Mako 3 - Libuka Lya Kuyela

Mulume wakunyata liboko

¹ Yeshu kami wenginine mu shinangonge, muyo mu shinangonge mwekalile muntu wakunyata liboko.

² Bantu bamo bamutilaminine na kushinga kumoneshesha ndi ukumunyongomanisha ha Mutena Wakukatala ngayi mwanga bamubangile byambo.

³ Yeshu wambile ku muntu wakunyata liboko ngayi, “Katuka wize kuno kumbili.”

⁴ Pe niho abepwile ngayi, “Kati ndayano zikwitabilisha kutenda bihi ha Mutena Wakukatala? Tunafwanini kutenda byabiwahe ndi kutenda byabibi? Tunafwanini kulamwina wumi ndi kuziha?” Ngoboni kaliha bamukumbwile.

⁵ Niho Yeshu aba concomekele na wukali, hinga ayena ndaba ya wukalu wa mitima yabo, wambile ku muntu uyo ngayi, “Olola liboko lyobe.” Wolwele liboko lyendi, pe lyapolele.

⁶ Bafwalishi bafumine mu shinangonge, pe wanguwangu balyambashanine na bantu ba Helonda ngayi mwanga bazihe Yeshu.

Likunge lya bantu ku liziba lya Ngalileya

⁷ Yeshu wafunzukile na bandongesha bendi, bayile ku Liziba lya Ngalileya. Likunge lyalinene lya bantu bafumine ku Ngalileya na ku Yundeya, bamukonkele.

⁸ Bamo bafumine ku Yelushalema na ku Indumeya na mu nciza ya Yondana na mu litunga lya hahepi na Tile na Shindone, bezile kukwendi ndaba bayuvwile byuma byabinene obyo atendelenga.

⁹ Ndaba ya likunge lyalinene lya bantu, Yeshu watongwezele bandongesha bendi ngayi bamuletele wato, kutina bantu bamushinanisha.

¹⁰ Ndaba wanyongomanishile babengi, nohobene bakamalweli nimwabo bawulumukilile kukwendi ngayi bamukwate.

¹¹ Oho baka mayimbwe bamumonenenga, bawile ku meho wendi, babilikizile ngayi, “Obe uli Mwana Nyambi!”

¹² Yeshu wacincikile shikuma mayimbwe ngayi hinga amutontolola ku bantu.

Yeshu ukuhata bantumwana likumi na babili

¹³ Yeshu wakandamine ha lipili, niho ehanine obo ashingile, pe bezile kukwendi.

¹⁴ Wahatile balikumi na babili baya atumbile ngayi bantumwana mwanga bekale nendi, ngayi abatume mu ku shimikila,

¹⁵ pe bakekale na ngovu za kutanda mayimbwe.

¹⁶ Aba nibo balikumi na babili ahatile, Shimoni (ou Yeshu atumbile ngayi Pita),

¹⁷ na Yakoba mwana Zebende na Yowano mukonzo wendi (bayo Yeshu atumbile lizina lya Mbowanenga, liyo likutontoloka ngayi, “Bana ba Mushika.”)

¹⁸ Anduleu na Fwilipu na Mbatolomewu na Mateo na Tomashi na Yakoba mwana Alufweya na Tandeya na Shimoni Kazeloti,

¹⁹ na Yundashi Ishikalyote ou wabebele Yeshu.

Yeshu na Mbelezebule

²⁰ Niho Yeshu ayile ku munzi, nohobene likunge lya bantu bakungulukile kami hamo. Yeshu na bandongesha bendi kaliha batweshele hinge kulya.

²¹ Oho bawushinda wendi bayuvwileko, bayile ngayi bakamufumisheko, ndaba bantu bambilenga ngayi, “Unapempele.”

²² Bamo bakakulongesha ndayano bayo bafumine ku Yelushalema, bambile ngayi, “Uli na Mbelezebule, kami ukutanda mayimbwe na ngovu za mwene wa mayimbwe.”

²³ Niho Yeshu abehanine, pe wambile kukwabo na zinguli ngayi, “Kati Shatana ukutwesha nahiti kutanda kami Shatana?

²⁴ Ndi wene ukulitapulula na kulilwisha, uya wene kutwesha ku shuma wufwako.

²⁵ Kami ndi litala likulitapulula na kulilwisha, liyo litala kutwesha ku shuma lifwako.

²⁶ Kami ndi wene wa Shatana ukulitapulula na kulilwisha, kutwesha ku shuma wufwako ngoboni uli hahepi na kumana.

²⁷ Ngoboni kowa muntu wakwingina mu litala lya wa nyala na kupukula byuma byendi, ndele atatike taha kumanga uyo muntu wa nyala nohoboni apukule byuma byendi.

²⁸ Mwa shikuma nikwamba kukwenu ngayi, wubi nimwawo na lihandu nimwalyo bikayatiwila.

²⁹ Ngoboni ou ukuhandula Moyo wa Kuyela kukayatiliwa wufwako, niye ukekala na mulandu wa wubi wa mwaya myaka.”

³⁰ (Yeshu wambile ebye ndaba bantu bamo bambile ngayi, “Uli na mayimbwe.”)

Bamandiyendi Yeshu na bakonzobendi

³¹ Niho kwezile bamandiyendi Yeshu na bakonzobendi, bemanine ha munkanda wa litala, pe batumine muntu mukati na kumwihana.

³² Likunge lya bantu ekalile nabo mukati bambile kukwendi ngayi, “Bamandiyobe na bakonzobobe bali ha munkanda, ba kukushinga.”

³³ Pe Yeshu waba kumbwile ngayi, “Kati bamawa na bakonzobami banengi bayani?”

³⁴ Niho atilaminine kuli bayo ekalile nabo mukati, pe wambile ngayi, “Aba nibo bamawa na bakonzobami.

³⁵ Ndaba muntu nimwendi ukutenda shamutima wa Nyambi, niye mukonzowami na mpanzami na bamawa.”