Luka 5 - Libuka Lya Kuyela

Yeshu ukwihana bandongesha bakutatika

¹ Mutena wamina, Oho Yeshu emanine ha shibumbo sha Liziba lya Ngeneshaleta, bantu babengi bamubumbililile na kuyuvwa lizu lya Nyambi.

² Wamonene mato abili hinga afuwama mu livwe, ngoboni bakakushashila bafuminemo, bekalile na kuyowesha tunyanzi twabo.

³ Yeshu wenginine mu wato wa Shimoni niho amulombele ngayi afuwule shashishe kufuma ku shibumbo. Niho Yeshu ekalile mu wato, pe walongeshele bantu.

⁴ Oho amanishile kwamba, wambile kuli Shimoni ngayi, “Henyenenu ku mema amatali, mumanyike tunyanzi, pe mu kuziha zinci.”

⁵ Shimoni wakumbwile ngayi, “Hekulu, tunakabakana wushiku nimwawo, shilolo tuzihe zinci, ngoboni ndaba ya lizu lyobe nikumanyika tunyanzi.”

⁶ Oho batendele eshe ambile, bazihile zinci zazingi, kami tunyanzi twabo twatatikile kutabuka.

⁷ Niho balabizile baminabo bekalile mu mato amina ngayi beze na ku bayavwa. Bezile, pe benzalishile mato abili na zinci kami ashingile kutewa.

⁸ Oho Shimoni Pita amonene shuma eshe, wawile ku manungo a Yeshu, pe wambile ngayi, “Fuma kukwami, obe Mwene! Nili muntu wamubi!”

⁹ Shimoni na baya bekalile nendi nimwabo bakomokele ndaba ya zinci zazingi bazihile.

¹⁰ Kami Yakoba na Yowano, bana ba Zebende baya bekalile na Shimoni nanibo kami bakomokele. Yeshu wambile kuli Shimoni ngayi, “Hinga utina, kufuma hano ukenga mukakushashila bantu.”

¹¹ Oho baletele mato wabo ku livwe, bashiyile nimwabyo, pe bamukonkele.

Yeshu ukunyongomanisha mulume wa bimakwa

¹² Oho Yeshu ekalile mu munzi wamina, kwezile mulume wakolelenga bimakwa. Oho amonene Yeshu, waliwishilile hanci, pe wamulombele ngayi, “Mwene, ndi ukushinga, ukutwesha kunyongomanisha.”

¹³ Yeshu wolwele liboko lyendi, wamukwatile, pe wambile ngayi, “Nikushinga, nyongomana!” Wanguwangu mukabimakwa wanyongomanine.

¹⁴ Yeshu wamutintikile ngayi, “Hinga utongwezako muntu, ngoboni yanga kuli mukankombela akakuzilulule, pe ukatupule ntupu ngonehe mwayila Ndayano za Moshesha akakumoneshe ku muntu nimwendi ngayi unanyongomana.”

¹⁵ Ngoboni mpupo ya Yeshu yatumbalalile shikuma na wingi wa bantu bakungulukile mu kumuyuvwa na kunyongomanishiwa ku malweli wabo.

¹⁶ Niho afumine, wayile ku mwanya kwaninkayendi mu kulombela.

Yeshu ukunyongomanisha mulume wa kalepa

¹⁷ Ha mutena wamina oho Yeshu alongeshelenga, kwekalile Bafwalishi na bakakulongesha ndayano, baya bafumine ku minzi nimwayo ya mu Ngalileya na Yundeya na ku Yelushalema. Ngovu za Mwene zekalile mumwendi ngayi anyongomanishe bakakukola.

¹⁸ Balume bamo baletele mulume ha wulili wakolelenga wulweli wa kalepa. Bashingile kumwingiza mu litala ngayi bamuyake kumbili ya Yeshu.

¹⁹ Oho babulile kuwana nzila ya kumwingiza mu litala ndaba ya likunge lya bantu, bamukandamishile hayilu ya litala. Batubwile litubwa niho bamushezumwishile ha wulili wendi mukati ka bantu kumbili ya Yeshu.

²⁰ Oho Yeshu amonene kukulupila kwabo, wambile ku mulume wa kalepa ngayi, “Muhoni, wubi wobe unayatiwili.”

²¹ Baka ku longesha ndayano na Bafwalishi batatikile kungunguta mu mitima yabo ngayi, “Kati yani ou ukwamba bya lihandu? Yani ukutwesha kuyatila wubi, kaliha Nyambi tuhu ndi?”

²² Ngoboni Yeshu walimukile bihanganiko byabo, pe wambile kukwabo ngayi, “Kati shumangani mu kuhanganika mu mitima yenu?

²³ Shawangu shiti, kwamba ngayi, ‘Wubi wobe unayatiwili,’ hinge kwamba ngayi, ‘Katuka wende?’

²⁴ Haya nikumimonesha mwanga mulimuke ngayi Mwana Muntu uli na ngovu hano hanci za kuyatila wubi.” Niho ambile ku mulume wa kalepa ngayi, “Nikwamba kukwobe ngayi, katuka, shimba wulili wobe uye ku litala lyobe.”

²⁵ Wanguwangu wakatukile oho bantu nimwabo hibamumona, washimbile wulili wendi, pe wayile ku litala lyendi hayemeza Nyambi.

²⁶ Bantu nimwabo bakomokele, niho bayemezele Nyambi. Bekalile na bowa, pe bambile ngayi, “Byuma tunamono lelo bya kukomokesha!”

Yeshu ukwihana Levi

²⁷ Kunyima yanebye, Yeshu watutikilile ha munkanda, pe wamonene mukakutelesha mutelo lizina lyendi Levi, hinga ekala mu litala lyendi lya kuteleshela. Wambile kukwendi ngayi, “Nkonke.”

²⁸ Levi wakatukile washiyile byuma nimwabyo, pe wamukonkele.

²⁹ Niho Levi apingilile Yeshu shimbo shashinene sha mayambwayambwa mu litala lyendi. Balile na likunge lyalinene lya bakakutelesha na bantu bamina obo bekalile nabo.

³⁰ Ngoboni Bafwalishi na bakakulongesha ndayano bangungutile ku bandongesha bendi ngayi, “Kati shumangani mu kulya na kunwa hamo na bakakutelesha na bakawubi?”

³¹ Yeshu wakumbwile kukwabo ngayi, “Bantu banzimba kushinga nganga bafwako, ndele bakakukola tuhu.

³² Kaliha nezile mukwihana bakakwoloka, ngoboni mukwihana bakawubi ngayi batenguluke.”

Liyipu lya ha kuzila kulya

³³ Bantu bambile kuli Yeshu ngayi, “Bandongesha ba Yowano ba kuzila kulya bikati byabingi na kulombela na bandongesha ba Bafwalishi. Ngoboni bandongesha bobe ba kulya na kunwa.”

³⁴ Yeshu wambile ngayi, “Kati bahoni ba mukashinawenga ba kuzila kulya oho mukashinawenga ushili nabo ndi?

³⁵ Ngoboni shikati shikeza oho mukashinawenga akafumishiwa kukwabo, niho bakazile kulya.”

³⁶ Yeshu watongwezele eye nguli ngayi, “Kowa muntu ukutabula shitabu ku shivwalo shashipya ha kushitopeka ha shivwalo sha mwaka. Ndi ukatenda noho shivwalo shashipya shikatabuka, kami shitabu shashipya kwendelela hamo na shivwalo sha mwaka shifwako.

³⁷ Kami kowa muntu wakulongela waine yayipya mu mbokoshi ya mwaka. Ndi muntu ukwinga noho, pe waine yayipya yikatabula mbokoshi iyo, kami waine yikayitika na mbokoshi yikabipa.

³⁸ Ngoboni waine yayipya yayakiwanga mu mbokoshi yayipya.

³⁹ Kami kowa muntu oho wanwakale waine ya mwaka ha kushinga kami yayipya, ndaba ukamba ngayi, ‘Waine ya mwaka yayiwahe.’ ”