Lwimbo 3 - Libuka Lya Kuyela

Mbuyama

¹ Wushiku nimwawo hinga na langana ha wulili wami, nalotele uya na haka nalotele hinimushingashinga, ngoboni kaliha namuwanine, na mwihanine ngoboni kaliha wankumbwile.

² Niho nalyambashanine ngayi, “Haya nikupinduka niye nakuzinguzuka mu munzi, mu mikwakwa na ha mbanza. Nika mushingashinga ou wakuhakiwa mu moyo wami.” Namushingashingile ngoboni kaliha namuwanine.

³ Bakakulama baya bazinguzukanga mu lukena bangwanine, pe na bayipwile ngayi, “Munamoneneko ou wakuhakiwa ndi?”

⁴ Oho nabashiyile kashikati kakashe, namuwanine ou wakuhakiwa mu moyo wami. Na mukwatile pe kaliha netabilile ku mushiya, kutwala noho nakamwingizile mu litala lya bamawa, ku wulili wabaya bahemene.

⁵ Enu bambuyama ba ku Yelushalema, nikulibeza hali bineke na balusha ba mu lishaka, hinga mushonkomona ku haka kwetu, kutwala noho shinashingi nisho shine.

Lwimbo lwa wuhatu Bahoni babo

⁶ Kati shumangani eshe shi na kufuminina mu libelelengwa, sha kufweka ngo wishe, ou ukunuka shiwahe incence na mazi a miila, incence bakulandisha bakamikwebo.

⁷ Monenu! Sholomoni niye ulinakwiza banamushimbi ha litanda lili ha makila wendi, na bakulwane bangovu banzita ba Ishalela ba kulingana makumi mutanu na limo ba mu Yelushalema ba ku mushindikiza.

⁸ Nimwabo banengi bakakulwa na mukwale, bakakulimuka kulwa nzita, muntu na muntu na limanga mukwale ha lukanda lwendi mu kulama nawo ku wushiku.

⁹ Mwene Sholomoni bamushimbilile ha litanda lyaliwahe shikuma, liya batendele ha mitondo ya ku Lembanoni.

¹⁰ Zimpangwa zasho bazitendele na shiliva, kunyima yalyo kwengile kwa kutenda ha ngolinde na hakwikala haho ha kufwika likwiza lya kufumbuluka, lya kutunga shiwahe, bambuyama bamu Yelushalema nibo banabitungu ku monesha ku haka kwabo.

¹¹ Enu bana babambuyama bamu Ziyoni, yekenu mumone mwene Sholomoni, navwala munana uya bamuvwikile bamandiyendi ku mutwe ha mutena wa shimbo shendi sha maluwo ha mutena waku wahilila na kutangala kwendi.