Lwimbo 4 - Libuka Lya Kuyela

Mulume

¹ Mona, uli wamuwahe wakuhakiwa wami, kupwisha uli wamuwahe shikuma ku nciza ya likwiza unalifwiki ku mutwe meho wobe aku moneka kubyazima ngonehe matela, Huki zobe zikupepoka ngonehe litanga lya bampongo ba kukunkuluka kufuma ha lipili lya Ngiliyande.

² Mayewe wobe a kutuba, ngonehe litanga lya bambelele bakusheha, baya bakufuma mu ku yowela. Mayewe wobe nimwawo ali tuhu shiwahe mu kanwa kobe, kowa li na shokokomo.

³ Mivumbo yobe ngonehe wanda wakufumbuluka, na kanwa kobe kakawahe shikuma, matanta wobe ukubyazima ku nciza ya likwiza, oho unalifwiki likwiza ku mutwe wobe.

⁴ Ncingo yobe yinafweke ngonehe kapeshi ka Ndavita, kaya batenda na manono mukali wa muhanga uli mu ncingo yobe, ukulifweka ngonehe makebo a bakanzita bangovu ba kulingana likulukazi.

⁵ Mabele obe abili anafweke ngonehe bambuyu ba bahonge baya bali na kulya makandu.

⁶ Nikekala ha binkanda bya miila, na ha binkanda bya incence, kufuma kulumenemene, na kukuma ha kulela kwa mutena, oho mimvulu yikumana.

⁷ Uli wamuwahe wakuhakiwa wami, kowa nyanco mumwobe.

⁸ Tuyenga nimwetu tufume ku Lembanoni, obe mwenga wami. Yeka tuye hamo na nami tufume ku Lembanoni. Kunkuluka ufume hayilu ya lipili lya Amana, ufume hayilu ya lipili lya Sheniya na Helimoni. Kuya kwekala bimbwi na tumpulu.

⁹ Obe mpanzami, obe mwenga wami, Unatompolo mutima wami na meho wobe, na muhanga ou unavwala mu ncingo yobe.

¹⁰ Kuhaka kwobe ku nangwahililishi, obe mpanzami, obe mwenga wami, ku haka kwobe kwakuwahe shikuma kupitakana waine, mazi obe akunuka shiwahe kupitakana mazi a lukumba.

¹¹ Obe mwenga wami, mivumbo yobe kunakuvwa wushi, mahwe na wushi byekala ku nceto ya lulimi lwobe, livumba lya bivwalo byobe likunuka ngonehe livumba lya ku Lembanoni.

¹² Mpanzami, mwenga wami, unafweka ngonehe mfuba banashitili, unafweke ngonehe lishima lya ku shitila, hinge ngonehe lishima lya kaheloke lya ku shitila.

¹³ Zimbuto zobe zafweke ngonehe, mfuba yinenzala na mitondo ya mikabo ya manzenze, yikuyima mikabo yayiwahe, muli hena na nandi,

¹⁴ na shafwiloni, kalamushi na shinamoni, na mishobo nimwayo ya incence, na miila na lilambwe, na lukumba bya mavumba amawahe.

¹⁵ Obe uli kaheloke ka mu mfuba, lishima lya mema amawahe, tungulungwa tukunkula mema akufuma ku lipili lya Lembanoni.

Mbuyama

¹⁶ Pinduka, obe mpepo ya ku ncelele, yeka kuno obe mpepo yaku mabukubuku, upepokele ha mfuba yami, yinzalishamo na livumba lya lukumba lya kunuka shiwahe. Waku haka wami eze mu mfuba yendi, alye mikabo yamo yayiwahe.