Luka 8 - Libuka Lya Kuyela

Bambuyama baya bayile na Yeshu

¹ Kunyima yanebye, Yeshu wayile na kupita mu minzi yayinene na mu tuminzi na ku shimikila ncango zaziwahe za Wene wa Nyambi. Bandongesha likumi na babili bekalile hamo nendi,

² na bambuyama bamo baya banyongomanine ku mayimbwe na ku malweli, Maliya (watumbiwile Mangandalena) ou afumishile mayimbwe mutanu na abili

³ na Njowana mukaza Ncuza shamanga sha Helonda na Shushana na babengi bamina bamuyavwile na wuheti wabo.

Nguli ya mukakukuba

⁴ Likunge lyalinene lya bantu bafumine ku minzi nimwayo bakungulukilile kuli Yeshu. Pe wabatongwezele eye nguli ngayi,

⁵ “Mukakukuba wayile na kukuba mbuto yendi. Oho akubilenga, mbuto yamina yawililile mu nzila, omo bayilyatangilile na mawulu na tuyoni twezile na kuyilya.

⁶ Mbuto yamina yawililile ha mamanya. Oho yamenene, yalebukile ndaba limvu lyabulile mbombweshi.

⁷ Yamina yawililile mukati ka mihongela, oho mihongela yakulile hamo na mbuto, yayitintishile.

⁸ Ngoboni mbuto yamina yawililile mu limvu lya wilo, yamenene, pe yayimine mwanda.” Oho amanishile, wambile kukwabo ngayi, “Ou uli na matu akuyuvwa, ayuvwe!”

Shifungo sha zinguli

⁹ Bandongesha bepwile Yeshu ngayi abatontolwele eye nguli,

¹⁰ Niho ambile ngayi, “Kukwenu kunapanikiwi kulimuka ncimpi za Wene wa Nyambi, ngoboni ku bamina nikwamba mu zinguli mwanga bamone, ngoboni kumoneshesha bafwako, kami mwanga bayuvwe, ngoboni ku yuvwishisha bafwako.

Yeshu ukutontolola nguli ya mukakukuba

¹¹ “Haya nguli eye yikutontolola nehi ngayi, mbuto yenga lizu lya Nyambi.

¹² Mbuto iya yawililile mu nzila yinengi bantu baya ba kuyuvwa lizu, niho kami Shatana ukwiza na kufumisha lizu linakubiwi mu mitima yabo, kutina ba kulupila ngayi bapuluke.

¹³ Mbuto iya yawililile ha mamanya yinengi bantu baya ba kuyuvwa lizu, ba kulitambula na ku wahilila, ngoboni lizu kuzika mipishi mumwabo lifwako, bakukulupila kashikati kakashe tuhu, oho shikati sha byezeko shakeza bakashiya kukulupila kwabo.

¹⁴ Mbuto yawililile mu mihongela yinengi bantu baya ba kuyuvwa lizu, ngoboni bya kulifulankana na wuheti na nyumwa ya byuma bya wumi uno bikatintisha lizu ngayi mikabo yabo yifwako kukula.

¹⁵ Ngoboni mbuto yawililile ha limvu lya wilo yinengi bantu baya ba kuyuvwa lizu na kulilama mu mitima ya kwoloka na kupwisha, kami bakwikala na lunzewe hantu banayimi mikabo.

Lumuni lwa kufwikiwa lulonga lwa kukunama

¹⁶ “Kowa muntu wamunikanga lambi na kuyifwika lulonga lwa kukunama, hinge kuyiyaka mu nceto ya wulili, ngoboni ukuyiyaka haya yikutwesha ku moneka ngayi baya bakwinginamo batweshe ku mona liyeye.

¹⁷ “Ndaba kowa shuma sha kuholekiwa shikabula kuholoka, hinge sha kulimbiwa shikabula kutumpuka.

¹⁸ “Nohobene keyenu hanebye mu kuyuvwa, ndaba ou ulinabyo bakamuwezelelako, kami ou unabibulu bakamuyanga nanaka alinako.”

Bamanda Yeshu na bakonzobendi

¹⁹ Niho mandiyendi Yeshu na bakonzobendi bezile kukwendi, ngoboni kaliha batweshele kukuma kukwendi ndaba ya likunge lya bantu.

²⁰ Muntu wamina wamutongwezele ngayi, “Bamandiyobe na bakonzobobe bali ha munkanda, bakushinga kuku mona.”

²¹ Yeshu waba kumbwile ngayi, “Bamawa na bakonzobami banengi baya ba kuyuvwa lizu lya Nyambi na kulyombatala.”

Yeshu ukumwenesha nkuli

²² Ha mutena wamina Yeshu wenginine mu wato hamo na bandongesha bendi, wambile kukwabo ngayi, “Tuzabukilenu mu nciza ya liziba.” Niho bayile.

²³ Ngoboni oho bavuwilenga, niye walanganine mu tulo. Kwezile nkuli yayinene ha liziba wato wenzalile na mema, niho bekalile mu malamo.

²⁴ Bezile kukwendi, bamutoneshele ngayi, “Hekulu, Hekulu! Tuli na kufwa!” Niho apindukile, wambilile nkuli na wukali wa mankanyi ngayi amwene, pe kwekalile ku mwena shikuma.

²⁵ Yeshu wambile ku bandongesha bendi ngayi, “Kukulupila kwenu kuli kuti?” Niho batinine na kukomoka, bambile umo kuwamina ngayi, “Kati ou muntu wanahiti? Ndaba ukwambila nkuli na mankanyi, kami bikumwombatala!”

Yeshu ukunyongomanisha mulume wa mayimbwe

²⁶ Yeshu na bandongesha bendi bakumine ku litunga lya Bangalashena, liyo lyalipenzele na Ngalileya.

²⁷ Oho Yeshu akumine ha shibumbo, walihanganine na mulume wa mayimbwe wafumine mu munzi. Wekalile na mayimbwe, shikati shashitali kaliha wavwalilenga bivwalo, hinge kwikala mu litala, ngoboni wekalilenga ha binzimbi.

²⁸ Oho amonene Yeshu, wafunkamine kumbili yendi, niho abilikizile na lizu lyalinene ngayi, “Ukushinga kutenda bishini obe Yeshu Mwana Nyambi Wakukangana? Nikunyepa ngayi hinga unyandisha!”

²⁹ Wambile nahiyo ndaba Yeshu wambilile mayimbwe ngayi afume mumwendi. Ndaba bikati byabingi amuyandishilenga, pe bamulaminenga hinga amangiwa mawenge na mu bikulo, ngoboni wabimungwilenga kami mayimbwe amutwalilenga mu libelelengwa.

³⁰ Yeshu wamwipwile ngayi, “Lizina lyobe obe yani?” Wakumbwile ngayi, “Lizina lyami ami ‘Litanga,’ ” ndaba mayimbwe amengi enginine mumwendi.

³¹ Mayimbwe niho anyepele Yeshu ngayi hinga awatandila mu kalunga.

³² Kwekalile litanga lya zingulube zazingi zalilenga ha shinkanda, pe mayimbwe anyepele Yeshu etabile ngayi akengine mumwazo. Yeshu wetabilile.

³³ Niho mayimbwe afumine ku mulume, enginine mu zingulube. Litanga lyetukile na kuliyumbila mu liziba, pe lyandokamine.

³⁴ Balishani oho bamonene eshe shatendiwile, betukile kuya na kutongweza bantu mu minzi na mu litunga.

³⁵ Bantu bayile mu ku mona eshe shatendiwile, oho bezile kuli Yeshu, bawanine mulume ou afumine mayimbwe hinga ekala ku mawulu a Yeshu navwala, kami uli shiwahe. Pe batinine shikuma.

³⁶ Obo bamoneneko batongwezele bantu eshe shatendiwile ku mulume wa mayimbwe.

³⁷ Niho bantu nimwabo ba hahepi na litunga lya Bangalashena banyepele Yeshu ngayi afume kukwabo, ndaba bekalile na bowa wawunene shikuma. Yeshu wenginine mu wato, pe wabokele.

³⁸ Mulume uya afumine mayimbwe wanyepele Yeshu ngayi aye nendi, ngoboni wamubweshele ngayi,

³⁹ “Boka kukwenu, ukabatongweze ebye anakutendele Nyambi.” Mulume wayile na kutongweza bantu mu munzi nimwawo ebye amutendelele Yeshu.

Mwana Yailashi na mbuyama wakwatile ku shivwalo sha Yeshu

⁴⁰ Oho Yeshu abokele ku mbalila yamina ya mu nciza ya liziba, bantu bamutambwile ndaba bekalile na kumutatilila.

⁴¹ Niho Yailashi umo wa bakulwane ba shinangonge wezile kuli Yeshu, wawililile hanci ku mawulu a Yeshu, wamulambililile ngayi aye ku litala lyendi,

⁴² ndaba wekalile na mwanendi wa mbuyama umo pele, wa myaka likumi na yibili, washingile kufwa. Oho Yeshu ayilenga, likunge lyamushinanishile.

⁴³ Pe hekalile mbuyama wekalile na wulweli wakututika mukeza myaka likumi na yibili, wayumbile ebye ekalile nabyo nimwabyo kubanganga, ngoboni kowa watweshele kumunyongomanisha.

⁴⁴ Wezile kunyima ya Yeshu mu likunge lya bantu, pe wakwatile ku mungundo wa shivwalo shendi, wanguwangu wulweli wendi wakututika mukeza waketukile.

⁴⁵ Yeshu wambile ngayi, “Kati yani ou nankwata?” Oho nimwabo bakanine, pe Pita wambile ngayi, “Mulongeshi, likunge lya bantu linakubumbilili naku kukuntula.”

⁴⁶ Ngoboni Yeshu wambile ngayi, “Kuli umo nankwata, ndaba nikuyuvwa ngayi ngovu zinafumu mumwami.”

⁴⁷ Mbuyama uya oho amonene ngayi kuholama wufwako, wezile na kulikankila, pe wawililile hanci ku mawulu a Yeshu, wamutongwezele ku meho a bantu nimwabo shumangani eshe anamukwatili na neshe ananyongomana wanguwangu.

⁴⁸ Yeshu wambile kukwendi ngayi, “Mwanami, kukulupila kwobe kunakunyongomanishi. Yanga mu ku mwena.”

⁴⁹ Oho Yeshu ushili kwamba, umo wafumine ku litala lya mukulwane wa shinangonge, wamutongwezele ngayi, “Mwanobe unafu, hinga ukabakanisha Mulongeshi kami.”

⁵⁰ Ngoboni Yeshu ha kuyuvwa eshe, wambile ku mukulwane wa shinangonge ngayi, “Hinga utina, kulupila tuhu, mwana ukanyongomana.”

⁵¹ Oho Yeshu akumine ku litala, kaliha wetabilile ngayi umo engine nendi, ndele tuhu Pita na Yakoba na Yowano na tatiyendi na mandiyendi kanuke.

⁵² Nimwabo balililenga na kutuwa mbingo, ngoboni Yeshu wambile ngayi, “Hinga mulila, ndaba mwana shilolo afwe, ngoboni nalangana tulo!”

⁵³ Nimwabo bamuhepele, ndaba balimukile ngayi mwana unafu.

⁵⁴ Ngoboni Yeshu wamukwatile ku liboko, niho amwihanine ngayi, “Mwanami, pinduka!”

⁵⁵ Moyo wendi wabokelemo, wanguwangu wapindukile, pe Yeshu wabatongwezele ngayi bapane mwana byakulya.

⁵⁶ Bahemi bendi bakomokele, ngoboni Yeshu wabakanishile ngayi hinga batongweza muntu hinge umo ha shuma eshe shinatendiwi.