Luka 21 - Libuka Lya Kuyela

Ntupu ya mfwile

¹ Oho atilaminine, Yeshu wamonene bakakuheta hibayaka bishemo byabo mu shikongelo sha mu Litala lya Nyambi.

² Wamonene kami mukazi wakushepwa wa mfwile, wayakilemo tumali twatushe tubili twa kopa.

³ Yeshu wambile ngayi, “Mwa shikuma nikumitongweza ngayi, ou mukazi wakushepwa wa mfwile unayaka byabingi kupitakana bamina nimwabo.

⁴ Ndaba nimwabo banapana bishemo kuli Nyambi kuya ku wingi wa wuheti wabo, ngoboni ou mukazi unayaka nimwabyo bya kushepwa kwendi, ebye afwanina kuliyoyesha nabyo.”

Yeshu ukwamba bya ha ku shiwuka kwa Litala lya Nyambi

⁵ Bamo ku bandongesha bendi batoyelenga bya Litala lya Nyambi eshe lyawahishiwile na mamanya amawahe na zintupu zatupuliwile kuli Nyambi. Yeshu wambile ngayi,

⁶ “Nimwabyo ebye mu ku mona, shikati shikeza oho kukabula limanya limo lili hayilu ya limanya lyamina liya likabula kwandumukila hanci.”

Makando na malwa

⁷ Bandongesha bepwile Yeshu ngayi, “Mulongeshi, ebye bikamoneka mwaka ngani? Kami shilimukisho shiti oho byuma ebye bikatendiwa?”

⁸ Yeshu wakumbwile ngayi, “Keyenu, hinga mwongeziwa. Ndaba babengi bakeza mu lizina lyami, bakamba ngayi, ‘Ami Kilishitu!’ Kami bakamba ngayi, ‘Shikati shakumakale!’ Nohobene hinga mubakonka.

⁹ Oho mukayuvwa mpupo ya zinzita na bya kulifutulukila hinga mutina, ndaba nibyo biku fwanina kwikalako ha kutatika, ngoboni mamaninino shilolo akume.”

¹⁰ Niho ambile kukwabo ngayi, “Litunga likafutulukila litunga lyamina, kami wene wukafutulukila wene wamina.

¹¹ Kukekala kukanka kwakunene hano hanci, kami mu zimbalila nimwazo mukekala malweli a limbo na kapande na bya kutinisha na bilimukisho byabinene bya muyilu bikekalako.

¹² Ngoboni byuma ebye nimwabyo oho shilolo bimoneke, bantu bakamikwata na kumiyandisha. Bakamitwala mu mashinangonge na kumiyata na kumiyaka mu zitolongo. Bakamitwala ku bamyene na batulela ndaba ya lizina lyami.

¹³ Eshe shikenga shikati shenu sha kubatongweza ncango zaziwahe.

¹⁴ Nohobene biyakenu mu mitima yenu, kami hinga mukalikekula na kuhanganika ngayi mukakumbula nahiti.

¹⁵ Ndaba nikamipanika mazu na ngana, ngayi ku bakankole benu kukabule hinge umo wakumikumbula hinge kumi kananganisha.

¹⁶ Mukabebiwa ku bahemi benu na bakalivumo lyenu na bawushindawenu na bahoni benu, kami bamo kukwenu bakabaziha.

¹⁷ Bantu nimwabo bakamizimba ndaba ya lizina lyami.

¹⁸ Ngoboni kowa hinge luhuki lumo lwa ku mitwe yenu lukayonga.

¹⁹ Ou ukazumanana niye ukayoyesha moyo wendi.

Yeshu ukwamba bya ha ku shiwuka kwa Yelushalema

²⁰ “Ngoboni oho mukamona Yelushalema banamuzinguluku bakanzita, limukenu ngayi kuloba kwendi kuli hahepi.

²¹ Niho baya bali mu Yundeya batinine ku mapili, kami baya bali mu munzi wawunene batutikemo, kami baya bali mu litunga hinga bengina mu munzi wawunene.

²² Ndaba awa akenga ‘Matena Akashushwilo,’ ngayi ebye byatikitiwile nimwabyo bitendiwe.

²³ Makando wabo baya bakemita na baya bakayamwisha ha matena ayo! Makalikiza amanene akekala hano hanci na wukali wa Nyambi wukekala ha bantu aba.

²⁴ Bamo bakazihiwa na mukwale, kami bamina bakakwatiwa na kutwaliwa hinga benga bantapwa ku matunga nimwawo. Yelushalema ukalyatangiliwa ku bakamatunga, hantu shikati sha bakamatunga shinakumu.

Kwiza kwa Mwana Muntu

²⁵ “Kukekala bilimukisho ku mutena na ngonda na nyenye. Kami hano hanci bakamatunga bakekala mu makalikiza na kulikomokela ku kunkwancana kwa liwate na mankanyi.

²⁶ Bantu bakalunguka ndaba ya bowa ha ku mona byuma ebye bikeza mu kaye kumbili, ndaba ngovu za muyilu zikankwancana.

²⁷ Niho Mwana Muntu ukamoneka heza mu likumbi na ngovu zazinene na wuwahe.

²⁸ Oho byuma ebye bikutatika kutendiwa, katukenu, pe yimbwilenu meho kuyilu, ndaba kukuliza kwenu kwakumakale hahepi.”

Shilongesha sha ha mutondo wa mukuyu

²⁹ Niho Yeshu abatongwezele eye nguli ngayi, “Hanganikenu ha mutondo wa mukuyu na bitondo nimwabyo.

³⁰ Oho mu ku mona hibikuzobela mabizi mu kulimuka enu bamwine ngayi mayinza ali hahepi.

³¹ Nohobene kami nanenu, oho mukamona byuma ebye bili na kutendiwa, limukenu ngayi Wene wa Nyambi uli hahepi.

³² “Mwa shikuma nikwamba kukwenu ngayi, mukoka ou kukamana wufwako hantu ebye nimwabyo binatendiwi.

³³ Liyilu na hanci bikamana, ngoboni mazu wami kukamana afwako.

Kwikala ba kukeya

³⁴ “Keyenu! Kutina mitima yenu yihanganika shikuma ha byakulya, kukolwa na kulifulankana bya wumi uno, ngayi mutena uyo ukamibazumune, umishiwukile ngo shiliba.

³⁵ Ndaba ukashiwukila baya bantu nimwabo bali hano hanci.

³⁶ Tonenu shikati nimwasho na kulombela ngayi mutweshe kupanza ku byuma ebye nimwabyo bikatendiwa na kutwesha kwimana kumbili ya Mwana Muntu.”

³⁷ Yeshu walongeshelenga mu Litala lya Nyambi ha mutena ha mutena, kami mazolo wayilenga na kukonkamina ha lipili lya mitondo ya Olive.

³⁸ Pe ku lumenemene shikuma bantu nimwabo bayilenga mu Litala lya Nyambi mu kuyuvwa mazu wendi.