Luka 23 - Libuka Lya Kuyela

Yeshu ba kumutwala kuli Pilato

¹ Kanzunga nimwako kakatukile katwalile Yeshu kuli Pilato,

² batatikile kumubangila ngayi, “Muntu ou tunamuwana ha shanwisha bantu betu na kukanisha bantu kutela mutelo kuli Nkeshali na kulitoya niye mwine ngayi niye Kilishitu Mwene.”

³ Pilato wamwipwile ngayi, “Kati obe Mwene wa Bayunda ndi?” Yeshu wakumbwile ngayi, “Ee, ngonehe eshe unamba.”

⁴ Niho Pilato ambile ku bakankombela ba bakulwane na ku likunge lya bantu ngayi, “Shilolo niwane mulandu wakuyata ou muntu.”

⁵ Ngoboni bazumananine shikuma ngayi, “Unakuleta mushunga nanebye aku longesha ku bantu nimwabo ba mu Yundeya. Watatikile mu Ngalileya haya unezi kuno.”

Yeshu ba kumutwala kuli Helonda

⁶ Pilato oho ayuvwile noho, wabepwile ngayi, “Kati ou muntu waku Ngalileya ndi?”

⁷ Oho alimukile ngayi Yeshu wafumine ku litunga lya Mwene Helonda, pe wamutumine kuli Helonda, ou wekalile ku Yelushalema ha shikati osho.

⁸ Helonda oho amonene Yeshu wawahililile shikuma, ndaba nimwaka washingilenga kumumona. Kufuma ha shikati oho ayuvwile byendi, kami washingile ngayi amone Yeshu hatenda bikomokesho.

⁹ Helonda wamwipwile mayipu amengi, ngoboni Yeshu kaliha wakumbwile shamina.

¹⁰ Bakankombela ba bakulwane na bakakulongesha ndayano bamubangilile shikuma.

¹¹ Helonda na banzita bendi bamukendwile na kumukumangiza. Bamuvwalikile likwiza lya kulelema, niho bamubweshele kuli Pilato.

¹² Mutena uyo bene, Pilato na Helonda balyambwililile wuhoni ndaba shikati sha kunyima balizimbile.

Yeshu ukuyatiwila lufu

¹³ Pilato niho ehanine bakankombela ba bakulwane na babilolo na bantu,

¹⁴ wambile kukwabo ngayi, “Munandetele muntu ou mukwamba ngayi unashanwishi bantu. Ngoboni aha nashingishishi byendi ku meho wenu, nifwako kumuwana na mulandu mumwendi ku byambo nimwabyo ebye muli na kumubangila.

¹⁵ Hinge Helonda shilolo awane mulandu mumwendi ndaba namubweshe kukwetu kowa mulandu anatende waku fwanina kumuzihila.

¹⁶ Nohobene nikumuzipula tuhu na kumushobola ngayi aye.”

¹⁷ Shikati nimwasho ha Shimbo sha Kupitilila wafwaninine kubashobwela umo wa batuyili.

¹⁸ Ngoboni likunge nimwalyo babilikizile ngayi, “Muzihe! Tushobolwele Mbalambashi!”

¹⁹ (Mbalambashi wayakiwile mu tolongo ndaba ya mulandu wa mushunga aletele mu munzi wawunene na wa mponde.)

²⁰ Nohobene Pilato washingile ku shobola Yeshu, pe wabepwile ka wubili.

²¹ Ngoboni babilikizile ngayi, “Mukoleke! Mukoleke!”

²² Pilato wambile kukwabo kawuhatu ngayi, “Ndaba ngani? Wubi ngani anatende? Nifwako kumuwana na mulandu mumwendi waku fwanina kumuzihila, nohobene nikumuzipula tuhu na kumushobola ngayi aye.”

²³ Ngoboni bazumananine na mazu akukangoka, babilikizile ngayi, “Akolekiwe.” Mazu wabo apitakanishile shikuma.

²⁴ Pe Pilato waketwile shambo ngayi kutendiwe eshe bakushinga.

²⁵ Washobolwele Mbalambashi ou bashingilenga, uya wayakiwile mu tolongo ndaba ya mulandu wa mushunga na wa mponde, niho abapanikile Yeshu ngayi batende ebye bashingilenga.

Yeshu ba kumukoleka ha shishempakano

²⁶ Oho banzita batwalilenga Yeshu, baliwanine na mulume waku Shilene, lizina lyendi Shimoni ou wafuminenga ku tuminzi, kwiza mu munzi wawunene. Bamukwatile na kumukulikisha shishempakano, pe washishimbile niho akonkelenga Yeshu munyima.

²⁷ Likunge lyalinene lya bantu bamukonkelenga. Hakati kabo hekalile bambuyama batuwilenga mbingo na kumulila.

²⁸ Yeshu wafutukile wambile kukwabo ngayi, “Enu bambuyama ba mu Yelushalema! Hinga mundila, ngoboni lililenu enu bamwine hamo na bana benu.

²⁹ Ndaba matena akwiza oho bantu bakamba ngayi, ‘Bali na mfuywezi bamiimba na Bambeleki bakubula kubeleka na mabele a kubula ku yamwisha!’

³⁰ Niho bantu bakamba ku mapili ngayi, ‘Wilenu hahetu!’ Na ku binkanda ngayi, ‘Tufwikenu!’

³¹ Ndaba ndi ba kutenda ebye oho mutondo wushili wakubombola, haya kukenga nahiti oho mutondo wakayuma?”

³² Kwekalile bikelemi byamina bibili byatwaliwile hamo na Yeshu mu kuzihiwa.

³³ Oho bakumine ku mwanya wukutumbiwa ngayi, “Kangawe,” oku bamukolekele hamo na bikelemi bibili, shimo ku shilyo shamina ku shimoho.

³⁴ Yeshu wambile ngayi, “Tate, bayatile ndaba kulimuka bafwako eshe ba kutenda.” Niho balitapilile bivwalo byendi na kukuna nyela.

³⁵ Bantu bemanine na ku shembuka, ngoboni batulela bamukumangizile bambile ngayi, “Wapulwishile baminendi, alipulwishe niye mwine, ndi niye Kilishitu mukakuhatiwa wa Nyambi!”

³⁶ Banzita kami bamukumangizile, bamupanikile waine ya vineka,

³⁷ pe bambile ngayi, “Ndi obe Mwene wa Bayunda, lipulwishe obe mwine!”

³⁸ Kwekalile mazu atikitiwile hayilu yendi mu Shingiliki na Shiloma na Shihebelu ngayi, “NIYE MWENE WA BAYUNDA.”

³⁹ Umo ku biyo bikelemi byakolekiwile hamo nendi wamukoshwelele ngayi, “Ndi obe Kilishitu, lipulwishe obe mwine nanetu!”

⁴⁰ Ngoboni wamina wamukalihilile ngayi, “Kati obe kutina Nyambi wufwako? Obe ukutambula ku shushuliwa ngonehe niye.

⁴¹ Mwa shikuma etu tunafwanini ku shushuliwa ndaba tukutambula ncuungu ya milimo yetu, ngoboni ou muntu kaliha natende byabibi.”

⁴² Niho ambile ngayi, “Yeshu, nyanuke oho ukakuma mu Wene wobe.”

⁴³ Yeshu wambile kukwendi ngayi, “Mwa shikuma nikwamba kukwobe ngayi, lelo ukwikala na nami mu Palandayishi.”

Lufu lwa Yeshu

⁴⁴ Shashingile kwinga shikati sha wulikumi na bibili kwekalile mincimpwe mu litunga nimwalyo, kukuma na ku shikati sha wulikumi na mutanu,

⁴⁵ kami likwiza lya mu wumbo lya mu Litala lya Nyambi lyatabukile hakati.

⁴⁶ Yeshu wabilikizile na lizu lyalinene ngayi, “Tate, ni kupana moyo wami mu maboko wobe!” Oho amanishile kwamba noho wafwile.

⁴⁷ Oho mukulwane wa banzita amonene ebye byatendiwile, wayemezele Nyambi na kwamba ngayi, “Mwa shikuma ou muntu wengile wakwoloka!”

⁴⁸ Bantu nimwabo baya bezile na ku shembuka, oho bamonene ebye byatendiwile, babokele ku minzi yabo, balikamine ha tupumpo hinga baye na.

⁴⁹ Nimwabo baya bamulimukile Yeshu na bambuyama baya bamukonkele ha kufuma ku Ngalileya, bemanine kwakutali na kutilamina byuma ebye.

Kufundiwa kwa Yeshu

⁵⁰ Kwekalile mulume watumbiwile Yoshefwa waku Alimatiya, umo wa bakankuta, wengile mulume wamuwahe, wakwoloka,

⁵¹ kaliha wetabilile ku nimwabyo bahanganikile na nobyo batendele. Wengile waku Alimatiya munzi wa mu Yunda, uya watatilililenga kwiza kwa Wene wa Nyambi.

⁵² Mulume uyo wayile kuli Pilato mu kunyepa mutuntu wa Yeshu.

⁵³ Wawupatwile ha shishempakano, wawuvungilile mu likwiza, pe wawulangikile mu shinzimbi shakabiwile mu mamanya, muyo mwabulile kufundiwa muntu.

⁵⁴ Wengile Mutena Wakuliwahishila, oho shilolo Mutena wa Kukatala utatike.

⁵⁵ Bambuyama obo bafumine na Yeshu ku Ngalileya, bakonkelenga Yoshefwa, pe bamonene shinzimbi na mutuntu wa Yeshu eshe bawulangikile.

⁵⁶ Babokele mu kuwahisha wanga na mazi a lukumba akunuka shiwahe. Ha Mutena Wakukatala, bakatalile kuya mwayila ndayano.