Lwimbo 2 - Libuka Lya Kuyela

Mbuyama

¹ Ami nengi ngonehe maluba a mwila wamu litunga lya Shaloni, ngonehe maluba a mwila wamu kangulungwa.

Mulume

² ngonehe maluba a mwila wekalanga mukati ka mihongela, nisho uli na nobe wakuhakiwa wami hakati ka bambuyama nimwabo.

Mbuyama

³ Ngonehe mutondo wa mikabo mukati ka mitondo ya mu lishaka, nisho uli na nobe wakuhakiwa wami hakati ka bandumbana. Niku haka kwikala mu mubombola wobe, mikabo yobe yayitobe mukanwa kami.

⁴ Wanyingizikile mu litala lya mayambwayambwa, wamoneshele na ndembela ya ku haka kwobe nimwako.

⁵ Ncumishe na linkende lya kuyuma lya shinyanca, pe nkalamanishe na mikabo ya ma apulu, nili na kukola ndaba ya ku haka.

⁶ Yaka liboko lyobe lya shimoho ku nceto ya mutwe wami, pe mvumbatile na liboko lyobe lya shilyo.

⁷ Enu bambuyama ba ku Yelushalema, nikulibeza hali bineke na balusha ba mu lishaka, hinga mushonkomona ku haka kwetu kutwala noho shinashingi nisho shine.

Lwimbo lwa wubili Mbuyama

⁸ Ninayuvwu lizu lya wakuhakiwa wami, ulinakwiza hayituka ha binkanda, ulinakwituka na kukilozoka ha mapili.

⁹ Mukakuhakiwa wami nafweke ngonehe shineke, hinge ndi mwana lusha. Mona, nemana kunyima ya kembi ka litala lyetu, uli na kunyinangila mu limpananga, ukunyinangila mu matubwa a limpananga.

¹⁰ Haya mukakuhakiwa wami wambile kukwami. Pinduka, wakuhakiwa wami, muhoni wami, yeka twende hamo.

Mulume

¹¹ Mona, mupepo unapiti, na mvula unaketuku, unayi.

¹² Maluba ali na ku moneka hanci, shikati shakwimbila nyimbo shinakumu, matela ali na kwimbila nyimbo mu litunga lyetu.

¹³ Nkuyu zili na ku balika kuhoka, pe mikolobozi ya mikabo ya shinyanca yili na kuyaka ntemo, yili na kunukisha livumba lyaliwahe. Pinduka wakuhakiwa wami, muhoni wami, yeka twende hamo.

¹⁴ Obe unafweke ngonehe litela, uya wekala mu myata ya mamanya, Moneshe lupala lwobe lwa lu wahe, pe nyuvwishe lizu lyobe, ndaba lizu lyobe lyenga lyalitobe, na lupala lwobe lwenga lwa lu wahe.

¹⁵ Tukwatilenu bamimbwe, bamimbwe babashebashe, oho shilolokale babipishe ma mfuba a mikolobolozi ya shinyanca, yiya yili na kututwisha ntemo.

Mbuyama

¹⁶ Mukakuhakiwa wami, unengi wami, nami nili wobe. Uli na kubuyishila matanga a mikoko bendi hakati ka maluba a mwila.

¹⁷ Mpepo ya mazolo ya tatikanga kupepoka, mimvulu ya tatikanga kumana bokamo, obe wakuhakiwa wami fweka ngonehe shineke, fweka ngonehe mwana lusha waha binkanda bya Mbetele.