Lute 4 - Libuka Lya Kuyela

Mbowazi ukuyeka Lute

¹ Mbowazi wayile na kwikala ku mwanya wa shikungulukilo ku lipangati lya shinkololo sha lukena. Niho kawushinda wa Elimeleki, uya atoyele Mbowazi wezile. Pe Mbowazi wamwihanine ngayi, “Yeka kuno ncwana, yikala hanci.” Nohobene wayileko, pe wekalile hanci.

² Niho Mbowazi ehanine bakulwane likumi bamu lukena, kami wabatongwezele kwikala hanci. Oho bekalakale hanci,

³ Mbowazi wambile ku kawushinda ou wafwanina kulama Lute ngayi, “Naomi unaboko kufuma ku Mowambi, pe ukushinga kulandisha mfuba iya yengile ya kawushinda wetu Elimeleki.

⁴ Pe nahanganiki ngayi, obe wafwanina kulimuka byayo. Hayaboni, ndi ukushingayo, landilayo ku meho a bakulwane aba banekala kuno. Ngoboni ndi kuyishinga wufwako, amba noho, ndaba ngovu za ku fwanina kuyilanda ha kutatika zili kukwobe taha, niho boni kukwami.” Uya Mulume wambile ngayi, “Nikayilanda.”

⁵ Mbowazi wambile ngayi, “Shinawaha, ndi ukulanda iya mfuba kuli Naomi, pe yekela kumo na uya mfwile Lute wa Kamowambi, ngayi mwanga mfuba yikale mu maboko a bawushinda ba uya mukakufwa.”

⁶ Mulume wakumbwile ngayi, “Ndi shilinoho pe nifwako kukalanda eye mfuba, ndaba nisho shikutontoloka ngayi bana bami kukakona iya mfuba bafwako. Yilande obe, ami kutwesha nifwako.”

⁷ Haya ha matena ayo, ha kuketula ndando, hinge kutambashana ntutu, shengile shiheka sha mukakulandisha, kuvwula luncangwa lwendi na kulupanika kuli mukakulanda. Eye niyo yengile nzila ya Baishalela bamoneshelenga ngayi shambo shinaketuku.

⁸ Nohobene oho mulume ambile kuli Mbowazi ngayi, “Yilande bene obe,” wavulile luncangwa lwendi pe walupanikile kuli Mbowazi.

⁹ Niho Mbowazi ambile ku bakulwane naku bamina nimwabo ngayi, “Enu nimwenu muli bapaki lelo ngayi nalanda kuli Naomi byuma nimwabyo biya byengilenga bya Elimeleki na kuli Kilyoni na Mahiloni.

¹⁰ Kuyekela kumo na Lute wa Kamowambi, mfwile wa Mahiloni, ukwinga mukazami, mu kulama wuheti wa ba lupashi lwa mukakufwa, nohobene ngayi lizina lyendi mwanga libule kuloba hakati ka bantu bendi na muno mu lukena. Kami lelo enu munengi bapaki kuneshe.”

¹¹ Niho bantu nimwabo na bantwamina bambile ngayi, “Tuli bapaki.” Pe bantwamina bambile ngayi, “Nyambi ya Ngula mwanga atandalishe mukazobe kwinga ngonehe Lakele na Leya aba babelekele bana babengi kuli Yakobo. Obe mwanga winge wakuheta mu mukoka wa Efulata na kuya mpupo mu Mbetelehema.

¹² Bana baya akakupana Nyambi ya Ngula ku nou kankanga bakengishe ba lupashi lyobe ngonehe ba lupashi lwa Pelizi, mwana Yunda wamulume na Tamale.”

Mbowazi na Bazukulyendi

¹³ Nohobene Mbowazi watwalile Lute ku munzi mukwinga mukazendi. Nyambi ya Ngula watandalishile Lute, pe wemitile na kubeleka mwana wamulume.

¹⁴ Bambuyama bambile kuli Naomi ngayi, “Yemeza Nyambi ya Ngula. Ku mutena walelo unakupaniki muzukulu wa mulume waku kulama. Ou mwana mwanga enge wampupo mu Ishalela!

¹⁵ Niye ukatulumanisha mutima wobe na kukulama mu wukulwane wobe, ndaba niye mwana Lute mukowobe. Ou niye waku haka shikuma kupitakana bana babalume mutanu na babili.”

¹⁶ Naomi wakatwile kanuke, niho amubumbatilile ha kapumpo kendi, pe niye wengile mukakulelamwana.

¹⁷ Bambuyama baya bazikilenga nabo hahepi kuyo batumbile mwana ngayi Ombendi. Batongwezele bantu nimwabo ngayi, “Mwana wamulume unahemuwu kuli Naomi.” Ombendi wengile tata Njeshe, ou wengile tata Ndavita.

Muhoko wa lupashi lwa Ndavita

¹⁸ Owe niwo muhoko wa lupashi lwa Pelizi kukuma kuli Ndavita. Pelizi wengile tata Heziloni,

¹⁹ Heziloni wengile tata Lama na Lama wengile tata Aminandabe,

²⁰ Aminandabe wengile tata Nashoni na Nahishoni wengile tata Shalimoni,

²¹ Shalimoni wengile tata Mbowazi na Mbowazi wengile tata Ombendi,

²² Ombendi wengile tata Njeshe na Njeshe wengile tata Ndavita.