Lwimbo 8 - Libuka Lya Kuyela

Mbuyama

¹ Tawee, shinga wengile mpanzami, uya wayamwine ku mabele a bamawa, shinga nikutwesha kukuzupeza, oho tukuliwana mu lifwenke, kowa muntu wakutwesha kutunyanca.

² Shinga na kutwala na kukwingiza mu litala lya bamawa, kuya ukatwesha kundongesha ku haka, shinga na kupana waine yayiwahe, shinga na kunwishi waine ya mikabo ya manzenze.

³ Yaka liboko lyobe lya shimoho ku nceto ya mutwe wami, pe mvumbatile na liboko lyobe lya shilyo.

⁴ Enu bambuyama ba ku Yelushalema, hinga mushonkomona ku haka kwetu kutwala noho shinashingi.

Lwimbo lwa mutanu na lumo Bahoni babo

⁵ Yani ou ulinakwiza kufuma mu libelelengwa, hinga ayendamina ha kapumpo ka wakuhakiwa wendi? Mu nceto ya mutondo wa mikabo, nimo na kupindwishile mu mwanya uya wahemuwilile.

Mbuyama

⁶ Nyake mu mutima wobe ngonehe limango lya shilimukisho, ngonehe limango lya makaya ku liboko lyobe, Ndaba ku haka kwekala na ngovu ngonehe lufu, lihungu lyekala na ngovu ngonehe kalunga ka bafu, wukali washo ngonehe milangi ya mundilo.

⁷ Mema amengi afwako kutwesha kuzima ku haka, hinge libazi kutwesha lifwako kukupula ku haka, Kowa muntu ukutwesha kulanda oku ku haka, hinge na wuheti wawingi.

Bahoni babo

⁸ Tuli na mpazetu wakanuke, mabele endi ashili amakata, Haya tukenga nahiti ndi ndumbana ukeza na kumuhuhwa?

⁹ Shinga kembi, shinga tukumuzikila kapeshi ka shiliva, shinga wengile shihala, shinga tukumulama ha kumuzingwilisha na maleenge a shinda.

Mbuyama

¹⁰ Ami nili ngonehe kembi, mabele wami ngonehe kapeshi, oho wakuhakiwa wami aku mona, uku wahilila mu mutima wendi.

Mulume

¹¹ Sholomoni uli na mfuba ya mikolobozi ya mikabo ya shinyanca ku mwanya ukutumbiwa ngayi Mbaalu Hamoni, kuli bakakulima bananyepe kukwendi kulimamo, pe muntu na muntu uli na kuyumba likulukazi limo mali a muwayawaya wa shiliva.

¹² Mfuba yami ya mikabo ya mikolobozi ya shinyanca, yinengi yami amimwine, Sholomoni ukutwesha kukoweza mali a muwayawaya a shiliva akulingana likulukazi limo, na bakakulima ba kutwesha kukoweza byuma bya kulingana myanda yibili, biya ba kuwana mu mafuba abo.

¹³ Obe uli mu mfuba, bahoni bami bali na kuyuvwilila ngayi bayuvwe lizu lyobe, nyintabilishe ngayi niyuvwe lizu lyobe.

Mbuyama

¹⁴ Nyankupa wakuhakiwa wami, yituka shikuma ngonehe shineke, hinge ngonehe honge ukwitukila ku mapili kuli na kumena zimbuto za kututwisha livumba lya lukumba lyaliwahe.