Mako 5 - Libuka Lya Kuyela

Yeshu ukunyongomanisha mulume wa mayimbwe

¹ Yeshu na bandongesha bendi, bakumine mu nciza ya Liziba lya Ngalileya mu litunga lya Ngalashena.

² Oho Yeshu afumine mu wato, mulume wa mayimbwe wafumine ha binzimbi waliwanine nendi.

³ Ou mulume wekalilenga ha binzimbi, kami kowa muntu watweshelenga kumumanga hinge na mawenge.

⁴ Ndaba bikati byabingi bantu bamumangilenga na mawenge ku maboko na kumuyaka mu likulo, ngoboni waketwilenga mawenge na kumungozola bikulo. Kami kwabulile muntu wa nyala wakumwombatalisha.

⁵ Bikati nimwabyo wushiku na mwaana, wekalilenga ha binzimbi naha mapili hakaloka, kami walilemekelenga na mamanya.

⁶ Oho amonene Yeshu hahatali, wetukilile kukwendi, pe wafunkamine kumbili yendi.

⁷ Wabilikizile na lizu lyalinene ngayi, “Ukushinga kuntenda bishini obe Yeshu, Mwana Nyambi Wakukangana? Nikukunyepa mu lizina lya Nyambi ngayi hinga unyandisha!”

⁸ (Wambile nahiyo, ndaba Yeshu wambilile mayimbwe ngayi, “Fuma muli ou mulume, obe mayimbwe amabi!”)

⁹ Niho Yeshu amwipwile ngayi, “Lizina lyobe obe yani?” Pe wakumbwile ngayi, “Lizina lyami ami ‘Litanga’ ndaba tuli babengi!”

¹⁰ Mukamayimbwe wanyepele shikuma Yeshu ngayi hinga atandila mayimbwe ha munkanda wa litunga liyo.

¹¹ Hahepi na shinkanda hekalile litanga lyalinene lya bangulube balilenga.

¹² Niho mayimbwe anyepele Yeshu ngayi, “Tutume ku bangulube ngayi tukengine mumwabo.”

¹³ Yeshu wetabilile, pe mayimbwe afumine muli uyo mulume, ayile na kwingina mu bangulube. Litanga nimwalyo lya bangulube lyashingile kukuma ku makulukazi abili, lyetukile, lya kunkulukile na kuliyumbila mu liziba, pe lyandokamine.

¹⁴ Balishani ba bangulube batinine, bayile mu munzi na mu litunga na kutongweza bantu. Pe bantu bayile na ku mona eshe shatendiwile.

¹⁵ Oho bezile kuli Yeshu, bamonene mulume ou wekalile na litanga lya mayimbwe, hinga ekala, unavwala kami uli shiwahe. Bantu batinine shikuma.

¹⁶ Kami obo bamoneneko batongwezele bantu ebye byatendiwile ku mulume wa mayimbwe na ku bangulube.

¹⁷ Niho bantu banyepele Yeshu ngayi afume mu litunga lyabo.

¹⁸ Oho Yeshu engininenga mu wato, ou wekalile na mayimbwe wamunyepele ngayi aye nendi.

¹⁹ Ngoboni Yeshu kaliha wetabilile, niho ambile kukwendi ngayi, “Yanga ku munzi ku bawushinda wobe, ukabatongweze nimwabyo ebye anakutendele Mwene, ou nakuyuvwili nceshe.”

²⁰ Niho mulume ayile mu Minzi Likumi nimwayo na kutongweza bantu, nimwabyo biya amutendelele Yeshu. Bantu nimwabo bakomokele.

Mwana Yailashi na mbuyama wakwatile ku shivwalo sha Yeshu

²¹ Yeshu wabokele na wato ku mbalila yamina ya mu nciza ya liziba, likunge lyalinene lya bantu bakungulukilile kukwendi. Niye wekalile ha shibumbo sha liziba.

²² Yailashi, umo wa bakulwane ba shinangonge ezile, pe oho amonene Yeshu, wafunkamine ku mawulu wendi,

²³ wamulambililile shikuma ngayi, “Mwanami wa mushimbi uli na kushinga kufwa, nikunyepa ngayi uyeko ukamukambike maboko, ngayi anyongomane, mwanga ayoye!”

²⁴ Niho Yeshu ayile nendi, pe likunge lyalinene lya bantu bamukonkele na kumubumbilila.

²⁵ Kwekalile mbuyama wekalile na wulweli wakututika mukeza, myaka likumi na yibili.

²⁶ Wayandile shikuma mu maboko a banganga babengi, wamanishile wuheti wendi nimwawo ekalile nawo, kami kaliha wanyongomanine, ngoboni wulweli wendi wanenehelenga shikati nimwasho.

²⁷ Oho ayuvwile mpupo ya Yeshu, wezile kunyima yendi mu likunge lya bantu, pe wakwatile ku shivwalo shendi,

²⁸ ndaba wambile ngayi, “Ndi nikukwata tuhu ku shivwalo shendi, nikanyongomana.”

²⁹ Wanguwangu wulweli wendi wakututika mukeza wemanine, pe wayuvwile mu lutu lwendi ngayi unanyongomana ku wulweli wendi.

³⁰ Wanguwangu Yeshu walimukile ngayi nyala zinafumu mumwendi, wafutukile mu likunge lya bantu, pe wambile ngayi “Kati yani na kwata ku shivwalo shami?”

³¹ Bandongesha bendi bambile ngayi, “Unamono bantu eshe banakubumbilili, haya ukwipula nahiti ngayi yani unankwata?”

³² Niye watilaminine noku, noku ngayi amone ou unatendesho.

³³ Ngoboni mbuyama walimukile eshe shatendiwile, wezile kuli Yeshu hakanka na bowa, wafunkamine ku meho a Yeshu, pe wamutongwezele bya kupwisha nimwabyo.

³⁴ Yeshu wambile kukwendi ngayi, “Mwanami, kukulupila kwobe kunakunyongomanishi. Yanga mu ku mwena, unanyongomana ku wulweli wobe.”

³⁵ Oho Yeshu ambilenga, ku litala lya Yailashi mukulwane wa shinangonge, kwafumine bantu bamo bamutongwezele ngayi, “Mwanobe unafu. Shumangani ukukabakanishila mulongeshi kami?”

³⁶ Ngoboni Yeshu oho ayuvwile mazu ambiwile, walimbulwile, pe wambile ku mukulwane wa shinangonge ngayi, “Hinga utina, kulupila tuhu.”

³⁷ Kami kaliha wetabilile muntu nimwendi ngayi amukonke, ndele Pita na Yakoba na Yowano mukonzo wa Yakoba.

³⁸ Oho bakumine ku litala lya mukulwane wa shinangonge, Yeshu wamonene bantu bengilenga miyoyo ya kulila na kutuwa mbingo shikuma.

³⁹ Yeshu wenginine mu litala, pe wambile kukwabo ngayi, “Ndaba ngani muli na kwinga miyoyo yayinene na kulila? Mwana shilolo afwe, ngoboni nalangana tulo!”

⁴⁰ Ngoboni bamuhepele. Pe wabatutwishile ha munkanda nimwabo, niho ashimbile tatiyendi na mandiyendi uya kanuke na bandongesha bendi bahatu, pe benginine muyo mwekalile kanuke.

⁴¹ Wakwatile kanuke na liboko lyendi, pe wambile kukwendi ngayi, “Talita kumi.” Kutontolola ngayi, “Obe kanuke wa mbuyama nikwamba kukwobe ngayi pinduka!”

⁴² Wanguwangu wapindukile, pe wendele. (Wekalile na myaka likumi na yibili.) Ndaba ya neshe shatendiwile, bantu bakomokele shikuma.

⁴³ Niho Yeshu abakanishile shikuma ngayi, hinga batongweza muntu hinge umo ha shuma eshe. Wabatongwezele ngayi bapanike kanuke byakulya.