Mako 14 - Libuka Lya Kuyela

Bihanganiko bya kubeba Yeshu

¹ Oho kwashalile matena abili ngayi batende Shimbo sha Kupitilila na sha Mankende A kubula Mumena, bakankombela ba bakulwane na bakakulongesha ndayano, bashingilenga nzila mwakukwatila Yeshu na ku shoshoka ngayi bamuzihe.

² Bambile ngayi, “Hinga shitendiwa ha mutena wa Shimbo, ndaba bantu ba kutwesha kuleta mushunga.”

Yeshu ukuwabishiwa ku Mbetani

³ Yeshu wekalile mu Mbetani mu litala lya Shimoni ou wekalile na bimakwa. Oho ekalile na kulya, mbuyama wezile na mushashi wakwinzala na mazi a nandi akunuka shiwahe a ndando yayinene. Wapabwile mushashi, niho ayitilile mazi ha mutwe wa Yeshu.

⁴ Bantu bamo bekalile kuyo bapilamine, pe bambile ku umo na wamina ngayi, “Ndaba ngani akuyandisha awa mazi a lukumba?

⁵ Akutwesha kulandishiwa na ndando ya kupitakana myanda yihatu ya muwayawaya wa shiliva, mwanga mali apanikiwe ku bakakushepwa.” Niho bakalihilile uya mbuyama shikuma.

⁶ Ngoboni Yeshu wambile ngayi, “Mulehenu! Bishini mu kumuyandishila? Unatende shuma shashiwahe kukwami.

⁷ Ndaba bakakushepwa muli nabo, kami shikati nimwasho mukushinga mu kutwesha kubatenda shiwahe, ngoboni ami kwikala nenu shikati nimwasho nifwako.

⁸ Unatende eshe akutwesha, unawabishi mazi lutu lwami kuluwahisha oho shilolo luyakiwe mu shinzimbi.

⁹ Mwa shikuma nikwamba kukwenu ngayi, oku zikashimikiwa eze ncango zaziwahe muno mu kaye nimwako, eshe anatende ou mbuyama shikashimikiwa, pe shikenga sha kumwanukila.”

Yundashi ukwitabila kubeba Yeshu

¹⁰ Niho Yundashi Ishikalyote, umo wa balikumi na babili ayile ku bakankombela ba bakulwane mu kubeba Yeshu kukwabo.

¹¹ Oho bayuvwile eshe, bawahililile, niho bamukulupishile ngayi ba kumupana mali. Nohobene, Yundashi washingilenga shikati sha kufwanina kupana Yeshu kukwabo.

Yeshu ukulya bya Shimbo sha Kupitilila na bandongesha bendi

¹² Ha mutena wakutatika wa Shimbo sha Mankende A kubula Mumena, mutena kwazihiwilenga mbelele wa Shimbo sha Kupitilila, bandongesha ba Yeshu bambile kukwendi ngayi, “Kuti oku ukushinga ngayi tuye na kuwahisha, mwanga ukalileko bya Shimbo sha Kupitilila?”

¹³ Niho Yeshu atumine bandongesha bendi babili, wambile kukwabo ngayi, “Yenunga mu munzi, mu kulihangana na mulume hinga ashimba ntesho ya mema. Mukonkenu,

¹⁴ pe oku nimwako akengina, mukambe kuli mwine litala ngayi, ‘Mulongeshi unamba ngayi, kati litala lya bayeni oku nikalila bya Shimbo sha Kupitilila na bandongesha bami, lilikuti?’

¹⁵ Niye ukamimonesha litala lyalinene lya kuyilu, linawahishiwi mwaka, kami muli byuma bya kuliyavwisha, muyo nimo mukatuwahishila nimwabyo.”

¹⁶ Bandongesha bendi bayile, benginine mu munzi, pe bawanine nimwabyo ngonehe abatongwezele Yeshu. Niho bawahishile byakulya bya Shimbo sha Kupitilila.

¹⁷ Ku mazolo, Yeshu wezile na bandongesha balikumi na babili.

¹⁸ Kami oho bekalile na kulya ku tebulu, Yeshu wambile ngayi, “Mwa shikuma nikwamba kukwenu ngayi, umo kukwenu ukambeba, ou ukulya hamo nami.”

¹⁹ Niho bayenene, pe umo na umo wamwipwile ngayi, “Kampe ami ndi?”

²⁰ Yeshu wakumbwile ngayi, “Umo ku nenu balikumi na babili, ou ukutanta linkende na nami mu lulonga.

²¹ Mwana Muntu ukafwa ngonehe kwatikitiwa byendi, ngoboni makando wendi uya muntu ukubeba Mwana Muntu. Shashiwahe shinga ngayi uya muntu kaliha wahemuwile!”

Mulalilo wa Mwene

²² Oho balilenga, Yeshu watolele linkende, wakambililile kuli Nyambi, walipabwile, pe wapanikile bandongesha bendi wambile ngayi, “Tambulenu mulye, olu nilo lutu lwami.”

²³ Niho kami atolele nkomoki, oho amanishile kukambilila kuli Nyambi, wabapanikileyo, niho banwinemo nimwabo.

²⁴ Wambile kukwabo ngayi, “Owe niwo mukeza wami wakulimama kwakupya ou unetikili babengi.

²⁵ Mwa shikuma nikwamba kukwenu ngayi, ku kanwa kami bya mikabo ya mikolobozi ya shinyanca nifwako, hantu ha mutena uyo oho nikanwa byabipya mu Wene wa Nyambi.”

²⁶ Oho bamanishile kwimbila lwimbo, niho batutikile bayile ku lipili lya mitondo ya Olive.

Yeshu ukulubulula ngayi Pita ukamukana

²⁷ Yeshu wambile kukwabo ngayi, “Nimwenu mukantina, ndaba kwatikitiwa ngayi, ‘Nyambi ukakama mulishani, pe bambelele bakapanzana.’

²⁸ Ngoboni munyima ya ku shanguka, nikaya kumbili yenu ku Ngalileya.”

²⁹ Pita wamukumbwile ngayi, “Hinge ndi nimwabo bakatina, ami nifwako!”

³⁰ Yeshu wambile kuli Pita ngayi, “Mwa shikuma nikwamba kukwobe ngayi, wushiku unobene, oho likombwe shilolo likuwe kabili, obe ukankana kahatu.”

³¹ Ngoboni Pita wambile shikuma ngayi, “Kukakukana nifwako, hinge kufwa tukafwa hamo.” Bandongesha nimwabo bambile nahiyo.

Yeshu ukulombela mu Ngeteshemani

³² Oho bakumine ku mbalila yikutumbiwa Ngeteshemani, Yeshu wambile ku bandongesha bendi ngayi, “Yikalenu kuno, nishili kuya na kulombela.”

³³ Washimbile Pita na Yakoba na Yowano wayile nabo. Yeshu watatikile kuyena shikuma na kukalikiza.

³⁴ Wambile kukwabo ngayi, “Moyo wami unayene shikuma kutwala ku kufwa. Yikalenu kuno, kami tonenu.”

³⁵ Niho ayile kumbili shashishe, wawililile hanci, pe walombelele ngayi, ndi shikutwesheka, shiya shikati sha makando hinga shiza kukwendi.

³⁶ Kami walombelele ngayi, “Tate, Tate! Byuma nimwabyo bikutwesheka kukwobe, fumisha eye nkomoki ya makando kukwami, ngoboni hinga kutendiwa ebye nikushinga, kutendiwe shamutima wobe.”

³⁷ Niho abokele, wabawanine bali mu tulo, wambile kuli Pita ngayi, “Obe Shimoni, uli mu tulo ndi? Kati kutwesha kutona hinge shikati shimo wufwako ndi?

³⁸ Tonenu na kulombela kutina mwingina mu byezeko. Moyo hiwushinga, ngoboni lutu lunapopo.”

³⁹ Niho ayile kami na kulombela, wambile mazu amo.

⁴⁰ Oho abokele kami, wabawanine bali mu tulo, ndaba meho wabo engile amalemu. Pe kaliha balimukile mwakumukumbwila.

⁴¹ Wezile kami kawuhatu, wambile kukwabo ngayi, “Kati nihano mushili mu tulo na kuliyuvwilila ndi? Kunamana! Shikati shakumakale! Monenu, Mwana Muntu uli na kupanikiwa mu maboko a bakawubi.

⁴² Katukenu, tuyenunga. Monenu, niye ukambeba uli hahepi!”

Kukwatiwa kwa Yeshu

⁴³ Wanguwangu Yeshu oho ushili kwamba, Yundashi umo wa balikumi na babili wakumine. Pe wezile na likunge lya bantu bashimbile mikwale na mishako, bafumine ku bakankombela ba bakulwane na bakakulongesha ndayano na bakulwane ba Bayunda.

⁴⁴ Ou wamubebele, wabatongwezele shilimukisho ngayi, “Ou nikazupeza niye muntu mukushinga. Pe mumukwate na kumutwala hinga mwamulama shiwahe.”

⁴⁵ Wanguwangu oho Yundashi akumine, wayile kuli Yeshu, pe wambile ngayi, “Hekulu!” Niho amuzupezele.

⁴⁶ Pe bantu bakwatile Yeshu, niho bamumangile.

⁴⁷ Ngoboni umo ku baya bemanine kuyo, wahomwene mukwale wendi, wakamine ndungo wa Mukulwane wa Bakankombela Nimwabo, pe wamuketwile litu.

⁴⁸ Yeshu wambile kukwabo ngayi, “Munezi na mikwale na mishako mu kunkwata ngo nili mwizi ndi?

⁴⁹ Nekalile hakati kenu matena nimwawo na ku longesha mu Litala lya Nyambi, ngoboni kaliha mwankwatile. Haya byatikitiwa binafwanini kutendiwa.”

⁵⁰ Niho bandongesha bendi nimwabo bamushiyile, pe batinine.

⁵¹ Ndumbana wamina ou walimangile tuhu shitango sha kulelema, wakonkelenga Yeshu. Bashingile kumukwata,

⁵² ngoboni wetukile muhelengwa ku shiya shitango shendi.

Yeshu ukuyatishiwa

⁵³ Batwalile Yeshu kuli Mukulwane wa Bakankombela Nimwabo, kuyo kwakungulukile bakankombela ba bakulwane nimwabo na bakulwane ba Bayunda na bakakulongesha ndayano.

⁵⁴ Pita wamukonkelenga hahatali, kukuma na ku shinzanza sha Mukulwane wa Bakankombela Nimwabo. Wekalile hamo na bakakulama, hayota mundilo.

⁵⁵ Bakankombela ba bakulwane na bakankuta nimwabo bashingilenga wupaki wakuyata nawo Yeshu ngayi mwanga bamuzihe, ngoboni kaliha bawuwanine.

⁵⁶ Kami babengi bamubangilile bya mahalo, ngoboni ebye bambilenga, byalihwetele.

⁵⁷ Bamo bakatukile, bamubangilile ngayi,

⁵⁸ “Twamuyuvwile hamba ngayi, ‘Nikashiwula Litala lya Nyambi elye batendele na maboko, kami mu matena ahatu nikatenda lyamina lya kubula kutendiwa na maboko.’ ”

⁵⁹ Ngoboni hinge noho, ebye bambilenga byalihwetele.

⁶⁰ Mukulwane wa Bakankombela Nimwabo wemanine mukati, wepwile Yeshu ngayi, “Kati kukumbula kunebye bali na kwamba hahobe wufwako ndi?”

⁶¹ Ngoboni niye wamwenene, kaliha wakumbwile shamina. Kami Mukulwane wa Bakankombela Nimwabo wamwipwile ngayi, “Kati obe Kilishitu, Mwana Nyambi Wakutandala ndi?”

⁶² Yeshu wamukumbwile ngayi, “Amibene, kami mukamona Mwana Muntu hinga ekala ku liboko lya shilyo lya Mpandashilanga heza ha makumbi a muyilu.”

⁶³ Niho Mukulwane wa Bakankombela Nimwabo atabwile bivwalo byendi, wambile ngayi, “Bihi tushili kushinga wupaki wamina kami?

⁶⁴ Munayuvwu lihandu lyendi. Mukuhanganika nahiti?” Nimwabo bamuyatile ngayi afwe.

⁶⁵ Bamo batatikile kumufwizila mate, bamufwikile ku lupala, bamukamine, pe bambile ngayi, “Lubulula ou unakukama!” Kami bakakulama bamukamine zimbanda.

Pita ukukana Yeshu

⁶⁶ Oho Pita ekalile mu nceto mu shinzanza, kwezile mbuyama umo wa bakamilimo ba Mukulwane wa Bakankombela Nimwabo.

⁶⁷ Oho amonene Pita hayota mundilo, wamunconcomekele, niho ambile ngayi, “Nanobe kami wekalilenga na Yeshu waku Nazaleta.”

⁶⁸ Ngoboni Pita wakanine ngayi, “Kulimuka nifwako, kami ku yuvwishisha ebye ukwamba nifwako.” Niho ayile ku mazezelo a lipangati. Haya bene likombwe lya kuwile.

⁶⁹ Kuyo kami, mbuyama wa mukamulimo wamumonene, pe watatikile kwamba na baya bemanine kuyo ngayi, “Ou muntu naniye kami umo wabo!”

⁷⁰ Ngoboni Pita wakanine kami. Oho kwapitile kashikati kakashe, baya bemanine kuyo bambile na Pita ngayi, “Mwa shikuma uli umo wabo ndaba uli waku Ngalileya.”

⁷¹ Ngoboni Pita watatikile kulikuta na kulibeza ngayi, “Ou muntu mu kutoya kumulimuka nifwako!”

⁷² Wanguwangu likombwe lya kuwile ka wubili. Niho Pita anukile lizu liya ambile Yeshu kukwendi ngayi, “Oho likombwe shilolo likuwe kabili, obe ukankana kahatu.” Pe watatikile kulila.