Mako 7 - Libuka Lya Kuyela

Bihemwa bya bakulwane

¹ Bafwalishi na bamo bakakulongesha ndayano bayo bafumine ku Yelushalema, bakungulukile kuli Yeshu.

² Bamonene bandongesha ba Yeshu bamo hibalya na maboko a mazilo a kubula kuyowela.

³ (Ndaba Bafwalishi na Bayunda nimwabo benga bakakulama shihemwa sha bakulwane, pe kaliha balyanga byakulya oho shilolo bayowele ku maboko.

⁴ Oho bafumanga ku myanya ya kulandishila, kaliha balyanga ndele banayowele taha. Kubili bihemwa byamina bakonkanga, ngonehe kuyowesha zinkomoki na zinyungu na zindonga za lubemba na zitebulu hinge malili.)

⁵ Niho Bafwalishi na bakakulongesha ndayano, bepwile Yeshu ngayi, “Ndabangani bandongesha bobe bakubula kulama shihemwa sha bakulwane ngoboni ba kulya byakulya na maboko a mazilo?”

⁶ Yeshu wakumbwile kukwabo ngayi, “Ishaya wengile shiwahe oho alubulwile byenu enu bakashishweka, ngonehe atikitile ngayi, ‘Aba bantu ba kundemeeka na mivumbo yabo tuhu, ngoboni mitima yabo yili kwakutali na nami.

⁷ Nohobene, kowa nanebye bali na kundemesha, ndaba ba ku longesha ndayano zinatendiwi ku bantu.’

⁸ “Munashiyi ndayano za Nyambi, pe munombatala shihemwa sha bantu.”

⁹ Yeshu wambile kukwabo ngayi, “Muli na biheka bya kukana ndayano za Nyambi ngayi mwombatale shihemwa shenu.

¹⁰ Ndaba Moshesha wambile ngayi, ‘Lemeeka tatiyobe na mandiyobe, kami nimwendi wukuhandula tatiyendi hinge mandiyendi, mwanga azihiwe.’

¹¹ Ngoboni enu mukwamba ngayi ndi muntu ukwamba kuli tatiyendi hinge kuli mandiyendi ngayi, ‘Eshe nimwasho nafwanina kumiyavwa shinengi Kobana,’ (shiya shinapanikiwi kuli Nyambi,)

¹² pe kwitabilisha uya muntu unamba liya lizu ngayi ayavwe tatiyendi hinge mandiyendi mufwako.

¹³ Nohobene ndaba ya shihemwa shenu, mwazihi ngovu za lizu lya Nyambi. Kami Nikobili byamina byabingi mwatendanga bya kwinga ngo ebye.”

Byuma biku bipisha muntu

¹⁴ Yeshu kami wehaninine likunge lya bantu kukwendi, wambile kukwabo ngayi, “Nyuvwililenu nimwenu, kami muyuvwishishe.

¹⁵ Kowa shuma sha ha munkanda wa muntu shikwingina mukati kendi shikumubipisha, ngoboni byuma bikufuma mukati kendi nibyo bikumubipisha.” (

¹⁶ Ou uli na matu akuyuvwa, ayuvwe!)

¹⁷ Oho Yeshu afumine ku likunge lya bantu, wenginine mu litala, pe bandongesha bendi bamwipwile ngayi atontolole iya nguli.

¹⁸ Niho ambile kukwabo ngayi, “Kati nanenu ku yuvwishisha mufwako ndi? Kati kulimuka mufwako ngayi shuma nimwasho sha ha munkanda ndi shikwingina mukati ka muntu, kutwesha kumubipisha shifwako ndi?

¹⁹ Ndaba kwingina mu mutima wendi shifwako, shayanga mu livumo kami shatutikanga mu lutu lwendi.” (Oho ambile ebye, Yeshu watontwelele ngayi byakulya nimwabyo bikutwesha kuliwa.)

²⁰ Watwalilileho kwamba ngayi, “Shiya shafumanga mu muntu nisho shamubipishanga.

²¹ Ndaba mukati ka mutima wa muntu, nimo mwafumanga bihanganiko byabibi, lwiholwiho na wizi na kuziha

²² na wunjenge na mutongo na kuluwa na mahalo na kulilundumika na mwili na kutungula na kuliyemeza na kubula ngana.

²³ Nimwabyo ebye byabibi byafumanga mu mutima wa muntu nibyo byamubipishanga.”

Kukulupila kwa mbuyama

²⁴ Niho Yeshu akatukile wayile ku litunga lya Tile na Shindone. Wenginine mu litala, ndaba kaliha washingile ngayi bantu balimuke oku ali, ngoboni kaliha watweshele kuliholeka.

²⁵ Wanguwangu mbuyama wamina, ou wekalile na mwanendi wa mushimbi uya wekalile na mayimbwe, oho ayuvwile mpupo ya Yeshu, wezile na kuwila ku mawulu wendi.

²⁶ Uya mbuyama wengile Mukalitunga wa mushobo wa Fonisha mu litunga lya Shiliya, niho anyepele Yeshu ngayi afumishe mayimbwe muli mwanendi.

²⁷ Ngoboni Yeshu wambile kukwendi ngayi, “Leha taha bana bekute, ndaba ku fwanina shifwako kuyangula bana byakulya na kubiyumbila ku batuwa.”

²⁸ Mbuyama wakumbwile ngayi, “Ingoi Mwene, ngoboni hinge batuwa balyanga ncankuncanku zinapulumukili mu nceto ya tebulu ya bana!”

²⁹ Yeshu wambile kukwendi ngayi, “Ndaba unakumbulu nehe, yanga, mayimbwe anafumu muli mwanobe!”

³⁰ Oho mbuyama abokele ku litala lyendi, wawanine mwanendi nalangana ha wulili, kami mayimbwe anafumu.

Yeshu ukunyongomanisha mulume wakuzika matu na kubula kwamba

³¹ Yeshu oho afumine ku litunga lya Tile wapitile mu Shindoni, wakunkulukile ku Liziba lya Ngalileya, pe wakumine mu litunga lya Minzi Likumi.

³² Baletele kukwendi mulume wakuzika matu na kubula kwamba, niho balombele Yeshu ngayi akambike maboko hahendi.

³³ Yeshu wafumishile uyo mulume mu likunge, niho amutwalile kunkumo, pe wayakile minwe yendi mu matu a mulume, wafwizile, niho akwatile lulimi lwendi.

³⁴ Yeshu wa tilaminine kuyilu, washungile, pe niho ambile ngayi, “Efata,” kutontoloka ngayi, “Zikuluka!”

³⁵ Niho matu wendi azikulukile, kami lulimi lwendi lwamangulukile, pe watweshele kwamba shiwahe.

³⁶ Yeshu wabakanishile ngayi hinga batongweza muntu hinge umo, hinge ndi niye wabakanishile shikuma ngayi hinga bamba, ngoboni nibo bayile na kutontolola ebye byatendiwile.

³⁷ Bantu bakomokele shikuma, pe bambile ngayi, “Byuma nimwabyo ukubitenda shiwahe, ukutwesha kuzikula bakakuzika matu na kwambisha bakakubula kwamba!”