Lute 2 - Libuka Lya Kuyela

Lute ukuliwana na Mbowazi

¹ Naomi wekalile na kawushinda wendi watumbiwile ngayi Mbowazi, wengile wakuheta kami muntu wamuleemu, niye wengile wakulupashi lwa mukokwendi Elimeleki.

² Mutena umo Lute wambile kuli Naomi ngayi, “Ndehenu niyenga ku mafuba na kupupulula mbuto ya mapumpwa eye bashiyanga bakakuteza. Nikapupulula munyima ya muntu umo ou ukanyintabilisha.” Naomi wakumbwile ngayi, “Yanga mwanami.”

³ Lute wayile ku mfuba pe wendelenga munyima ya bakamilimo na kupupulula mbuto ya mapumpwa. Nisho shawaniwile ngayi wayile ku mfuba iya yengilenga ya Mbowazi kawushinda wa Elimeleki.

⁴ Oho kwapitile shikati Mbowazi wakumine kufuma ku Mbetelehema. Washangwishile bakamilimo na kwamba ngayi, “Nyambi ya Ngula ekale nenu.” Bakumbwile ngayi, “Nyambi ya Ngula amitandalishe.”

⁵ Mbowazi wepwile mukulwane wabakamilimo bendi ngayi, “Kati ou kankanga wakuti?”

⁶ Mukulwane wabakamilimo wakumbwile ngayi, “Nengi kankanga wa lipukwenda ou wezile na Naomi kufuma ku Mowambi.

⁷ Wanyepele ngayi, ‘Hekulu, ndehenu nikonke bakamilimo na kupupulula mbuto ya mapumpwa. Pe natendenga milimo kubalika ku lumenemene kukuma naku shikati shino, niho analehesho ngayi akatale shashishe mu shilawu.”

⁸ Mbowazi wambile kuli Lute ngayi, “Obe mwanami leha nikutongweze. Hinga upupululanga mbuto kwashenge ndele tuhu muno mu mfuba, yikala kuno na kutenda milimo na bakamilimo bami babambuyama.

⁹ Balame umone oku ba kutezela mbuto, upupulule munyima ya bakamilimo babambuyama. Nalaya bandumbana bakamilimo bami babalume ngayi hinga bakuyandisha. Kami shikati nimwasho osho ukuyuvwa linyontwa, yanga na kunwa ku zintesho za mema ziya banatekulu bandumbana.”

¹⁰ Lute wanyongaminine lupala lwendi hanci. Pe wambile kuli Mbowazi ngayi, “Shumangani ukuliyakatila shikuma hahami? Shumangani uku monesha nceshe ku lipukwenda?”

¹¹ Mbowazi wakumbwile ngayi, “Nayuvwa byuma nimwabyo biya watendele kuli mukowobe ha shikati shiyo afwile mukokwobe. Kami nayuvwa eshe wafumine kuli tatiyobe na mandiyobe naku litunga lyobe naneshe wezile mukwikala hakati ka bantu bashenge, aba wabulile kulimuka ku mwaka.

¹² Nyambi ya Ngula mwanga akupane hanebye unatende. Nyambi ya Ngula, Nyambi wa Ishalela, mwanga akupane ncuungu yayinene, kuno wezile ngayi uholame.”

¹³ Lute wakumbwile ngayi, “Obe hekulu, unengi wa shishemo shikuma kukwami. Unanyuvwishi shiwahe hakwamba na mukamulimo wobe na shishemo, hinge ndi nabulu kwezekela hamo ngo umo wa bakamilimo bobe.”

¹⁴ Ha shikati sha kulya, Mbowazi wambile kuli Lute ngayi, “Yeka kuno, tambula shibunku sha linkende, ushitante mu muhozi.” Wekalile na bakamilimo, pe Mbowazi wamutabikizile katooto. Walile hantu noho ekutile, pe wabishiyileho.

¹⁵ Oho akatukile ngayi aye mu kupupulula mbuto, pe Mbowazi walayile bakamilimo bendi ngayi, “Mulehenu apupulule mbuto hingebene oku munabungiki bikuta, pe hinga muhenyena kukwendi.

¹⁶ Pe kami, homonenu mbuto ya mapumpwa ha bikuta, pe mumushiyile eze mu kuwapupulula pe hinga mumukanisha.”

¹⁷ Niho Lute apupulwile muya mu mfuba kukuma naku mazolo. Oho apumpwile ebye apupulwile, wekalile na mpeka za makilo likumi!

¹⁸ Niho akatwile na kuboka ku munzi, pe wamonesheleko mukowendi wingi wanebye apupulwile. Niho kami atolele byakulya kubiya byashalileho, pe wabipanikile mukowendi.

¹⁹ Pe mukowendi wamwipwile ngayi, “Kati kuti oku unakapupululunga lelo? Mu mfuba yayani omu unakatendenga milimo? Nyambi mwanga afuywele muntu ou unakulimukishi.” Lute watongwezele Naomi ngayi lizina lya mwine mfuba oku nakatendenga milimo lelo, ukutumbiwa ngayi Mbowazi.

²⁰ Naomi wakalokele kuli mukowendi ngayi, “Nyambi ya Ngula mwanga afuywele Mbowazi! Kati Nyambi ya Ngula kaliha wabulanga kuleha kuyuvwila nceshe zendi ku babomi naku bafu ndi?” Pe Naomi wazaminine kwamba ngayi, “Uya muntu wenga kawushinda wetu waha mutima, niye nengi muntu umo kubaya bali na ngovu za kutulama.”

²¹ Niho Lute wa Kamowambi ambile ngayi, “Shinawaha kupitakana nimwabyo, wantongweza kuzamina kutenda milimo na bakamilimo bendi babambuyama hantu banamanishi kuteza.”

²² Naomi wakumbwile kuli Lute mukowendi ngayi, “Shinawaha mwanami, ukekalenga na bakamilimo bendi kutina kuyandishiwa ndi ukuya mu mfuba ya muntu washenge.”

²³ Nohobene Lute watendelenga milimo na bakamilimo ba Mbowazi, kami wapupulwilenga hantu noho luku na loto nimwabyo byamanine kuteziwa. Pe wazaminine kwikala na mukowendi.