Mako 10 - Libuka Lya Kuyela

Yeshu uku longesha ha bya kuziha maluwo

¹ Yeshu washiyile mwanya uyo, wayile ku litunga lya Yundeya mu nciza ya Mushinzi wa Yondana. Kami makunge a bantu bakungulukile kukwendi. Ngonehe shiheka shendi, watatikile kubalongesha.

² Niho Bafwalishi bamo bezile kukwendi mu kumwezeka, bamwipwile ngayi, “Kati ndayano zikwitabilisha ngayi mulume azihe maluwo ndi?”

³ Yeshu wakumbwile ngayi, “Kati Moshesha wamipanikile ndayano ngani?”

⁴ Bambile ngayi, “Moshesha wetabilile ngayi mulume atikite liñwati lya ku ziha maluwo na ku lubula mukazendi.”

⁵ Yeshu wakumbwile ngayi, “Ndaba ya wukalu wa mitima yenu, niho Moshesha atikitile ndayano eze.

⁶ Ngoboni kufuma ku kutatika oho Nyambi alengele byuma nimwabyo, ngonehe kwatikitiwa ngayi, ‘Wabalengele mulume na mukazi.’

⁷ ‘Ndaba ya neshe, mulume ukashiya tatiyendi na mandiyendi na ku kowamina mukazendi,

⁸ ngayi babili bafutuke kwinga lutu lumo.’ Nohobene hibafwako kukenga babili, ngoboni bakenga lutu lumo.

⁹ Nohobene, eshe Nyambi anawaniki hamo, muntu hinga akashitapulula.”

¹⁰ Oho bekalile kami mu litala, bandongesha bepwile Yeshu ha shambo eshe.

¹¹ Wambile kukwabo ngayi, “Mulume nimwendi ukaziha maluwo, pe ha kuyeka wamina, ukutenda wunjenge, kami uli na mulandu kuli mukazendi.

¹² Kami mukazi ndi ukuziha maluwo, pe ha kuyekiwa ku wamina, ukutenda wumambe.”

Yeshu ukutandalisha batwanuke babashe

¹³ Bantu bamo baletele kukwendi batwanuke babashe ngayi abakambike maboko, ngoboni bandongesha bakalihilile baya babaletele.

¹⁴ Oho Yeshu amonene eshe shatendiwile, wapilamine niho ambile ku bandongesha bendi ngayi, “Lehenu batwanuke babashe beze kukwami, hinga mubakanisha, ndaba Wene wa Nyambi wa baya bakufweka ngo aba.

¹⁵ Mwa shikuma nikwamba kukwenu ngayi, muntu nimwendi ukubula kutambula Wene wa Nyambi ngonehe kanuke wamushe, kukenginamo wufwako.”

¹⁶ Niho aba bumbatilile na kukambika maboko wendi hahabo, pe wabafuywelele.

Mulume wakuheta

¹⁷ Oho Yeshu akatukile ngayi aye, kwezile mulume lubilo na kufunkama manungo ku meho wendi, wamwipwile ngayi, “Mulongeshi wamuwahe, niku fwanina kutenda nahiti ngayi nikone wumi wa mwaya myaka?”

¹⁸ Yeshu wambile kukwendi ngayi, “Ndabangani ukuntumba ngayi wamuwahe? Kowa wamuwahe ndele Nyambi tuhu pele.

¹⁹ Ukulimuka ndayano ngayi, ‘Hinga uziha, hinga utenda wumambe, hinga uyiba, hinga upaka mahalo, hinga wongeza, lemeeka tatiyobe na mandiyobe.’ ”

²⁰ Uya mulume wakumbwile ngayi, “Mulongeshi, ebye nimwabyo nabilama kufuma kuwanuke wami.”

²¹ Yeshu wamutilaminine, wamuhakile, pe wambile kukwendi ngayi, “Unabulu shuma shimo, yanga ukalandishe nimwabyo ebye ulinabyo, mwanga upanike mali ku bakakushepwa, pe ukekala na wuheti muyilu. Niho wize unkonke.”

²² Ngoboni uya mulume oho ayuvwile lizu elye, lupala lwendi lwahombele, wayile hinga ayena ndaba wekalile na wuheti wawingi shikuma.

²³ Niho Yeshu apenzele ku bandongesha bendi, wambile kukwabo ngayi, “Shashikalu ku bakakuheta kwingina mu Wene wa Nyambi.”

²⁴ Bandongesha bakomokele ndaba ya mazu wendi. Ngoboni Yeshu wambile kukwabo kami ngayi, “Bana bami, shashikalu kwingina mu Wene wa Nyambi.

²⁵ Shinengi shawangu kamela kwingina mu liho lya nconga, kupitakana muntu wakuheta kwingina mu Wene wa Nyambi.”

²⁶ Bandongesha bendi bakomokele shikuma. Niho balyambashanine umo na wamina ngayi, “Pe boni yani ukatwesha kupuluka?”

²⁷ Yeshu wabatilaminine, wambile kukwabo ngayi, “Ku bantu kutwesheka shifwako, ngoboni kaliha kuli Nyambi, ndaba kuli Nyambi byuma nimwabyo bikutwesheka.”

²⁸ Niho Pita ambile kukwendi ngayi, “Mona, etu tunashiyi byuma nimwabyo, tunakukonko.”

²⁹ Yeshu wakumbwile ngayi, “Mwa shikuma nikwamba kukwenu ngayi kowa muntu unashiyi litala lyendi, hinge bawushinda wendi, hinge bampanzendi, hinge tatiyendi, hinge mandiyendi, hinge bana bendi, hinge mafuba wendi ndaba yami na ncango zaziwahe,

³⁰ ukabula kutambula byabingi ha shikati shino. Ukatambula wingi wa myanda ya matala na bawushinda na bampanzendi na bamandizendi na bana bendi na mafuba, hamo na makando. Ngoboni shikati shikeza, ukatambula wumi wa mwaya myaka.

³¹ Nohobene babengi aba banalimeneke bakenga bamamaninino na bamamaninino bakenga ba kulimeneka.”

Yeshu ukwamba kawuhatu ha lufu lwendi

³² Yeshu na bandongesha bendi bekalile mu nzila kuya ku Yelushalema, niye hinga atwamina kumbili yabo. Bandongesha bendi bakomokele, kami bantu obo bamukonkelenga munyima bekalile na bowa. Yeshu niho atwalile balikumi na babili ku mbali, pe watatikile kubatongweza ebye bikatendiwa kukwendi.

³³ Wambile ngayi, “Yuvwililenu, tunakuya ku Yelushalema, oko Mwana Muntu akapanikiwa ku bakankombela ba bakulwane na bakakulongesha ndayano. Nibo bakamuyata ngayi afwe na kumupanika ku Bakamatunga,

³⁴ baya bakamukumangiza na kumuzipola na kumufwizila mate na kumuziha. Ngoboni ukashanguka munyima ya matena ahatu.”

Kunyepa kwa Yakoba na Yowano

³⁵ Niho Yakoba na Yowano, bana ba Zebende, bezile kuli Yeshu, pe bamunyepele ngayi, “Mulongeshi, kuli shuma shamina tukushinga ngayi obe ututendelesho.”

³⁶ Yeshu wabepwile ngayi, “Shumangani mukushinga ngayi nimitendelesho?”

³⁷ Nibo bambile ngayi, “Yitabila ngayi twikale nobe mu wuwahe wobe, umo ku liboko lyobe lya shilyo, wamina ku liboko lyobe lya shimoho.”

³⁸ Ngoboni Yeshu wambile kukwabo ngayi, “Kulimuka eshe mu kulomba mufwako, kati mu kutwesha kunwina mu nkomoki ya makando eye nikunwina ndi? Hinge mu kutwesha kuzubilishiwa na kuzubilisha oku nazubilishiwi nakwo ndi?”

³⁹ Bakumbwile ngayi, “Tukutwesha.” Yeshu wambile kukwabo ngayi, “Mwa shikuma mukanwina mu nkomoki eye nikunwina na kuzubilishiwa na kuzubilisha oku nazubilishiwi nakwo.

⁴⁰ Ngoboni kwikala ku liboko lyami lya shilyo hinge ku lya shimoho, kaliha ami nikafungulasho. Myanya eye yikapanikiwa kukwabo baya Nyambi awahishilileyo.”

⁴¹ Bandongesha balikumi oho bayuvwile mazu awa, bapilaminine Yakoba na Yowano.

⁴² Ngoboni Yeshu wehanine bandongesha bendi hamo, wambile kukwabo ngayi, “Mukulimuka ngayi baya banahatiwi kwinga bakakubusha ba Bakamatunga ba kutwika biyeko ha bantu kami bantwamina bali na ngovu zazinene.

⁴³ Ngoboni kukenga noho kukwenu shifwako, pe nimwendi ukushinga kwinga wamunene kukwenu, enge mukamulimo wenu.

⁴⁴ Kami nimwendi ukushinga kwinga wakutatika, enge ndungo wa bantu nimwabo.”

⁴⁵ Ndaba hinge Mwana Muntu kaliha wezile ngayi bamutendele milimo, ngoboni wezile mukutenda milimo na kupana wumi wendi kukuliza bantu babengi.

Yeshu ukunyongomanisha kashishitwa wa lizina lya Mbatimeya

⁴⁶ Bakumine ku Yeliko. Oho Yeshu afuminenga mu munzi na bandongesha bendi hamo na likunge lyalinene lya bantu, kashishitwa mukakunyepa wa lizina lya Mbatimeya, mwana Timeya, wekalile ku nkumo ya mukwakwa.

⁴⁷ Oho ayuvwile ngayi niye Yeshu waku Nazaleta, watatikile kubilikiza hamba ngayi, “Obe Yeshu! Mwana Ndavita! Nyuvwileko nceshe!”

⁴⁸ Babengi bamukalihilile na kumutongweza ngayi amwene. Ngoboni wabilikizile shikuma ngayi, “Obe Mwana Ndavita, nyuvwileko nceshe!”

⁴⁹ Yeshu wemanine, pe wambile ngayi, “Mwihanenu.” Behanine kashishitwa, pe bambile ngayi, “Lishumishe! Katuka una ku kwihana.”

⁵⁰ Wayumbile shivwalo shendi, wakatukile, pe wezile kuli Yeshu.

⁵¹ Yeshu wambile kukwendi ngayi, “Ukushinga nikutendele bishini?” Kashishitwa wakumbwile ngayi, “Hekulu, nikushinga ngayi utoneshe meho wami.”

⁵² Yeshu wambile kukwendi ngayi, “Yanga, kukulupila kwobe ku na kunyongomanishi.” Wanguwangu watonene, pe wakonkele Yeshu mu nzila.