Lute 3 - Libuka Lya Kuyela

Lute ukawana mulume wakumuyeka

¹ Oho kwapitile shikati, niho Naomi mukowendi ambile kuli Lute ngayi, “Mwanami, niku fwanina kukuwanina mulume wakukuyeka, ngayi mwanga uwane ku mwena.

² Anuka ngayi Mbowazi, uya wekalilenga na bakamilimo bendi babambuyama baya watendelenga nabo milimo, nengi kawushinda wetu. Haya yuvwa, ano mazolo Mbowazi ukekala ku likotwelo na kuleleka luku.

³ Nohobene yanga ukayowele, pe uwabe mazi a lukumba, kami vwala bivwalo byobe byabiwahe. Niho uye oku akulelekela, ngoboni hinga umutoshesha ngayi alimuke ngayi obe niko uli, hantu unamanishi kulya na kunwa.

⁴ Oho akushinga kulangana ulimuke oku akulanganina mutulo, niho uye ukamufwikulule ku mawulu wendi, pe ukalaleko. Niye ukakutongweza sha kutenda.”

⁵ Lute wakumbwile ngayi, “Nikatenda byuma nimwabyo ebye ukuntongweza.”

⁶ Nohobene Lute wayile ku likotwelo kami watendele nehe amutongwezele mukowendi.

⁷ Oho Mbowazi amanishile kulya na kunwa, wekalile shiwahe mu mpoza. Niho ayile na kulangana ku mushiinzi wa mbale. Lute wabembelelele shiwahewahe pe wamufwikulwile ku mawulu niho alanganineko.

⁸ Ku shikati sha wushiku oho Mbowazi abazumukile ha tulo na kufutuka, pe walikomokelele ha kuwana mbuyama nalangana ku mawulu wendi.

⁹ Wamwipwile ngayi, “Kati obe yani?” Wakumbwile ngayi, “Ami mukamulimo wobe Lute. Ndaba unengi kawushinda ou wafwanina kundama, uli na ngovu za kundama, haya nikulomba ngayi unyeke.”

¹⁰ Mbowazi wakumbwile ngayi, “Nyambi ya Ngula mwanga akufuywele, mwanami. Aha unamoneshe nceshe zobe zazinene za mamaninino ku ba lupashi kunebye unatende, kupitakana ebye watendele ha kutatika kuli bamukowobe. Shafwanina kukwobe kuya na ku shinga ndumbana, wakuheta hinge ndi ncepwe, ngoboni kutenda noho wufwako.

¹¹ Haya hinga ulikekula, ndaba bantu nimwabo bali muno mu lukena banalimuku ngayi unengi mbuyama wankama. Nikatenda byuma nimwabyo ukunyepa.

¹² Mwa shikuma nisho shinengi sha kupwisha ngayi ninengi kawushinda ou wafwanina kukulama, kami nili na ngovu hahobe. Ngoboni kwali mulume wa kawushinda waha mutima wakumpitakana.

¹³ Yikala kuno wushiku nimwawo, pe ku lumenemene kawushinda wobe waha mutima ukushinga kukuliza, pe shashiwahe atende noho, ngoboni ndi kushinga wufwako kukutendela byawushinda waha mutima, nikubeza na Nyambi ya Ngula wakuyoya nohoboni nika kuliza. Haya langana kutwala ku lumenemene.”

¹⁴ Nohobene Lute walalile ku mawulu a Mbowazi hantu naku lumenemene, ngoboni wapindukile oho shilolo kushe shiwahe, oho bantu kumumona bafwako, ndaba Mbowazi kaliha washingile muntu ngayi alimuke ngayi mbuyama wekala ku likotwelo.

¹⁵ Niho Mbowazi ambile kukwendi ngayi, “Lifwikulule likwiza lyobe olyo unavwala, ulitandubwile hanci”. Pe walitandubwile. Mbowazi wayitilileho luku lwa wulemu wa kushinga kulingana makilo makumi abili, kami wamuyavwile kukatula na kumutwika ha shifuzi. Mbowazi wayile ku munzi.

¹⁶ Oho Lute akumine ku munzi, mukowendi wamwipwile ngayi, “Oho wakakumako, shumangani shakatendiwa mwanami?” Lute wamutongwezele nimwabyo ebye Mbowazi amutendela.

¹⁷ Wanungileko ngayi, “Kaliha nafwanini kuboka mabokoboko kukwobe. Nohobene nampana eye luku nimwalwo.”

¹⁸ Naomi wambile kukwendi ngayi, “Haya tula mutima mwanami, hantu unawana ngayi eshe shambo shikaketuka nahiti. Mbowazi kulehasho wufwako hantu naketulu eshe shambo lelo.”