Mako 11 - Libuka Lya Kuyela

Yeshu ukwingina mu Yelushalema

¹ Oho bahenyenene ku Yelushalema, bezile kwakwipi na minzi ya Mbetefwange na Mbetani, ku lipili lya mitondo ya Olive. Yeshu watumine bandongesha bendi babili,

² wambile kukwabo ngayi, “Yenunga ku munzi uli kumbili yenu, oho mukenginamo, mukawana mwana mbongolo namangiwi, uya wabula kuliyavwishiwa ku muntu. Mukamushobole, pe mumulete kuno.

³ Ndi muntu ukamipula ngayi ndabangani mukutenda noho, mukambe ngayi Mwene uli na kumushinga, wuluno amubweshe.”

⁴ Pe bayile, bawanine mwana mbongolo namangiwi ku shipana sha litala ku nkumo ya mukwakwa, niho bamushobolwele.

⁵ Bamo baya bemanine kuyo, bambile kukwabo ngayi, “Mukutenda bishini nanowo mbongolo muli na ku shobola?”

⁶ Bandongesha bambile kukwabo ngonehe abatongwezele Yeshu. Bayo bantu niho babalehele ngayi baye nendi.

⁷ Baletele mwana mbongolo kuli Yeshu, pe bantu bayalile bivwalo byabo ha mbongolo, niho Yeshu akandamineho.

⁸ Bantu babengi bayalile bivwalo byabo mu nzila, bamina batemene myahi ya mitondo ya mu mafuba bayiyalile mu nzila.

⁹ Bantu bekalile kumbili yendi na baya bezilenga munyima, batatikile kubilikiza ngayi, “Hoshana! Uli na mfuywezi ou ukwiza mu lizina lya Mwene!

¹⁰ Kulemeshiwe kwiza kwa wene wa tatiyetu Ndavita! Hoshana muyilu ya mayilu!”

¹¹ Yeshu wenginine mu Yelushalema, niho ayile mu Litala lya Nyambi. Watilaminine byuma nimwabyo, ngoboni ndaba ya ku mona ngayi mutena walelakale, wafuminemo wayile ku Mbetani hamo na bandongesha likumi na babili.

Yeshu ukukuta mutondo wa mukuyu

¹² Oho kwashile, ha kufuma ku Mbetani, Yeshu wekalile na nzala.

¹³ Wamonene mutondo wa mukuyu na mabizi awo hahatali. Wayileko mu ku mona ndi ukuwanako mikabo, ngoboni oho akumineko, kaliha wawanineko mikabo ndele mabizi tuhu. Ndaba shikati sha kuhoka kwa nkuyu kaliha sha kumine.

¹⁴ Niho ambile ku mutondo uyo ngayi, “Hinga kukekala muntu wakulyako mikabo yobe kami!” Bandongesha bendi bayuvwileko.

Yeshu ukutanda bakakulandishila mu Litala lya Nyambi

¹⁵ Oho bakumine mu Yelushalema, Yeshu wenginine mu Litala lya Nyambi, pe watatikile kutanda bayo balandishilenga na bayo balandilenga. Wawishilile zitebulu hanci za bakakutambashana mali na bipona bya bayo balandishilenga bankilimba.

¹⁶ Kaliha wetabilile ngayi muntu apite mu shipango sha Litala lya Nyambi hinga ashimba shamina.

¹⁷ Pe wabalongeshele ngayi, “Kati kaliha kwatikitiwile ngayi, ‘Litala lyami likatumbiwa ngayi litala lya malombelo lya bantu ba matunga nimwawo ndi?’ Ngoboni enu munalifutulu kwinga liteke lya bezi.”

¹⁸ Baka ku longesha ndayano na bakankombela ba bakulwane oho bayuvwile eshe, bashingile nzila ya kuzihilamo Yeshu. Bamutinine, ndaba likunge lya bantu nimwabo bakomokele ku longesha kwendi.

¹⁹ Oho kwengile mazolo, Yeshu na bandongesha bendi bafumine mu Yelushalema.

Shilongesha sha ha mutondo wa mukuyu

²⁰ Kwashile lumenemene, oho bapitilenga mu nzila bamonene mutondo wa mukuyu unayumu nimwawo kukuma na ku mipishi yawo.

²¹ Niho Pita anukile, wambile ngayi, “Hekulu, mona mutondo wa mukuyu uya wakuta unayumu!”

²² Yeshu waba kumbwile ngayi, “Yikalenu na kukulupila muli Nyambi.

²³ Mwa shikuma nikwamba kukwenu ngayi, muntu nimwendi ukamba ku lipili elye ngayi, ‘Katuka uliyumbile mu liwate,’ kami hinga abula nkani mu mutima wendi, ngoboni ukukulupila ngayi eshe anamba shikatendiwa, pe ukapanikiwa noho.

²⁴ Nohobene nikwamba kukwenu ngayi, nimwasho mukanyepa mu malombelo, kulupilenu ngayi munashitambulu, kami shikenga shenu.

²⁵ Kami oho mukwimana na kulombela, ndi muli na shambo na muntu wamina mumuyatile, ngayi mwanga Tatiyenu wa muyilu, amiyatile milandu yenu. [

²⁶ Ngoboni ndi mu kubula kuyatila, kami Tatiyenu wa muyilu ukabula kumiyatila milandu yenu.”]

Liyipu lya ha ngovu za Yeshu

²⁷ Babokele kami mu Yelushalema. Oho Yeshu endelenga mu shipango sha Litala lya Nyambi, bakankombela ba bakulwane na bakakulongesha ndayano na bakulwane ba Bayunda bezile kukwendi,

²⁸ pe bamwipwile ngayi, “Kati ukutenda byuma ebye na ngovu ngani? Kami yani wakupanine eze ngovu za kutenda byuma ebye?”

²⁹ Yeshu wakumbwile kukwabo ngayi, “Nami nikumipula liyipu limo, ndi mu kunkumbula, pe nikamitongweza eze ngovu nikutenda nazo byuma ebye.

³⁰ Kati kuzubilisha kwa Yowano, kwafumine muyilu, ndi kwafumine ku bantu? Nkumbulenu.”

³¹ Niho batatikile kulikananganisha mukati kabo ngayi, “Ndi tukwamba ngayi, ‘Kwafumine muyilu,’ pe niye ukatwipula ngayi, ‘Ndaba ngani mwabulile kumukulupila?’

³² Ngoboni ndi tukwamba ngayi, ‘Kwafumine ku bantu’ (Batinine, ndaba bantu nimwabo balimukile ngayi mwa shikuma Yowano wengile muluwe.”)

³³ Bakumbwile Yeshu ngayi, “Kulimuka tufwako.” Yeshu wambile kukwabo ngayi, “Nami kami kumitongweza eze ngovu nikutenda nazo byuma ebye nifwako.”