Lwimbo 5 - Libuka Lya Kuyela

Mulume

¹ Nenginakale mu mfuba yami, obe mpanzami, obe mwenga wami, nili na kukungulula miila na lukumba lwa kunuka shiwahe, nili na wushi wami, na makanza ami a wushi, ninanu waine yami na mahwe ami. Bakakulihaka, lyenu na kunwa kutwala noho muna pwezuluku.

Bahoni babo Lwimbo lwa wunaa Mbuyama

² Ami nekalile mutulo, ngoboni nalotele wakuhakiwa wami ha ngongomweza ku shipana. Ncinkwilileko, mpanzami, wakuhakiwa wami, obe litela lyami, obe wami wa kupwisha. Mutwe wami unazaba na mume, na huki zami zina za ba na mbundu.

Mulume Mbuyama

³ Navulu mwaka bivwalo byami, kati shumangani nafwanina kuvwalila kami?

⁴ Mukakuhakiwa wengizile liboko lyendi mu limpananga lya shipana, pe na mbwatukile mutima.

⁵ Napindukile na ku shinkwilila wakuhakiwa wami, oho na kwatile ku kapatisho ku shihala, nawabiwile na miila ku maboko wami, pe minwe yami yekalile na kundweka miila.

⁶ Nashinkwililile shihala wakuhakiwa wami, ngoboni namuwanine nayi mwaka. Nashingile shikuma kuyuvwa lizu lyendi, na mushingashingile ngoboni kaliha namuwanine, na mwihanine ngoboni kaliha wankumbwile.

⁷ Bakakulama baya bekalile na kuzinguluka mu lukena bangwanine, bankamine na nkuntenda shitombo, bakakulama bayo banyangwile shivwalo shami.

⁸ Enu bambuyama bamu Yelushalema, nikumilomba ngayi ndi mu kumuwana wakuhakiwa wami, mu mutongweze ngayi ninapopo na lihungu.

Bahoni babo

⁹ Mbuyama wamuwahe shikuma kupitakana bambuyama nimwabo, kati wakuhakiwa wobe ukupitakana nahiti baminendi nimwabo? Ngayi etu tumutongweze eshe uli na kuyuvwilamo.

Mbuyama

¹⁰ Mukakuhakiwa wami wenga wamuwahe shikuma, na lutu lwendi lwenga lwa ku shuma, ninkayendi tuhu hakati ka balume ba makulukazi likumi.

¹¹ Mutwe wendi ngonehe ngolinde yakulembuluka, huki zendi zenga za kulipomba, za kushipa ngonehe likwangala.

¹² Meho wendi enga amawahe ngonehe matela ali kunkumo ya mishinzi, matela anemana kunkumo akuyowela mu mushinzi ukukunkula mahwe.

¹³ Matanta wendi ngonehe mfuba yinenzala na zimbuto za kulishiyashiya na lukumba. Mivumbo yendi ngonehe mwila wa maluba ukuvwisha miila.

¹⁴ Maboko wendi ngonehe mukambo wa ngolinde, lutu lwendi ngo lwa kutendiwa ha mayewe a banzovu, akuyaka mamanya a shafwila.

¹⁵ Mawulu wendi ngonehe zimpangwa za mamanya, za kuzika ha mwimbi wa ngolinde. Shifwekesha shendi ngonehe mapili aku Lembanoni, shashiwahe shikuma ngonehe mitondo ya shinda.

¹⁶ Nyambilo yendi yayiwahe shikuma, kami niye wa muwahe mu byuma nimwabyo, Enu bambuyama bamu Yelushalema, ou niye wakuhakiwa wami, niye muhoni wami.