Luka 3 - Libuka Lya Kuyela

Kushikila kwa Yowano mukakuzubilisha

¹ Mu mwaka wawulikumi na mutanu wakulela kwa Nkeshali Timbeliyashi, oho Pontiyashi Pilato engile kalela wa Yundeya na Helonda wengile kalela wa Ngalileya mukonzo wendi Fwilipu wengile kalela wa litunga lya Yituleya na litunga lya Tilakonitishi. Lishaniyashi wengile kalela wa Abilene

² na Anashi na Kayafwashi bengile Bakulwane ba Bakankombela Nimwabo, ha shikati shiyo lizu lya Nyambi lyezile kuli Yowano mwana Zakaliya mu libelelengwa.

³ Yowano wapitile mu litunga nimwalyo lyazingulukile Mushinzi wa Yondana washimikilenga ngayi, “Tengulukenu mu mitima, pe muzubilishiwe ngayi Nyambi amiyatile wubi wenu.”

⁴ Nehi kwatikitiwile mu libuka lya muluwe Ishaya ngayi, “Lizu lya mukakubilika mu libelelengwa ngayi, ‘Wahishenu mukwakwa wa Mwene, ololenu zinzila zendi.

⁵ Tungulungwa nimwato tukabuwiwa, mapili nimwawo na binkanda bikawululiwa. Na mikwakwa ya kukontama yikoloka, na zinzila zazibi zikalembululiwa.

⁶ Bantu nimwabo bakamona kulamwina kwa Nyambi.’ ”

⁷ Niho Yowano ambile ku makunge a bantu baya bezile kukwendi mu kuzubilishiwa ngayi, “Enu bana ba bampili! Yani namishiwululu ngayi mupanze ku wukali ukwiza?

⁸ Yimenu mikabo yiku monesha ngayi munatenguluku. Hinga mutatika kwamba mukati kenu ngayi, ‘Tuli na tatiyetu Abulahama.’ Haya nikumitongweza ngayi, Nyambi ukutwesha kufutula awa mamanya kwinga bana ba Abulahama.

⁹ Kazembe kanayakiwi ku mipishi ya mitondo, nohobene mutondo nimwawo ukubula kuyima mikabo yayiwahe ukatemiwa na kuyumbiwa mu mundilo.”

¹⁰ Bantu bepwile Yowano ngayi, “Haya tukenga nahiti?”

¹¹ Yowano wakumbwile ngayi, “Ou uli na bikobelo bibili, apanikeko minendi shimo uya nabulu, ou uli na byakulya, atende noho kami.”

¹² Bakakutelesha bamo bezile kukwendi mu kuzubilishiwa, bamwipwile ngayi, “Mulongeshi, kati tuku fwanina kwinga nahiti?”

¹³ Wabatongwezele ngayi, “Hinga mutelesha kupitakana ebye bikushingiwa.”

¹⁴ Banzita nabo bamwipwile ngayi, “Kati tuku fwanina kwinga nahiti?” Waba kumbwile ngayi, “Hinga mupukula sha muntu, hinga mubangila muntu, wahililenu nanebye mu kutambula.”

¹⁵ Bantu batatililile na nyumwa, pe nimwabo bacincokele mu mitima yabo hali Yowano ngayi kampe niye Kilishitu.

¹⁶ Yowano waba kumbwile nimwabo ngayi, “Nikumizubilisha na mema, ngoboni ou ukwiza munyima yami ukumpitakana, ku fwanina ku shobola mishulo ya makatulo wendi nifwako. Niye ukamizubilisha na Moyo wa Kuyela na mundilo.

¹⁷ Luhebe lwendi lwa kupepesha luli mu liboko ngayi akapepe loto lwendi. Ukabungika loto mu shishete shendi, ngoboni muzungu ukawuhokesha mu mundilo wakubula kuzima!”

¹⁸ Na zinzila zamina zazingi Yowano washimikilile ncango zaziwahe ku bantu, kami wabatongwezele ngayi batenguluke.

¹⁹ Ngoboni Yowano wakalihilile Mwene Helonda, ndaba ya kuyeka Helondiyashi mukaza mukonzo wendi na byabibi nimwabyo biya atendele.

²⁰ Niho Helonda atendele shuma sha shibi shikuma ha kuyaka Yowano mu tolongo.

Kuzubilishiwa kwa Yeshu

²¹ Oho bantu nimwabo bazubilishiwile, Yeshu kami wazubilishiwile. Oho alombelenga, liyilu lya shinkulukile,

²² na Moyo wa Kuyela washulumukilile hahendi mu shifwekesha sha litela. Pe kwezile lizu lyafumine muyilu ngayi, “Obe Mwanami nahaka, ukungwahililisha shikuma.”

Muhoko wa mazina a lupashi lwa Yeshu

²³ Oho Yeshu atatikile mulimo wendi, wekalile na myaka ya kushinga kulingana makumi ahatu. Wengile mwana ngonehe bantu bahanganikile ngayi mwana Yoshefwa, ou wengile mwana Heli,

²⁴ mwana Matati, mwana Levi, mwana Meleki, mwana Yananayi, mwana Yoshefwa,

²⁵ mwana Matatiya, mwana Amoshi, mwana Nahumi, mwana Eshili, mwana Nangayi,

²⁶ mwana Maati, mwana Matatiya, mwana Shimeni, mwana Yosheki, mwana Yonda,

²⁷ mwana Yowanani mwana Lesha, mwana Zelumbambelu, mwana Shelatiyele, mwana Neli,

²⁸ mwana Meleki, mwana Andi, mwana Koshamu, mwana Elimandame, mwana Ela,

²⁹ mwana Yoshuwa, mwana Eliyeza, mwana Yolima, mwana Matati, mwana Levi,

³⁰ mwana Shimiyoni, mwana Yunda, mwana Yoshefwa, mwana Yonamu, mwana Eliyakimu,

³¹ mwana Meliya, mwana Menina, mwana Matata, mwana Natani, mwana Ndavita,

³² mwana Njeshi, mwana Ombendi, mwana Mbowazi, mwana Shalimoni, mwana Nahishoni,

³³ mwana Aminandabe, mwana Andimini, mwana Alini, mwana Heziloni, mwana Pelizi, mwana Yunda,

³⁴ mwana Yakobo, mwana Ishaki, mwana Abulahama, mwana Tela, mwana Nahole,

³⁵ mwana Shelungi, mwana Leu, mwana Pelengi, mwana Emba, mwana Shela,

³⁶ mwana Kayinani, mwana Alifwashandi, mwana Shemu, mwana Nowa, mwana Lameki,

³⁷ mwana Metushela, mwana Enoki, mwana Yalendi, mwana Mahalale, mwana Kayinani,

³⁸ mwana Enoshi, mwana Sheta, mwana Andama, mwana Nyambi.