Mako 2 - Libuka Lya Kuyela

Yeshu ukunyongomanisha mulume wa kalepa

¹ Kunyima ya matena amashe, Yeshu wabokele ku Kapenauma, bantu bayuvwile ngayi Yeshu naboko uli ku litala lyabo.

² Bantu babengi bakungulukile na kwinzalisha liyo litala, kami kwabulile mwanya wakupitila ndaba bantu benzalile na mu shipana. Yeshu washimikilile lizu kukwabo.

³ Niho kwezile balume banaa hinga bashimba mulume wa kalepa ha wulili.

⁴ Kaliha batweshele kumu kumisha kuli Yeshu ndaba ya likunge lya bantu. Nohobene bakandamine na ku yambulula hayilu ya litala haya ekalilile Yeshu. Oho batubwile litubwa bashezumwishililemo uyo mulume wa kalepa hinga alangana ha wulili wendi.

⁵ Yeshu wamonene kukulupila kwabo, wambile ku mulume wa kalepa ngayi, “Mwanami, wubi wobe unayatiwili.”

⁶ Ngoboni bakakulongesha ndayano bamo bekalile kuyo, bangungutilenga mu mitima yabo na kwamba ngayi,

⁷ “Bishini ou muntu akwambila nehe? Elye lihandu! Yani ukutwesha kuyatila wubi, kaliha Nyambi tuhu ndi?”

⁸ Wanguwangu Yeshu walimukile moyo wendi ngayi bekalile na kungunguta mu mutima, wambile kukwabo ngayi, “Ndaba ngani mu kuhanganika byuma ebye mu mitima yenu?

⁹ Shawangu shiti, kwamba ku nou mulume wa kalepa ngayi, ‘Wubi wobe unayatiwili’ hinge ngayi, ‘Katuka ushimbe wulili wobe wende?’

¹⁰ Haya nikumimonesha mwanga mulimuke ngayi, Mwana Muntu uli na ngovu hano hanci za kuyatila wubi.” Niho ambile ku mulume wa kalepa ngayi,

¹¹ “Nikwamba kukwobe ngayi, katuka, shimba wulili wobe uye ku litala lyobe!”

¹² Oho bantu nimwabo hibamona, uya mulume wakatukile, washimbile wulili wendi, pe wanguwangu watutikile. Nohobene bantu nimwabo bakomokele kami bayemezele Nyambi, hibamba ngayi, “Hinga twatanga shilolo tumone shuma shanehe!”

Yeshu ukwihana Levi

¹³ Yeshu kami wabokele ku shibumbo sha Liziba lya Ngalileya. Likunge lya bantu lyezile kukwendi, niho atatikile kubalongesha.

¹⁴ Oho Yeshu apitilenga, wamonene Levi mukakutelesha, mwana Alufweya hinga ekala mu litala lya kuteleshela. Wambile kukwendi ngayi, “Nkonke.” Levi wakatukile wamukonkele.

¹⁵ Munyima yanebye Yeshu wekalile na kulya mu litala lya Levi. Bakakutelesha babengi na bakawubi bamukonkele, wingi wabo bekalile nendi hamo na bandongesha bendi.

¹⁶ Baka ku longesha ndayano baya bengile Bafwalishi oho bamonene Yeshu halya hamo na bakakutelesha na bakawubi, bepwile bandongesha bendi ngayi, “Shumangani akulila na kunwa hamo na bakakutelesha na bakawubi?”

¹⁷ Yeshu oho ayuvwile eshe, waba kumbwile ngayi, “Bantu banzimba kushinga nganga bafwako ndele bakakukola tuhu. Kaliha nezile mukwihana bakakwoloka, ngoboni mukwihana bakawubi ngayi batenguluke.”

Liyipu lya ha kuzila kulya

¹⁸ Shikati shamina bandongesha ba Yowano Mukakuzubilisha na Bafwalishi bazililenga kulya. Bantu bamo bezile na kwipula Yeshu ngayi, “Shuma ngani bandongesha ba Yowano na bandongesha ba Bafwalishi bazilanga kulya, ngoboni bandongesha bobe kuzila kulya bafwako?”

¹⁹ Yeshu wakumbwile ngayi, “Kati bahoni ba mukashinawenga ba kutwesha kuzila kulya oho mukashinawenga ushili nabo ndi? Oho mukashinawenga ushili nabo kuzila kulya bafwako.

²⁰ Ngoboni shikati shikeza oho mukashinawenga akafumishiwa kukwabo, nohoboni bakazile kulya.

²¹ “Kowa muntu wakutopeka shitabu shashipya ha shivwalo sha mwaka, ndaba shitabu shashipya shikatabula sha mwaka, pe litubwa likendelela.

²² Kami kowa muntu wakulongela waine yayipya mu ntesho ya mwaka. Ndi muntu ukwinga noho, pe waine yayipya yikatabula ntesho, kami waine yikayitika na ntesho yikabipa. Ngoboni waine yayipya yayakiwanga mu ntesho yayipya.”

Liyipu lya ha Mutena Wakukatala

²³ Yeshu wapitile mu mafuba a loto ha Mutena Wakukatala. Bandongesha bendi oho bendelenga nendi, batatikile kupulula loto.

²⁴ Bafwalishi bambile kukwendi ngayi, “Mona, ndabangani bandongesha bobe ba kutenda eshe sha kubula ku fwanina ha Mutena Wakukatala?”

²⁵ Yeshu wambile kukwabo ngayi, “Hinga mwatanga shilolo mulabe eshe atendele Ndavita shikati shiyo oho akalikizile na kushinga kulya ndi? Ndavita na bantu bendi bekalile na nzala.

²⁶ Niye wenginine mu Litala lya Nyambi na kulya mankende ayo atupuliwile kuli Nyambi. Eshe shengile shikati oho Ambiyatale hinga enga Mukulwane wa Bakankombela Nimwabo. Kuya na ndayano, ndele bakankombela tuhu nibo bafwanina kulya mankende awa. Ngoboni Ndavita walile kami wapanineko na bantu bendi.”

²⁷ Yeshu wamanishile na kwamba ngayi, “Mutena Wakukatala watendiwilile muntu, kaliha muntu walengiwilile Mutena Wakukatala.

²⁸ Nohobene Mwana Muntu niye Mwene wa Mutena Wakukatala.”