Mako 16 - Libuka Lya Kuyela

Kushanguka kwa Yeshu

¹ Mutena Wakukatala oho wapitile, Maliya waku Mangandalena na Shalome na Maliya manda Yakoba balandile mazi a lukumba akunuka shiwahe ngayi bakawabishe mutuntu wa Yeshu.

² Ha mutena wakutatika wa Shunda, bayile ku shinzimbi lumenemene ha kututika kwa mutena.

³ Oho bayilenga bambilenga ngayi, “Kati ou ukatwandumwina liya limanya lili ku shipana sha shinzimbi yani?” (Lyengile limanya lyalinene shikuma.)

⁴ Ngoboni oho batilaminine, bamonene ngayi linandumukuho.

⁵ Oho benginine mu shinzimbi, bamonene ndumbana wavwalile shivwalo shashitali sha kutuba, hinga ekala ku mbalila ya shilyo, pe batinine shikuma.

⁶ Ndumbana wambile kukwabo ngayi, “Hinga mutina, muli na kushinga Yeshu waku Nazaleta ou wakolekiwa. Unashanguku, muno mowa! Monenu, omu nimo bamulangikile.

⁷ Haya yenunga mukatongweze bandongesha bendi na Pita ngayi, ‘Niye unalimeneke ku Ngalileya, kuyo niko mukamumona, ngonehe amitongwezele.’ ”

⁸ Hohobene bambuyama bafumine mu shinzimbi, betukile ndaba bekalile na bowa, pe bakankile. Nohobene kaliha bambile shamina ku muntu ndaba batinine. [

Yeshu ukulimonekesha kuli Maliya waku Mangandalena

⁹ Oho Yeshu ashangukile ha mutena wakutatika wa Shunda, watatikile kulimonekesha kuli Maliya waku Mangandalena ou afumishile mayimbwe mutanu na abili.

¹⁰ Niho ayile na kutongweza aba bekalilenga na Yeshu, baya bayenene kami balililenga.

¹¹ Ngoboni nibo, oho bayuvwile ngayi Yeshu wamumi, kami unalimonekeshe kuli Maliya, babulile kumukulupila.

Yeshu ukulimonekesha ku bandongesha babili

¹² Niho kami Yeshu alimonekeshele na shifwekesha shashenge ku bandongesha bendi babili, oho bendelenga mu nzila na kuya ku tuminzi.

¹³ Baya bandongesha babokele na kutongweza bandongesha bamina, ngoboni nibo kaliha baba kulupilile.

Yeshu ukulimonekesha ku balikumi na umo

¹⁴ Ku mamaninino Yeshu walimonekeshele ku balikumi na umo oho bekalile na kulya. Wabakalihilile ndaba ya kubula kukulupila na wukalu wa mitima yabo, ndaba babulile kukulupila aba bamumonene kunyima ya ku shanguka kwendi.

¹⁵ Yeshu wambile kukwabo ngayi, “Yenunga mukaye nimwamo mu kashimikile ncango zaziwahe ku bantu nimwabo.

¹⁶ Muntu nimwendi ukakulupila na kuzubilishiwa ukapuluka, ngoboni wakubula kukulupila ukayatiwa.

¹⁷ Ebye bimonekesho nibyo bikakonka aba bakakulupila, bakafumisha mayimbwe mu lizina lyami, bakamba na zindimi zazipya,

¹⁸ ndi bakakatula mayoka hinge ndi bakanwa bya kufwana kuka baletela wukalu bifwako. Bakakambika maboko abo ha bakakukola, pe bakanyongomana.”

Yeshu ukutwaliwa kuyilu

¹⁹ Oho Mwene Yeshu amanine kwamba nabo, watwaliwile muyilu, pe wekalile ku liboko lya shilyo lya Nyambi.

²⁰ Niho bandongesha bayile na ku shimikila byambo ku zimbalila nimwazo, kami Mwene watendele milimo hamo nabo, washumishile lizu na bimonekesho biya byekalileko.]