Luka 22 - Libuka Lya Kuyela

Bihanganiko bya kubeba Yeshu

¹ Shimbo sha Mankende A kubula Mumena, shikutumbiwa ngayi Shimbo sha Kupitilila sha kumine hahepi.

² Bakankombela ba bakulwane na bakakulongesha ndayano batinine bantu, pe bashingile nzila ya kuziha Yeshu kuwi.

Yundashi ukwitabila kubeba Yeshu

³ Niho Shatana enginine muli Yundashi watumbiwile Ishikalyote, ou wengile umo wa bandongesha likumi na babili.

⁴ Pe Yundashi wayile mu kulyambashana na bakankombela ba bakulwane na babilolo eshe afwanina kubeba Yeshu kukwabo.

⁵ Bawahililile, pe baliyuvwashanine kumupanika mali.

⁶ Yundashi wetabilile, pe washingilenga shikati sha kufwanina kupana Yeshu kukwabo kwakubula kulimuka bantu.

Yeshu ukuwahisha kulya mulalilo wa Shimbo sha Kupitilila

⁷ Mutena wa Mankende A kubula Mumena wakumine uyo bafwaninine kuziha mwana mbelele.

⁸ Yeshu watumine Pita na Yowano wambile kukwabo ngayi, “Yenunga mukatuwahishile mulalilo wa Shimbo sha Kupitilila ngayi mwanga tukalye.”

⁹ Bandongesaha bepwile ngayi, “Kuti oku ukushinga ngayi tukawahishe?”

¹⁰ Yeshu wakumbwile ngayi, “Oho mukengina mu munzi wawunene, mukalihangana na mulume hinga ashimba ntesho ya mema. Mukonkenu kukuma na ku litala muya akengina.

¹¹ Mukatongweze mwine litala ngayi, ‘Mulongeshi unamba ngayi, kati litala lya bayeni oku nikalila mulalilo wa Shimbo sha Kupitilila na bandongesha bami lilikuti?’

¹² Niye ukamimonesha litala lyalinene lya kuyilu, linawahishiwi mwaka, muyo nimo mukatuwahishila.”

¹³ Bandongesha bayile, bawanine ngonehe abatongwezele Yeshu. Niho bawahishile byakulya bya Shimbo sha Kupitilila.

Mulalilo wa Mwene

¹⁴ Oho shikati sha kumine, Yeshu wekalile ku tebulu hamo na bantumwana.

¹⁵ Wambile kukwabo ngayi, “Nashingi shikuma kulya nenu bya Shimbo sha Kupitilila oho shilolo niyande!

¹⁶ Nikumitongweza ngayi, kukalya kami bya Shimbo sha Kupitilila nifwako, hantu shinalubuluku shiwahe mu Wene wa Nyambi.”

¹⁷ Yeshu watolele nkomoki, wakambililile, pe wambile ngayi, “Tambulenu, nwenumo nimwenu.

¹⁸ Nikumitongweza ngayi, ku kanwa kami bya mikabo ya mikolobozi ya shinyanca nifwako, hantu Wene wa Nyambi unezi.”

¹⁹ Yeshu watolele linkende, wakambililile kuli Nyambi, walipabwile, pe wapanikile bandongesha bendi wambile ngayi, “Olu nilwo lutu lwami, lunapanikiwi ndaba yenu. Tendenu eshe ngayi munyanukilengaho.”

²⁰ Munyima ya mulalilo watolele nkomoki wakambililile kuli Nyambi, wapanikile bandongesha bendi wambile ngayi, “Eye niyo nkomoki ya kulimama kwakupya na mukeza wami ou wunamiyitikili.

²¹ “Ngoboni, monenu! Liboko lya nou ukambeba lili na nami hano ha tebulu.

²² Mwana Muntu ukafwa ngonehe Nyambi afungile, ngoboni makando wendi muntu uyo ukamubeba!”

²³ Pe batatikile kuliyipula umo na wamina ngayi, “Kati yani kukwetu ukatenda ebye?”

Nkani ha wamunene shikuma

²⁴ Bandongesha balikananganishilenga mukati kabo ngayi yani ukenga wamunene shikuma.

²⁵ Yeshu wambile kukwabo ngayi, “Bamyene ba bakamatunga bali na ngovu ha bantu, kami batulela ba ku haka kutumbiwa ngayi, ‘Bahoni ba bantu.’

²⁶ Ngoboni hinga kwinga noho kukwenu. Haya nimwendi ukushinga kwinga wamunene kukwenu, enge ngo wamushe, kami mukakutwaminina enge ngo mukamulimo.

²⁷ Kati wamunene yani? Ou ukwikala ku tebulu na kulya ndi ou ukumutendela mulimo? Kati kaliha ou ukwikala ku tebulu na kulya ndi? Ngoboni ami nili hakati kenu, ngonehe ou ukutenda mulimo.”

²⁸ Enu munekala nami mu byezeko nimwabyo.

²⁹ Nikamipana wene ngonehi Tate ampanine wene.

³⁰ Mukalya na kunwa ku tebulu yami mu Wene wami, kami mukekala ha matanda na kuyata mishobo ya likumi na yibili ya Ishalela.

Yeshu ukulubulula ngayi Pita ukamukana

³¹ Yeshu wambile ngayi, “Shimoni, Shimoni, yuvwilila! Shatana unalombo ngayi amipepe nimwenu ngonehe ndimi apepanga loto.

³² Ngoboni nakulombelele obe Shimoni ngayi kukulupila kwobe hinga kupopa. Pe wakatenguluka, ukashumishe bawushinda wobe.”

³³ Pita wambile ngayi, “Mwene naliwahishili kuya mukwingina nobe mu tolongo hinge kufwa tukafwa hamo!”

³⁴ Yeshu wambile ngayi, “Pita nikukutongweza ngayi, wushiku unobene, oho likombwe shilolo likuwe, ukankana kahatu ngayi kundimuka wufwako.”

Shikwama na shipawupawu na mukwale

³⁵ Yeshu wabepwile ngayi, “Oho namitumine kwakubula shikwama hinge mpamba hinge ncangwa, mwabulile shamina ndi?” Bakumbwile ngayi, “Kaliha twabulile shamina.”

³⁶ Yeshu wambile ngayi, “Ngoboni wuluno, ou uli na shikwama hinge mpamba abishimbe na nou wakubula mukwale alandishe shivwalo shendi mwanga alande mukwale.

³⁷ Ndaba nikumitongweza ngayi, ebye byatikitiwile binafwanini kutendiwa hahami ngayi, ‘Walabiwilile kumo na bababi,’ ndaba ebye byatikitiwile byami byafwanini kutendiwa.”

³⁸ Bandongesha bambile ngayi, “Mwene, mona! Mikwale yibili yino!” Yeshu wakumbwile ngayi, “Kunalingana!”

Yeshu ukulombela ha lipili lya mitondo ya Olive

³⁹ Yeshu watutikile, wayile ku lipili lya mitondo ya Olive ngonehe shiheka shendi na bandongesha bendi bamukonkele.

⁴⁰ Oho akumine ku mwanya uyo, wambile kukwabo ngayi, “Lombelenu kutina mwingina mu byezeko.”

⁴¹ Yeshu wafumine kukwabo shashishe, mukala wakufwanikiza kupuha limanya, wafunkamine, pe walombelele ngayi,

⁴² “Tate, ndi shikutwesheka, fumisha eye nkomoki ya makando kukwami, ngoboni hinga kutendiwa ebye nikushinga, kutendiwe shamutima wobe.”

⁴³ Lingeloyi lyafumine muyilu, lyaholokele kuli Yeshu na kumushumisha.

⁴⁴ Hinga akalikiza, walombelele shikuma, litengela lyendi lyengile ngo mukeza ukuvwila hanci.

⁴⁵ Yeshu oho amanishile kulombela, wakatukile wabokele ku bandongesha bendi, wabawanine bali mu tulo ndaba ya kuyena.

⁴⁶ Wambile kukwabo ngayi, “Shumangani munalanganini? Pindukenu mulombele, kutina mwingina mu byezeko.”

Kukwatiwa kwa Yeshu

⁴⁷ Oho Yeshu ushili kwamba, kwezile likunge lya bantu na Yundashi, umo wa bandongesha likumi na babili, uya wabatwaminine. Wayile kuli Yeshu na kumuzupeza.

⁴⁸ Ngoboni Yeshu wambile kukwendi ngayi, “Yundashi, kati ukubeba Mwana Muntu na kumuzupeza ndi?”

⁴⁹ Bandongesha bekalile hahepi na Yeshu oho bamonene ebye byatendiwilenga, bepwile Yeshu ngayi, “Mwene, tulwe na mikwale ndi?”

⁵⁰ Umo wabo waketwile litu lya shilyo lya ndungo wa Mukulwane wa Bakankombela Nimwabo.

⁵¹ Ngoboni Yeshu wambile ngayi, “Lehenusho!” Wakwatile litu lya uya ndungo, pe wamunyongomanishile.

⁵² Niho Yeshu ambile ku bakankombela ba bakulwane na babilolo ba mu Litala lya Nyambi na bakulwane ba Bayunda bezile kukwendi mu kumulwisha ngayi, “Munezi na mikwale na mishako mu kunkwata ngo nili mwizi ndi?

⁵³ Nekalile nenu matena nimwawo mu Litala lya Nyambi, ngoboni kaliha mwankwatile. Ngoboni shino shinengi shikati shenu na sha ngovu za mincimpwe.”

Pita ukukana Yeshu

⁵⁴ Niho bakwatile Yeshu, bamutwalile ku litala lya Mukulwane wa Bakankombela Nimwabo. Pita wakonkelenga hahatali.

⁵⁵ Bayibikile mundilo mu mbanza, pe Pita wekalile hamo na baya bekalileko.

⁵⁶ Niho mbuyama umo mukamulimo amumonene hayota mundilo, wamuconcomekele, pe wambile ngayi, “Ou muntu naniye kami wekalilenga na Yeshu!”

⁵⁷ Ngoboni Pita wakanine ngayi, “Mbuyama, kumulimuka nifwako!”

⁵⁸ Oho kwapitile kashikati kakashe, muntu umo wamonene Pita, pe wambile ngayi, “Nobe kami uli umo wabo!” Ngoboni Pita wambile ngayi, “Obe mulume kaliha ami!”

⁵⁹ Kunyima ya shikati shimo, niho kwezile wamina kami, wazaminine ngayi, “Mwa shikuma ou muntu naniye kami wekalilenga nendi, ndaba waku Ngalileya!”

⁶⁰ Ngoboni Pita wambile ngayi, “Obe mulume, kulimuka ebye ukwamba nifwako!” Oho ushili kwamba, likombwe lya kuwile.

⁶¹ Mwene wafutukile watilaminine Pita. Niho Pita anukile lizu liya ambile Yeshu kukwendi ngayi, “Oho likombwe shilolo likuwe lelo, obe ukankana kahatu.”

⁶² Pita watutikile ha munkanda, pe walilile shikuma.

Yeshu ukukumangiziwa na kukamiwa

⁶³ Balume aba balaminenga Yeshu, bamukumangizile kami bamukamine,

⁶⁴ bamufwikile ku meho, pe bambile ngayi, “Toya, ou unakukama yani?”

⁶⁵ Bambile mazu amengi akumuhandula.

Yeshu ukuyatishiwa

⁶⁶ Oho kwashile, bakulwane ba Bayunda na bakankombela ba bakulwane na bakakulongesha ndayano bakungulukile, pe bamutwalile ku nkuta yabo.

⁶⁷ Bambile ngayi “Tutongweze ndi obe Kilishitu.” Yeshu wakumbwile ngayi, “Ndi nikamitongweza, kukankulupila mufwako,

⁶⁸ hinge ndi nikamipula, kukankumbula mufwako.

⁶⁹ Ngoboni wuluno Mwana Muntu ukekala ku liboko lya shilyo lya Mpandashilanga.”

⁷⁰ Nimwabo bepwile ngayi, “Kati obe Mwana Nyambi ndi?” Yeshu wakumbwile ngayi, “Munamba shiwahe ngayi ami.”

⁷¹ Niho bambile ngayi, “Bihi tushili kushinga wupaki wamina kami? Tunaliyuvwili ebye anamba.”