byuma nimwabyo bikutwesheka kuli ou ukukulupila.”

²⁴ Wanguwangu tatiyendi uya kanuke wabilikizile ngayi, “Ninakulupili, ngoboni shashishe nyavwe mwanga nikulupile shikuma!”

²⁵ Oho Yeshu amonene ngayi likunge lya bantu lili na kwitukila kunebye byatendiwilenga, wakalihilile mayimbwe ngayi, “Enu mayimbwe a shihuhu na a kubula kuyuvwa, nikumyambila ngayi fumenu mumwendi kami hinga mukamubokela!”

²⁶ Mayimbwe amukalokeshele, kami amunyukwile shikuma, pe niho afumine mumwendi. Ndumbana wamonekele ngo mutuntu, nohobene babengi bambile ngayi, “Unafu!”

²⁷ Ngoboni Yeshu wamukwatile ku liboko, wamwimikile, niho akatukile.

²⁸ Oho Yeshu enginine mu litala, bandongesha bendi bamwipwile kwaninkayabo ngayi, “Ndabangani etu twabula kutwesha kuwafumisha?”

²⁹ Niho aba kumbwile ngayi, “Mayimbwe a mushobo wanehe kutwesha kufuma nahiya afwako, ndele malombelo na kuzila kulya.”

Yeshu ukwamba kami bya ha lufu lwendi

³⁰ Yeshu na bandongesha bendi bafumine kuyo, bayile na kupita mu litunga lya Ngalileya. Kaliha washingile ngayi muntu hinge umo alimuke oku ali,

³¹ ndaba walongeshelenga bandongesha bendi. Wambile kukwabo ngayi, “Mwana Muntu ukapanikiwa mu maboko a bantu, kami bakamuziha, pe ukashanguka kunyima ya matena ahatu.”

³² Ngoboni kaliha bayuvwishishile ebye atontwelelenga, kami batinine kumwipula.

Yani wamunene shikuma?

³³ Bezile ku Kapenauma, oho bekalile mu litala, Yeshu wabepwile ngayi, “Bishini munalikananganishinga mu nzila?”

³⁴ Ngoboni kaliha bakumbwile, ndaba mu nzila balikananganishilenga mukati kabo ngayi yani eze akenge wamunene shikuma.

³⁵ Yeshu wekalile hanci, wehanine balikumi na babili, pe wambile kukwabo ngayi, “Ndi muntu ukushinga kwinga wakutatika nafwanini kwinga wamamaninino, kami enge mukamulimo wabo nimwabo.”

³⁶ Waletele kanuke wamushe, wamwimikile hakati kabo. Wamubumbatilile, pe wambile kukwabo ngayi,

³⁷ “Nimwendi ukatambula umo wa naba batwanuke babashe mu lizina lyami, unatambulu ami. Nimwendi ukuntambula, wufwako kutambula ami, ngoboni natambulu ou wantumine.”

Nimwendi wakubula kutulwisha niye wetu

³⁸ Yowano wambile ngayi, “Mulongeshi, twamona mulume wafumishanga mayimbwe mu lizina lyobe, pe etu twamukanisha, ndaba kaliha nengi umo wetu.”

³⁹ Ngoboni Yeshu wambile ngayi, “Kaliha mwafwanina kumukanisha, ndaba kowa muntu ukutenda shikomokesho mu lizina lyami, ukutwesha kami na wanguwangu kwamba byabibi hahami.

⁴⁰ Ndaba muntu nimwendi ukubula kutulwisha unengi wetu.

⁴¹ Mwa shikuma nikwamba kukwenu ngayi, muntu nimwendi ukumipanika nkomoki ya mema akunwa mu lizina lyami, ndaba ngayi muli Bakakilishitu mwa shikuma ukatambula ncuungu yendi.

Byezeko bya kutwala ku wubi

⁴² “Muntu nimwendi ukapukalisha umo wa babashe aba banakulupili mumwami ngayi batende wubi, shikenga shashiwahe ngayi amangiwe limanya lyalinene mu ncingo na kumuyumbila mu liwate.

⁴³ Kami liboko lyobe ndi likukupukalisha ngayi utende wubi, liketule. Ndaba shashiwahe kwingina mu wumi hinga wenga shihole kupitakana kuya na maboko abili mu ngehena, mu mundilo wakubula kuzima. [

⁴⁴ Muyo mapila abo a kubula kufwa na mundilo ukubula kuzima.]

⁴⁵ Ndi liwulu lyobe likukupukalisha ngayi utende wubi liketule. Ndaba shashiwahe kwingina mu wumi hinga wenga shihole kupitakana kukuyumbila mu ngehena hinga wekala na mawulu abili. [

⁴⁶ Muyo mapila abo a kubula kufwa na mundilo ukubula kuzima.]

⁴⁷ Liho lyobe ndi likukupukalisha ngayi utende wubi litompole. Ndaba shashiwahe kwingina mu Wene wa Nyambi na liho limo kupitakana kukuyumbila mu ngehena, hinga wekala na meho abili.

⁴⁸ Muyo mapila abo a kubula kufwa na mundilo ukubula kuzima.

⁴⁹ “Ndaba muntu nimwendi ukayeleshiwa na mundilo, nehe nkombela yikuyeleshiwa na mushele.

⁵⁰ “Mushele wenga wawutobe, ngoboni ndi mushele unahamuku ukatobalishiwa nahiti? Yikalenu na mushele mukatikenu, kami yikalenu mu ku mwena ku wumo na wamina.”