Luka 7 - Libuka Lya Kuyela

Yeshu ukunyongomanisha mukamulimo wa mukulwane wa bakanzita

¹ Oho Yeshu amanishile kwamba ebye nimwabyo ku bantu, wayile ku Kapenauma.

² Mukulwane wa bakanzita wekalile na mukamulimo wendi ou ahakile shikuma, wakolele, pe washingile kufwa.

³ Oho mukulwane wa bakanzita ayuvwile mpupo ya Yeshu, wamutuminine bakulwane ba Bayunda na kumulomba ngayi eze na kunyongomanisha mukamulimo wendi.

⁴ Oho bakumine kuli Yeshu, bamulombele shikuma ngayi, “Ou muntu unafwanini ngayi umuyavwe,

⁵ ndaba wahaka bantu betu, kami niye watutendelele shinangonge.”

⁶ Niho Yeshu ayile hamo nabo. Oho akumine hahepi na litala lyendi, uya mukulwane wa bakanzita watumine bahoni bendi kuli Yeshu na kumutongweza ngayi mukulwane wa bakanzita unamba ngayi, “Mwene, hinga uliyandisha. Ndaba ami ku fwanina nifwako ngayi obe wingine mu litala lyami.

⁷ Nisho nahanganiki ngayi ami ku fwanina nifwako kwiza kukwobe, ngoboni amba tuhu lizu ku mukamulimo wami, pe ukanyongomana.

⁸ Ndaba ami kami nili mu nceto ya baya bali na ngovu hahami, kami na nami nili na banzita mu nceto yami. Pe nambanga ku umo ngayi, ‘Yanga!’ Pe ukuya, kami nambanga kuwamina ngayi, ‘Yeka!’ Pe ukwiza, kami nambanga ku mukamulimo ngayi, ‘Tenda eshe!’ Pe ukushitenda.”

⁹ Oho Yeshu ayuvwile mazu awa, wakomokele, wafutukile, wambile ku likunge lya bantu bamukonkelenga ngayi, “Nikwamba kukwenu ngayi, mu Ishalela, shilolo niwane kukulupila kwakunene kwanehe.”

¹⁰ Nibo aba batumiwile babokele ku litala, pe bawanine ngayi mukamulimo ou wakolelenga unanyongomana.

Yeshu ukushangula mwana mfwile wa mulume

¹¹ Kunyima yanebye, Yeshu wayile ku munzi ukutumbiwa Nayina na bandongesha bendi hamo na likunge lyalinene lya bantu.

¹² Oho akumine hahepi na lipangati lya munzi, balihanganine na bantu bashimbile muntu wakufwa, ou wengile mwana umo tuhu wa mulume mu livumo lya mandiyendi, ou wengile mfwile. Likunge lyalinene lya bantu ba mu munzi bekalile nendi.

¹³ Oho Mwene amumonene wamuyuvwilile nceshe, wambile kukwendi ngayi, “Hinga ulila.”

¹⁴ Niho akwatile liboko lyendi ku mubanda, baya bashimbile mubanda bemanine. Yeshu wambile ngayi, “Ndumbana! Nikwamba kukwobe ngayi, pinduka!”

¹⁵ Mufu wapindukile, watatikile kwamba. Niho Yeshu wamubweshele kuli mandiyendi.

¹⁶ Bantu nimwabo bekalile na bowa niho bayemezele Nyambi ngayi, “Muluwe wamunene unezi mukatiketu.” Kami bambile ngayi, “Nyambi unazingulu bantu bendi!”

¹⁷ Mpupo yendi yatumbalalile mu Yundeya nimwamo na mu litunga lya hahepi nimwalyo.

Yeshu na Yowano Mukakuzubilisha

¹⁸ Oho bandongesha ba Yowano bamutongwezele byuma ebye nimwabyo, wehanine bandongesha bendi babili,

¹⁹ pe wabatumine kuli Mwene na kumwipula ngayi, “Kati obe uya watoyiwile ngayi ukeza ndi? Hinge tutatile wamina kami?”

²⁰ Oho bandongesha bezile kuli Yeshu, bambile ngayi, “Yowano Mukakuzubilisha unatutumu kukwobe na kwipula ngayi, ‘Kati obe uya watoyiwile ngayi ukeza ndi? Hinge tutatile wamina?’ ”

²¹ Ha shikati shiyo wanyongomanishile bakakukola babengi, bakamalweli wabo na baka mayimbwe, kami watoneshele tushishitwa babengi.

²² Niho Yeshu akumbwile kukwabo ngayi, “Bokenu mukatongweze Yowano ebye munamono nanebye munayuvwu. Tushishitwa ba ku mona, bakakupenga bakwenda, bakabimakwa ba kunyongomana, bizikamatu ba kuyuvwa, bafu ba kushanguka, kami ncango zaziwahe zikushimikiwa ku bakakushepwa.

²³ Bali na mfuywezi baya bakubula nkani hahami!”

²⁴ Oho bantumwana ba Yowano bayile, Yeshu watatikile kwamba ku likunge lya bantu ngayi, “Kati bishini mwayile mu ku mona mu libelelengwa? Kati lyengile litete likunyenkanishiwa na mpepo ndi?

²⁵ Ndi kaliha noho bishini boni mwayile mu ku mona? Mwakamonene muntu wavwalile bivwalo byabiwahe ndi? Byo, obo ba kuvwala bivwalo bya kulelema na kuyoya mu myelembo bali mu misheke ya bamyene.

²⁶ Ngoboni bishini mwayile mu ku mona? Mwayile mu ku mona muluwe wa Nyambi ndi? Ingoi, nikwamba kukwenu ngayi, uya mwamonene ukupitakana muluwe wa Nyambi.

²⁷ Ndaba Yowano niye ou kwatikitiwile byendi ngayi, ‘Nikatuma ntumwana wami kumbili yobe, ou ukawahisha nzila yobe!’

²⁸ Nikumitongweza ngayi, ku bantu nimwabo ba kuhemuwa hano hanci, kowa wakupitakana Yowano Mukakuzubilisha, ngoboni ou wamushe mu Wene wa Nyambi nengi wakupitakana Yowano.”

²⁹ Bantu nimwabo, hamo na bakakutelesha, oho bamuyuvwile, betabilile kwoloka kwa Nyambi ndaba bazubilishiwile kuli Yowano.

³⁰ Ngoboni Bafwalishi na bakakulongesha ndayano bakanine shifungo sha Nyambi mukatikabo, pe kaliha bazubilishiwile kukwendi.

³¹ Yeshu wambile ngayi, “Haya bantu ba mukoka ou nikabafwanikiza na bayani? Bakufweka ngo bayani?

³² Bakufweka ngo batwanuke banekala ha mwanya wakulandishila ba kubilikiza baminabo ngayi, ‘Twamishibili mpeta, ngoboni shilolo mushinde! Tunamimbetele tukonkobele, ngoboni shilolo mulile!’

³³ Oho Yowano Mukakuzubilisha ezile wazilile kulya mankende na kunwa waine, pe mwambile ngayi, ‘Uli na mayimbwe!’

³⁴ Mwana Muntu unezi mu kulya na kunwa, ngoboni mukwamba ngayi, ‘Monenu muntu wa mutongo na mukakukolwa, muhoni wa bakakutelesha na bakawubi!’

³⁵ Ngoboni ngana za Nyambi zikulimonekesha shiwahe ku bantu banazitambulu.”

Yeshu ku litala lya Shimoni Kafwalishi

³⁶ Umo wa Bafwalishi wehanine Yeshu kuya mu kulya nendi, pe Yeshu wayile ku litala lya nou Kafwalishi, wakekalile ku tebulu na kulya.

³⁷ Muya mu munzi mwekalile mbuyama ou wengile mukawubi, oho alimukile ngayi Yeshu wekalile na kulya mu litala lya Kafwalishi, waletele mushashi wa mazi a lukumba.

³⁸ Wemanine kunyima ya Yeshu ku mawulu wendi halila, niho azabishile mawulu a Yeshu na mihozi yendi. Wakunkumwine mawulu na huki za ku mutwe wendi, pe wawazupezele na kuwawabisha mazi.

³⁹ Oho Kafwalishi ou wamwihanine amonene noho, wambile mu mutima wendi ngayi, “Shinge ou muntu wenga muluwe wa Nyambi, shinga nalimuku ngayi ou mbuyama uli na kumukwata wa nahiti, ndaba wenga mukawubi!”

⁴⁰ Yeshu wakumbwile ngayi, “Shimoni, kuli ebye nikushinga kukutongweza.” Shimoni wakumbwile ngayi, “Ingoi, Mulongeshi ntongweze.”

⁴¹ Yeshu wamutongwezele ngayi, “Kwekalile muntu wamina wapanine mukuli wa mali wendi ku bantu babili. Umo wekalile na mukuli wa mali a myanda ya mutanu, wamina wa makumi a mutanu.

⁴² Oho babulile mali akumuhingishila, wabayatilile mikuli yabo wubili wabo. Nohobene ntongweze, kati yani hakati kabo ukumuhaka shikuma?”

⁴³ Shimoni wakumbwile ngayi, “Nikuhanganika ngayi ou ayatilile mukuli wawunene.” Yeshu wakumbwile ngayi, “Unayata shiwahe.”

⁴⁴ Watengulukilile kuli mbuyama, niho ambile kuli Shimoni ngayi, “Uku mona ou mbuyama ndi? Nengini mu litala lyobe, ngoboni shilolo umpane mema akuyowela ku mawulu. Ou mbuyama nayoweshe mawulu wami na mihozi yendi na kuwakunkumuna na huki za ku mutwe wendi.

⁴⁵ Shilolo unzupeze, ngoboni ou mbuyama hinga nenginina, kuleha ku zupeza mawulu wami wufwako.

⁴⁶ Shilolo ungwabishe mazi ku mutwe wami, ngoboni ou mbuyama unangwabishi mazi a lukumba ku mawulu.

⁴⁷ Nohobene nikukutongweza ngayi wubi wendi wawingi unayatiwili ndaba wahakile shikuma, ngoboni ou ukuyatiwila shashishe, uku haka shashishe.”

⁴⁸ Wambile kuli mbuyama ngayi, “Wubi wobe unayatiwili.”

⁴⁹ Niho baya bekalile kukulya hamo nendi, batatikile kwamba mukati kabo ngayi, “Kati yani ou ukuyatila wubi?”

⁵⁰ Ngoboni Yeshu wambile kuli mbuyama ngayi, “Kukulupila kwobe kunakupulwishi, yanga mu ku mwena.”