Mako 12 - Libuka Lya Kuyela

Nguli ya bandimi mu mfuba ya shinyanca

¹ Niho Yeshu atatikile kwamba kukwabo mu zinguli ngayi, “Muntu wamina wakunine mfuba ya shinyanca, wazingwilishileko limota, wakabile liteke lya kuzongela waine na ku tendelako katambo kakubingila. Niho ayakilemo bandimi, pe wayile ku litunga lya kwakutali.

² Oho shikati sha kubuya mikabo sha kumine, watumine mukamulimo wendi ku bandimi, ngayi akashimbeko ku mikabo ya mu mfuba ya shinyanca.

³ Ngoboni bamukwatile, pe bamukamine, niho bamutandile nahiya kwakubula shamina.

⁴ Niho atumine kami mukamulimo wamina naniye kami bamukamine na kumulemeka ku mutwe, pe bamuyuvwishile lisheni shikuma.

⁵ Watumine kami wamina, niho bamuzihile. Nohobene watumine bamina babengi, bamo bakamiwile na bamina bazihiwile.

⁶ Niho ashalile na mwana umo tuhu, ou ahakile shikuma. Ku mamaninino naniye kami wamutumine kukwabo, ndaba wahanganikile ngayi, ‘Bakapana maleema mwanami.’

⁷ Ngoboni baya bandimi balyambashanine ngayi, ‘Niye ncwana yendi owe. Yekenu tumuzihe, pe likona likenga lyetu!’

⁸ Niho bamukwatile, bamuzihile, pe bamuyumbilile ha munkanda wa mfuba ya shinyanca.

⁹ “Haya mwine mfuba ukatenda nahiti? Ukeza mu kunongesha baya bandimi na kupana mfuba ya shinyanca ku bamina.

¹⁰ Kati shilolo mulabe ebye byatikitiwa ngayi, ‘Limanya liya bakanine bakakutenda matala, nilyo linafutuku kwinga limanya lya ku shuma lya mu mbango.

¹¹ Eshe nisho anatende Mwene, kami shikukomokesha mu meho wetu.’ ”

¹² Bakakutwaminina ba Bayunda bashingile kukwata Yeshu, ndaba balimukile ngayi nibo atoyelenga muneye nguli. Ngoboni batinine likunge lya bantu, niho bamushiyile, pe bayile.

Liyipu lya ha kutela mutelo

¹³ Niho batumine kukwendi bamo ba Bafwalishi na bamo baka Helonda ngayi bamukwate na mazu wendi.

¹⁴ Pe bezile kukwendi na kwamba ngayi, “Mulongeshi, tukulimuka ngayi obe uli wa kupwisha, kami kulikekula ebye bakuhanganika bantu wufwako. Ndaba ukubula kuhota muntu, ngoboni uku longesha mu kupwisha nzila ya Nyambi. Kati shinafwanini kutela mutelo kuli Nkeshali ndi byo?

¹⁵ Tutele ndi hinga tubula kutela?” Ngoboni Yeshu walimukile ebye bahanganikilenga, wambile kukwabo ngayi, “Ndabangani muli na kunyezeka? Ndetelenu mali mwanga niwamone.”

¹⁶ Bamuletelele mali, niho ambile kukwabo ngayi, “Shifwekesha sha yani eshe shili ha mali? Kati lizina linatikitiwiho lya yani?” Bambile ngayi, “Bya Nkeshali.”

¹⁷ Yeshu wambile kukwabo ngayi, “Panikenu Nkeshali byuma bya Nkeshali, kami panikenu Nyambi byuma bya Nyambi.” Niho bakomokele byambo byendi.

Liyipu lya ha ku shanguka ku bafu

¹⁸ Niho Bashanduki baya bambanga ngayi kowa ku shanguka ku bafu, bezile kuli Yeshu, pe bamwipwile ngayi,

¹⁹ “Mulongeshi, Moshesha watikitile kukwetu ngayi, ‘Ndi yaya muntu unafu, ha ku shiya mukazendi kwa kubula bana, mukonzo wendi nafwanini ku yeka uya mfwile, ngayi abelekeleko yayiyendi bana.’ ”

²⁰ Kwekalile bana ba mutanu na babili, bengile ba muntu umo. Wa kutatika wayekele mukazi, ngoboni wafwile kwakubula ku shiya bana.

²¹ Wa wubili wayekele uya mfwile, ngoboni naniye wafwile kwakubula bana. Wa wuhatu kami naniye wafwile kwakubula bana.

²² Pe ba mutanu na babili nimwabo bamuyekele, bafwile kwakubula ku shiya bana. Kunyima yabo na uya mukazi kami wafwile.

²³ Nohobene, oho bakashanguka ku bafu, uya mukazi ukenga wayani? Ndaba ba mutanu na babili nimwabo bamuyekele.

²⁴ Yeshu wakumbwile kukwabo ngayi, “Nohobene nka munayongo ndaba kulimuka byatikitiwa mufwako hinga ngovu za Nyambi.

²⁵ Ndaba oho bakashanguka ku bafu, kukayeka hinge kukayekiwa bafwako, ngoboni bakenga nehi mangeloyi a muyilu.

²⁶ Ha bya bafu na ku shanguka kwabo, kati shilolo mulabe mu libuka lya Moshesha oho amutongwezele Nyambi mu lipukumuna ngayi, ‘Ami Nyambi wa Abulahama, Nyambi wa Ishaki na Nyambi wa Yakobo?’

²⁷ Kaliha niye Nyambi wa bafu, ngoboni Nyambi wa babomi. Nohobene munayongo shikuma.”

Ndayano zazinene

²⁸ Umo wa bakakulongesha ndayano ou wekalileko oho bambilenga, wayuvwile ngayi Yeshu wunakumbulu Bashanduki shiwahe, wepwile ngayi, “Kati ndayano zazinene ku nimwazo ziti?”

²⁹ Yeshu wakumbwile ngayi, “Ndayano zazinene ku nimwazo zenga eze, ‘Yuvwilila, Obe Ishalela! Nyambi ya Ngula, Nyambi yetu wenga umo pele.

³⁰ Haka Nyambi ya Ngula, Nyambi yobe na mutima wobe nimwawo na moyo wobe nimwawo, na ngana zobe nimwazo na ngovu zobe nimwazo.’

³¹ Za wubili zenga eze, ‘Haka ndambo yobe ngonehe walihaka obe mwine.’ Kowa ndayano zamina zazinene za kupitakana eze.”

³² Mukaku longesha ndayano wambile kuli Yeshu ngayi, “Mulongeshi unamba kupwisha, ndaba kuli tuhu Nyambi umo pele, kami kowa wamina ndele tuhu niye.

³³ Kami muntu unafwanini kumuhaka na mutima nimwawo na ngana nimwazo na moyo nimwawo na ngovu nimwazo, kami unafwanini ku haka ndambo yendi ngonehe alihaka niye mwine, eshe shikupitakana nimwazo zintupu za kuhokesha na zinkombela.”

³⁴ Oho Yeshu amonene ngayi unakumbulu na ngana, wambile kukwendi ngayi, “Kaliha uli kwakutali na Wene wa Nyambi.” Kufuma hayo, kaliha kwekalile muntu wepwile Yeshu shamina.

Kilishitu wenga Mwana yani?

³⁵ Oho Yeshu alongeshelenga mu shipango sha Litala lya Nyambi, wambile ngayi, “Kati bakakulongesha ndayano bakwamba nahiti ngayi Kilishitu wenga waku muhoko wa Ndavita?

³⁶ Ndaba Ndavita niye mwine oho wamutwamininine Moyo wa Kuyela, wambile ngayi, ‘Mwene wambile kuli Mwene yami ngayi, yikala ku liboko lyami lya shilyo, hantu nafutulu bamalamo bobe kwinga shipona sha kulyata mawulu wobe.’

³⁷ Ndavita niye mwine wamutoyele ngayi, ‘Mwene,’ haya ukwinga mwanendi nahiti?” Likunge lyalinene lyamuyuvwile na ku wahilila.

Yeshu ukunyanca bakakulongesha ndayano

³⁸ Oho alongeshelenga, Yeshu wambile ngayi, “Keyenu na bakakulongesha ndayano. Aba bahaka kwenda hinga bavwala bivwalo byabitali, ba kushangwishiwa mu myanya ya kulandishila,

³⁹ na kwikala ha bipona bya kumbili mu mashinangonge na ku myanya ya maleema ku bimbo bya mayambwayambwa.

⁴⁰ Bakuyibila bakazi ba bamfwile byuma byabo, kami ba kulyongeza na malombelo amatali. Bantu banoho bakatambula kashushwilo kakanene.”

Ntupu ya mfwile

⁴¹ Yeshu wekalile hahepi na shikongelo sha mu Litala lya Nyambi, watilaminine bantu oho bayakilengamo mali. Babengi bakakuheta bayakilengamo mali amengi.

⁴² Kwezile mukazi wakushepwa, ou wengile mfwile naniye wayakilemo tumali twatushe tubili twa kopa.

⁴³ Nohobene Yeshu wehanine bandongesha bendi, wambile kukwabo ngayi, “Mwa shikuma nikumitongweza ngayi, ou mukazi wakushepwa wa mfwile, unayaka byabingi mu shikongelo kupitakana aba nimwabo banayakamo.

⁴⁴ Ndaba bamina banayakamo bimo bya wuheti wabo wawingi, ngoboni niye, mu kushepwa kwendi nimwako, unayaka nimwabyo ekala nabyo, ebye afwanina kuliyoyesha nabyo.”