Luka 24 - Libuka Lya Kuyela

Kushanguka kwa Yeshu

¹ Ku lumenemene shikuma ha mutena wa Shunda, bambuyama bashimbile lukumba luyo bawahishile, niho bayile ku shinzimbi.

² Bawanine limanya linandumuku ku shinzimbi,

³ ngoboni oho bengininemo, kaliha bawanine mutuntu wa Mwene Yeshu.

⁴ Oho bashili kulikomokela shikuma, bamonene balume babili bavwalile bivwalo bya kubyazima, bemanine kwakwipi nabo.

⁵ Bambuyama batinine, pe banyongaminine hanci, bayo balume bambile kukwabo ngayi, “Ndabangani mu kushingila wamumi mukati ka bafu?

⁶ Ufwamo muno, ngoboni nashanguku. Anukenu eshe ambile kukwenu oho ushili mu Ngalileya ngayi,

⁷ ‘Mwana Muntu unafwanini kupanikiwa mu maboko a bakawubi na kukolekiwa na ku shanguka ku bafu ha mutena wa wuhatu.’ ”

⁸ Niho bambuyama banukile mazu wendi,

⁹ pe babokele kufuma ku shinzimbi, batongwezele byuma nimwabyo ebye ku balikumi na umo na bamina nimwabo.

¹⁰ Nibo Maliya waku Mangandalena na Njowana na Maliya manda Yakoba na bambuyama bamina bekalile hamo nabo bashimikile byuma ebye ku bantumwana.

¹¹ Ngoboni bantumwana kaliha bakulupilile bambuyama, ndaba mazu abo ayuvwanikile ngo byambo byowa.

¹² Niho Pita akatukile, wetukilile ku shinzimbi. Oho anyongamine na kwinangila mu shinzimbi, wamonene makwiza hinga abungana, pe wafumine na kukomoka eshe shatendiwile.

Mukala wa ku Emaushi

¹³ Ha mutena bene uyo, bandongesha babili ba Yeshu bayile ku munzi wa Emaushi, wengile mukala wakulingana makilomita likumi na limo kufuma ku Yelushalema.

¹⁴ Bayile hibalyambashana byuma nimwabyo biyo byatendiwile.

¹⁵ Oho bambwelenga na kulyambashana, Yeshu wahenyenene kukwabo na kwenda nabo hamo.

¹⁶ Ngoboni ngayi babulile kumulimuka.

¹⁷ Yeshu wambile kukwabo ngayi, “Kati ngambolo ngani eze mu kuya na kwambola oku mwenda?” Bemanine hinga bayena.

¹⁸ Umo wabo wa lizina lya Kilyopashi wamwipwile ngayi, “Kati obe uli muyeni mu Yelushalema, ukubula kulimuka ebye binatendiwimo matena ano ndi?”

¹⁹ Yeshu wabepwile ngayi, “Byumangani?” Bamukumbwile ngayi, “Bya Yeshu waku Nazaleta. Wengile muluwe, mazu wendi nanebye atendele byengile bya ngovu ku meho a Nyambi na ku bantu nimwabo.

²⁰ Bakankombela ba bakulwane na babilolo betu bamupanikile ngayi ayatiwile kufwa, pe bamukolekele.

²¹ Ngoboni etu twalumbezele ngayi niye eze akakulize Ishalela. Hinge noho, lelo hi mutena wa wuhatu kunyima ya kutendiwa kwa byuma ebye.

²² Kami bambuyama bamo ba kukwetu banatukomokeshe. Baya ku shinzimbi lumenemene,

²³ ngoboni shilolo bawane mutuntu wendi. Pe banezi na kututongweza ngayi, banamono shimonekesho sha mangeloyi awa anabatongweze ngayi Yeshu hayoya.

²⁴ Bamo mu kazunga ketu nanibo banayi ku shinzimbi banawana ngonehe banamba bambuyama ndaba ninabo shilolo bamumone.”

²⁵ Niho Yeshu ambile kukwabo ngayi, “Enu bibulangana ba mitima ya kwihala kukulupila nimwabyo ebye bambile bamiluwe!

²⁶ Kati kaliha shinafwanini ngayi Kilishitu ayande nahiyo na kwingina mu wuwahe wendi ndi?”

²⁷ Pe Yeshu wabatontwelele byuma nimwabyo byatikitiwile ndaba yendi, kutatika kuli Moshesha kukuma na ku bamiluwe nimwabo.

²⁸ Oho bahenyenene ku munzi kuya bayilenga, niye wengile ngo ukushinga kubapitakana,

²⁹ ngoboni bamukandikile bambile ngayi, “Yikala netu, mutena walelakale, kami kuli na kushipa.” Niho ayile na kwikala nabo mu litala.

³⁰ Oho ekalile nabo kukulya, watolele linkende, wakambililile, walipabwile, pe wabapanikile.

³¹ Niho meho abo ashinkulukile, pe bamulimukile, kami niye waziminine ku meho abo.

³² Niho bambile umo kuwamina ngayi, “Kati mitima yetu kaliha yinambwatuku oho ambilenga netu mu nzila na kututontwelela obyo byatikitiwile?”

³³ Bakatukile ha shikati shiyo bene babokele ku Yelushalema, oku bakawanine balikumi na umo, hinga ba kunguluka hamo na bamina,

³⁴ pe bambile ngayi, “Mwa shikuma Mwene nashanguku! Nalimonekeshe kuli Shimoni.”

³⁵ Niho baya babili batongwezele obyo byatendiwile mu nzila nomo bamulimukilile Mwene oho apabwile linkende.

Yeshu ukulimonekesha ku bandongesha bendi

³⁶ Oho baya babili bashili kwamba hanebye byatendiwile, wanguwangu Yeshu wemanine mukati kabo, pe wambile ngayi, “Ku mwena kwikale kukwenu.”

³⁷ Ngoboni bakankile na kutina, bahanganikile ngayi banamono kayebela.

³⁸ Yeshu wambile kukwabo ngayi, “Ndabangani mu kulikekula? Ndabangani muli na nkani mu mitima yenu?

³⁹ Monenu maboko wami na mawulu wami nka amibene. Nkwatenu mumone, ndaba kayebela kafwayo nyama na bifupa, ngonehe mu ku mona ngayi ami nilinabyo.”

⁴⁰ Oho ambile ebye, wabamoneshele maboko na mawulu wendi.

⁴¹ Hinge noho babulile kukulupila ndaba ya ku wahilila na kukomoka, Yeshu wabepwile ngayi, “Muli na byakulya kuno ndi?”

⁴² Bamupanikile mushunyi wa nyinci wakuyoha,

⁴³ niho atambwile wawulile ha meho abo.

⁴⁴ Yeshu wambile kukwabo ngayi, “Ebye nibyo namitongwezele oho nekalilenga nenu. Byuma nimwabyo byatikitiwa ndaba yami mu Ndayano za Moshesha na mu bamiluwe na mu Nyimbo binafwanini kutendiwa.”

⁴⁵ Niho Yeshu abanukishile ngayi bayuvwishishe ebye byatikitiwa.

⁴⁶ Wambile kukwabo ngayi, “Ebye nibyo byambiwile ngayi Kilishitu nafwanini kuyanda, pe akashanguke ku bafu ha mutena wa wuhatu,

⁴⁷ ngayi kutenguluka na kuyatila kwa wubi, ku shimikiwe mu lizina lyendi, ku bantu nimwabo, kutatikila mu Yelushalema.

⁴⁸ Enu muli bapaki ba byuma ebye.

⁴⁹ Nikamitumina shikulupisho sha Tate, ngoboni tatililenu mu munzi wawunene, hantu munatambulu ngovu za kufuma muyilu.”

Yeshu ukutwaliwa kuyilu

⁵⁰ Yeshu watwaminine bandongesha bendi kufuma mu munzi wawunene kuya ku Mbetani kuyo akatwile maboko wendi, niho abafuywezele.

⁵¹ Oho ushili ku bafuywezela, walitapile nabo, niho atwaliwile muyilu.

⁵² Nibo bamulemeshele, pe babokele ku Yelushalema hinga bawahilila shikuma.

⁵³ Bekalilenga mu Litala lya Nyambi bikati nimwabyo hibayemeza Nyambi.