Luka 20 - Libuka Lya Kuyela

Liyipu lya ha ngovu za Yeshu

¹ Ha mutena umo oho Yeshu alongeshelenga bantu mu shipango sha Litala lya Nyambi na ku shimikila ncango zaziwahe, bakankombela ba bakulwane na bakakulongesha ndayano, hamo na bakulwane ba Bayunda bezile kukwendi,

² pe bambile ngayi, “Kati ukutenda byuma ebye na ngovu ngani? Kami yani wakupanine eze ngovu?”

³ Yeshu wakumbwile ngayi, “Ami kami nikumipula liyipu. Ntongwezenu,

⁴ kati kuzubilisha kwa Yowano kwafumine muyilu ndi kwafumine ku bantu?”

⁵ Batatikile kulikananganisha mukati kabo ngayi, “Ndi tukwamba ngayi, kwafumine muyilu, pe niye ukatwipula ngayi, ‘Ndabangani mwabulile kumukulupila?’

⁶ Ngoboni ndi tukwamba ngayi, ‘Kwafumine ku bantu,’ pe bantu nimwabo bakatupuha mamanya, ndaba ba kulimuka shiwahe ngayi Yowano wengile muluwe.”

⁷ Bakumbwile ngayi, “Kulimuka tufwako oku zafumine.”

⁸ Yeshu wambile kukwabo ngayi, “Nami kami kumitongweza eze ngovu nikutenda nazo byuma ebye nifwako.”

Nguli ya bandimi ba mu mfuba ya shinyanca

⁹ Niho Yeshu atongwezele bantu eye nguli ngayi, “Kwekalile muntu wamina wakunine mfuba ya shinyanca, pe wayakilemo bandimi, niho ayile ku litunga lyamina na kwikalako shikati shashitali.

¹⁰ Oho shikati sha kubuya mikabo sha kumine, watumine mukamulimo wendi ku bandimi ngayi akashimbeko mikabo. Ngoboni bandimi bamukamine, niho bamutandile kwakubula shamina.

¹¹ Watumine kami mukamulimo wamina naniye bamukamine, bamutendele shibi, kami bamutandile kwakubula shamina.

¹² Watumine wa wuhatu naniye kami bamulemekele niho bamutandile.

¹³ Niho mwine mfuba ambile ngayi, ‘Nikwinga nahiti? Nikatuma mwanami ou nahaka shikuma, kampe bakamupana maleema oho bakamumona!’

¹⁴ Oho bandimi bamumonene, balyambashanine ngayi, ‘Niye ncwana, tumuzihenu, ngayi likona linge lyetu.’

¹⁵ Nohobene bamuyumbilile ku nciza ya mfuba, pe bamuzihile.” Yeshu wambile ngayi, “Haya mwine mfuba ya shinyanca ukatenda nahiti ku bandimi bayo?”

¹⁶ “Ukeza na kuziha bayo bandimi na kupanika mfuba ku bandimi bamina.” Oho bantu bayuvwile eshe, bambile ngayi, “Eshe hinga shitendiwa!”

¹⁷ Yeshu wabatilaminine, wambile ngayi, “Haya bikutontoloka nahiti ebye byatikitiwile ngayi, ‘Limanya liya bakanine bakakutenda matala, nilyo linafutuku kwinga limanya lya ku shuma lya mu mbango.’

¹⁸ Nimwendi ukawila ha limanya liyo, ukapokoka. Ngoboni ou likawila, likamucancola.”

Liyipu lya ha kutela mutelo

¹⁹ Baka ku longesha ndayano na bakankombela ba bakulwane bashingile kukwata Yeshu, ndaba balimukile ngayi nibo atoyelenga mu iyo nguli, ngoboni batinine bantu.

²⁰ Niho bashingilenga shikati shinafwanini. Bapanine lizika kanwa ku bantu, ngayi balimonekeshe ngo babawahe, mwanga bakwate Yeshu na mazu wendi, pe bamupanike mu maboko a Kalela wa Baloma ndaba niye wekalile na ngovu na nyala nimwazo.

²¹ Bepwile Yeshu ngayi, “Mulongeshi, tukulimuka ngayi ebye ukwamba nanebye uku longesha byakwoloka, kami kuhota muntu wamina wufwako, ngoboni uku longesha nzila ya Nyambi na kupwisha.

²² Kati shiku fwanina ngayi tutele mutelo kuli Nkeshali ndi hinga tutela?”

²³ Ngoboni Yeshu walimukile ku shoshoka kwabo, niho ambile kukwabo ngayi,

²⁴ “Moneshenu mali.” Pe wabepwile ngayi, “Shifwekesha shiliho na lizina linatikitiwiho byayani?” Bambile ngayi, “Bya Nkeshali.”

²⁵ Yeshu wambile kukwabo ngayi, “Haya panikenu Nkeshali byuma bya Nkeshali, kami panikenu Nyambi byuma bya Nyambi.”

²⁶ Kaliha batweshele kumukwata na mazu aya ambile mukati ka bantu, pe bamwenene tuhu na kukomoka ku nkumbwilo yendi.

Liyipu lya ha ku shanguka ku bafu

²⁷ Niho Bashanduki bamo, baya bambanga ngayi kowa ku shanguka ku bafu bezile kuli Yeshu, pe bamwipwile ngayi,

²⁸ “Mulongeshi, Moshesha watikitile kukwetu ngayi, ‘Ndi yaya muntu unafu, ha ku shiya mukazendi kwa kubula bana, mukonzo wendi nafwanini ku yeka uya mfwile, mwanga abelekeleko yayiyendi bana.’

²⁹ Nohobene kwekalile balume mutanu na babili, bana ba muntu umo. Wa mukulwane wayekele mukazi, ngoboni wafwile hinga abula bana.

³⁰ Wa wubili wamuyekele naniye wafwile kwakubula bana.

³¹ Na wa wuhatu wamuyekele, kwengile noho ku nimwabo ba mutanu na babili, bafwile kubula ku shiya bana.

³² Kunyima yabo na uya mukazi kami wafwile.

³³ Nohobene ha mutena waku shanguka ku bafu, uya mukazi ukenga wa yani? Ndaba ba mutanu na babili nimwabo bamuyekele.”

³⁴ Yeshu wakumbwile kukwabo ngayi, “Balume na bakazi ba litunga lino ba kuyeka na kuyekiwa,

³⁵ ngoboni obo bakalabiwila ku litunga lya kumbili na ku kushanguka ku bafu, nibo kukayeka, hinge kuyekiwa bafwako.

³⁶ Bakenga ngo mangeloyi, pe kukafwa bafwako. Bengakale bana ba Nyambi, ndaba banashanguku ku bafu.

³⁷ Moshesha naye wamoneshele shiwahe ngayi bafu bakashanguka ku wumi mu mazu akwamba ha kubanga kwa lipukumuna, Moshesha ukutoya Mwene ngayi, ‘Nyambi wa Abulahama, Nyambi wa Ishaki na Nyambi wa Yakobo.’

³⁸ Kaliha wenga Nyambi wa bafu, ngoboni Nyambi wa babomi, ndaba kukwendi bantu nimwabo benga babomi.”

³⁹ Bamo Baka ku longesha ndayano bakumbwile ngayi, “Hekulu, unamba shiwahe!”

⁴⁰ Ndaba kaliha batweshele kumwipula liyipu lyamina.

Kilishitu wenga Mwana yani?

⁴¹ Yeshu wabepwile ngayi, “Haya bakwamba nahiti ngayi Kilishitu wenga mwana Ndavita?

⁴² Ndaba Ndavita niye mwine wambile ku libuka lya Nyimbo ngayi, ‘Mwene wambile kuli Mwene yami ngayi, yikala ku liboko lyami lya shilyo,

⁴³ hantu nafutulu bamalamo bobe, kwinga shipona sha kulyata mawulu wobe.’

⁴⁴ Ndavita wamutoyele ngayi, ‘Mwene,’ haya ukwinga mwanendi nahiti?”

Yeshu ukunyanca bakakulongesha ndayano

⁴⁵ Oho bantu nimwabo bekalile na kumuyuvwilila, Yeshu wambile ku bandongesha bendi ngayi,

⁴⁶ “Keyenu na bakakulongesha ndayano. Bashinga kwenda hinga bavwala bivwalo byabitali na ku haka ku shangwishiwa mu myanya ya kulandishila na kwikala ha bipona bya kumbili mu mashinangonge na myanya ya maleema ku bimbo bya mayambwayambwa.

⁴⁷ Bakuyibila bakazi ba bamfwile byuma byabo, kami ba kulyongeza na malombelo amatali. Bantu banoho bakatambula kashushwilo kakanene.”