Mako 13 - Libuka Lya Kuyela

Yeshu ukwamba bya ku shiwuka kwa Litala lya Nyambi

¹ Oho Yeshu afumine mu Litala lya Nyambi, umo wa bandongesha bendi wambile kukwendi ngayi, “Mulongeshi, tilamina awa mamanya eshe awaha naneye mitumbwe eshe yaneneha!”

² Yeshu wambile kukwendi ngayi, “Eye mitumbwe yayinene hiwuyimona ndi? Kowa limanya limo lili hayilu ya limanya lyamina, likabula kwandumukila hanci.”

Makando na malwa

³ Oho Yeshu ekalile ha lipili lya mitondo ya Olive hinga apenza ku Litala lya Nyambi, Pita na Yakoba na Yowano na Anduleu bamwipwile kwaninkayabo ngayi,

⁴ “Tutongweze shikati oho ebye bikatendiwa, kami shimonekesho shiti sha kulimukisha ngayi ebye nimwabyo bili hahepi na kutendiwa?”

⁵ Niho Yeshu ambile kukwabo ngayi, “Keyenu, kutina muntu wamina amyongeza.

⁶ Babengi bakeza mu lizina lyami, bakamba ngayi, ‘Ami Kilishitu!’ Pe bakongeza babengi.

⁷ Oho mukayuvwa bya nzita na mpupo ya zinzita, hinga mukalikekula, ndaba ebye binafwanini ku moneka, ngoboni mamaninino shilolo akume.

⁸ Ndaba litunga likafutukila litunga lyamina, kami wene wukafutukila wene wamina. Kukekala kukanka kwa litunga mu zimbalila zazingi, kami kukeza kapande. Ebye bikenga tuhu kutatika kwa makando.

⁹ “Ngoboni enu munafwanini kukeya. Bakamimanga na kumitwala mu zinkuta, pe bakamikama mu mashinangonge. Bakamitwala kumbili ya batulela na bamyene ndaba yami, ngayi shikenge wupaki kukwabo.

¹⁰ Nohobene, ncango zaziwahe zinafwanini ku shimikiwa ku bantu nimwabo oho mamaninino shilolo akume.

¹¹ Ngoboni oho bakamitwala na kumiyatisha, hinga mukalikekula na kulishoshota ngayi tukamba nahiti. Ngoboni shikati shakakuma mukambe nimwasho shiya akamitongweza Moyo wa Kuyela, ndaba niye ukamba mumwenu.

¹² Nohobene, muntu ukabeba kawushinda wendi ngayi azihiwe na tata muntu ukatenda noho kuli mwanendi, kami bana bakafutukila bahemi babo na ku bazihiwisha.

¹³ Kami enu mukazimbiwa ku bantu nimwabo ndaba ya lizina lyami, ngoboni ou ukazumanana kukuma ku mamaninino, niye ukapuluka.

Wunyengwe wakunonga

¹⁴ “Ngoboni oho mukamona wunyengwe wakunonga hinga wemana ha kubula ku fwanina.” (Niye ukulaba ayuvwishishe!) “Pe obo bali mu Yundeya, batinine ku mapili.

¹⁵ Kami ou uli hayilu ya litala lyendi, hinga ahuluka na kwingina mu litala ngayi ashimbemo shuma shamina.

¹⁶ Kami ou uli mu mfuba, hinga aboka ngayi akashimbe shivwalo shendi.

¹⁷ Makando wabo baya bakemita na baya bakayamwisha ha matena ayo.

¹⁸ Lombelenu kuli Nyambi ngayi ebye hinga bikatendiwa ha shikati sha mupepo.

¹⁹ Ndaba ha matena ayo, makalikiza akenga amanene kupitakana makalikiza nimwawo kufuma ku shikati oho Nyambi alengele byuma nimwabyo kuleta na ku shikati shino, kami kukekalako kumbili afwako.

²⁰ Ngoboni shinga Mwene wabulile kuketwila aya matena, shinga kowa muntu ukapuluka. Ndaba ya bakakuhatiwa aba anahata unaketwili aya matena.

²¹ “Shikati shiyo, ndi muntu ukamba kukwenu ngayi, ‘Monenu, Kilishitu uli kuno!’ Hinga ngayi, ‘Uli kuyo!’ Hinga mumukulupila.

²² Ndaba Bakilishitu ba mahalo na bamiluwe ba mahalo bakeza na ku monesha bimonekesho na bikomokesho ngayi bakashanwishe hinge bakakuhatiwa ndi shinga shikatwesheka.

²³ Haya keyenu, ndaba ninamitongweze ebye nimwabyo oho shilolo bitendiwe.”

Kwiza kwa Mwana Muntu

²⁴ Ngoboni ha matena ayo, kunyima ya makalikiza, mutena ukashipa, kami ngonda kukatuba wezi wendi wufwako,

²⁵ na nyenye zikawa, pe ngovu za muyilu zikankwancana.

²⁶ Nohobene bakamona Mwana Muntu heza mu makumbi na ngovu zazinene na wuwahe.

²⁷ Ukatuma mangeloyi bendi na kukungulula bakakuhatiwa bendi, ku zimbalila zinaa za hanci, kutatika kwakumina kaye kutwala kwakumina liyilu.

Shilongesha sha ha mutondo wa mukuyu

²⁸ “Lilongeshenu bya nguli ya ha mutondo wa mukuyu. Oho myahi yawo yikutundula na kuzobela mabizi, mu kulimuka ngayi mayinza ali hahepi.

²⁹ Nohobene nanenu oho mukamona ebye byuma bili na kutendiwa, limukenu ngayi shikati shili kwakwipi wuluno shikume.

³⁰ Mwa shikuma nikwamba kukwenu ngayi, mukoka ou kukamana wufwako hantu ebye nimwabyo binatendiwi.

³¹ Liyilu na hanci bikamana, ngoboni mazu wami kukamana afwako.”

Kowa muntu ukulimuka mutena hinge shikati

³² “Ngoboni mutena uyo hinge shikati shiyo kowa muntu ukulimuka, hinge mangeloyi ali muyilu hinge Mwana, ndele Tate tuhu niye ukulimuka.

³³ Keyenu, tonenu, kami lombelenu ndaba kulimuka shikati shakwiza mufwako.

³⁴ Shikenga ngo muntu ukuya mukala, ukushiya litala ku bakamilimo bendi, ukupanika muntu na muntu mulimo wendi, pe ukutongweza mukakulama ku shipana ngayi akeye.

³⁵ Nohobene, keyenu, ndaba kulimuka mufwako ngayi mwine litala ukeza shikati ngani. Ukutwesha kwiza shikati sha mazolo, hinge hakati ka wushiku, hinge malungashiku, hinge lumenemene.

³⁶ Ndi ukwiza mwakubazumwisha, hinga amiwana muli mu tulo.

³⁷ Ebye nikwamba kukwenu, nibyo nikwamba ku bantu nimwabo ngayi, keyenu!”