Luka 2 - Libuka Lya Kuyela

Kuhemuwa kwa Yeshu

¹ Mu matena ayo Nkeshali Ongashitashi wapanine ndayano ngayi kulabiwe bakalitunga lya Loma nimwabo.

² Oku kwengile kulaba kwa kutatika kwekalileko oho Kwiliniyashi engile kalela wa Shiliya.

³ Niho muntu nimwendi wayile na kulitikitisha ku munzi wendi.

⁴ Na Yoshefwa kami wafumine ku Ngalileya ku munzi wa Nazaleta, wayile ku Yundeya ku munzi wa Mwene Ndavita ukutumbiwa Mbetelehema, ndaba niye wengile wa liziko lya Ndavita.

⁵ Wayile na kulitikitisha hamo na Maliya ou abalikilile kami wekalile na livumo.

⁶ Oho bekalile ku Mbetelehema shikati shendi sha kubeleka sha kumine.

⁷ Wabelekele mweli wendi wa mulume, wamuvungilile mu likwiza, wamuyakile mu linkuluba, ndaba kaliha bawanine mwanya mu litala lya bayeni.

Balishani na Mangeloyi

⁸ Mu litunga liyo mwekalile balishani balaminenga matanga abo mu mbuwa wushiku.

⁹ Lingeloyi lya Mwene lyaholokele kukwabo, pe wuwahe wa Mwene wabamunikile. Niho batinine shikuma.

¹⁰ Ngoboni lingeloyi lyambile kukwabo ngayi, “Hinga mutina! Ndaba nikuleta kukwenu ncango zaziwahe za ku wahilila kwakunene ku bantu nimwabo.

¹¹ Lelo mu Lukena lwa Ndavita munahemuwu Mulamwini wenu, niye Kilishitu Mwene.

¹² Eshe nisho shikenga shilimukisho kukwenu, mukawana mbututu banamuvungilili mu likwiza hinga alangana mu linkuluba.”

¹³ Wanguwangu litanga lya baka mayilu lyekalile hamo na lingeloyi, pe balemeshele Nyambi na kwamba ngayi,

¹⁴ “Wuwahe kuli Nyambi muyilu ya mayilu, na ku mwena kwikale hano hanci ku bantu baya anawahilili!”

¹⁵ Oho mangeloyi afumine kukwabo ayile muyilu, balishani bambile ku umo na wamina ngayi, “Tuyenunga ku Mbetelehema tukamone shuma eshe shinatendiwi, eshe anatutongweze Mwene.”

¹⁶ Bayile na ku nyankupa, pe bakawanine Maliya na Yoshefwa na mbututu hinga alangana mu linkuluba.

¹⁷ Oho balishani bamumonene, batontwelele kukwabo nimwabyo biya abatongwezele lingeloyi bya mwana.

¹⁸ Nimwabo obo bayuvwileko, bakomokele ebye babatongwezele balishani.

¹⁹ Ngoboni Maliya walamine ebye nimwabyo na kubihanganika mu mutima wendi.

²⁰ Balishani babokele, bayemezele na kulumbeza Nyambi ndaba ya byuma nimwabyo biya bayuvwile kami bamonene ngonehe abatongwezele lingeloyi.

Yeshu ukutwaliwa ku Litala lya Nyambi

²¹ Ha mutena wa wumutanu na ahatu, oho shengile shikati sha kumutwala ku mukanda. Bamutumbile ngayi Yeshu, lizina lingeloyi amutumbile oho shilolo emitiwe.

²² Oho shikati sha kuyeleshiwa kwabo sha kumine ngonehe mwayila Ndayano za Moshesha, Yoshefwa na Maliya na mwana bayile ku Yelushalema ngayi bakamutwale kuli Mwene,

²³ nehi kwatikitiwile mu mulao wa Mwene ngayi, “Mweli wa mulume nimwendi ukuhemuwa ukafunguliwila kuli Mwene.”

²⁴ Kami bayile na kutupula nkombela ngonehe mwayile ndayano za Mwene ngayi, “Batupule matela abili, hinge bana ba bankilimba babili.”

²⁵ Ha shikati shiyo kwekalile mulume mu Yelushalema, lizina lyendi Shimiyoni, wengile wakwoloka na mukakutina Nyambi. Watatililenga kulamwina kwa Ishalela, kami Moyo wa Kuyela wekalile hahendi.

²⁶ Moyo wa Kuyela walubulwile kukwendi ngayi kukafwa wufwako hantu namono Kilishitu wa Mwene.

²⁷ Moyo wamutwaminine, pe Shimiyoni wezile ku Litala lya Nyambi. Oho bahemi bengizile mbututu Yeshu na kumutendela ngo shiheka sha ndayano,

²⁸ Shimiyoni washimbile Yeshu mu maboko wendi niho ayemezele Nyambi na kwamba ngayi,

²⁹ “Mwene, haya yitabila ngayi mukamulimo wobe aye mu ku mwena, ngonehe wakulupishile.

³⁰ Ndaba meho wami anamono kulamwina kwobe,

³¹ oku unawahishi ku meho a bantu ba matunga nimwawo.

³² Nengi mwaana ukaholola shifungo shobe ku Bakamatunga, na kuleta wuwahe ku bantu bobe Baishalela.”

³³ Tatiyendi na mandiyendi bakomokele byuma ebye byambiwile hahendi.

³⁴ Shimiyoni wabafuywelele niho ambile kuli Maliya mandiyendi ngayi, “Mona, ou mwana unahatiwi kwinga kunonga na kupulwishiwa kwa babengi mu Ishalela. Ukenga shimonekesho sha kufuma kuli Nyambi eshe shika kaniwa ku bantu babengi,

³⁵ nohobene ngayi bihanganiko bya mu mitima ya babengi mwanga bikaholoke. Unginga ukukuyaha ku mutima ngonehe mukwale wawutwe.”

³⁶ Kami kwekalile muluwe wa Nyambi wa mbuyama, Ana mwana Fwaniwelu wa mushobo wa Asha. Wengile kakulukazi. Wayoyele hamo na mukokwendi myaka mutanu na yibili.

³⁷ Kufuma haya, wengile mfwile kukuma na ku myaka makumi mutanu na ahatu na yinaa. Kaliha wafuminenga mu Litala lya Nyambi, ngoboni walemeshelenga Nyambi wushiku na mwaana, wazililenga kulya, kami walombelenga.

³⁸ Ha shikati shiyobene, wenginine, pe wayemezele Nyambi, kami watontwelele bya mwana kukwabo nimwabo batatilililenga ku shoboloka kwa Yelushalema.

Kuboka ku Nazaleta

³⁹ Oho Yoshefwa na Maliya batendele byuma nimwabyo ngonehe ku ndayano za Mwene, babokele ku Ngalileya ku munzi wabo wa Nazaleta.

⁴⁰ Mwana wakulile, pe wengile wa ngovu. Wekalile na ngana zazingi, kami shishemo sha Nyambi shekalile hahendi.

Kanuke Yeshu mu Litala lya Nyambi

⁴¹ Bahemi bendi bayilenga ha mwaka na mwaka ku Yelushalema ku Shimbo sha Kupitilila.

⁴² Oho Yeshu ekalile na myaka likumi na yibili, bayile ku Yelushalema ku shimbo, ngonehe batendelenga.

⁴³ Oho bamanishile shimbo, bahemi bendi oho babokelenga ku munzi, kanuke Yeshu washalile kunyima mu Yelushalema. Bahemi bendi kaliha balimukile.

⁴⁴ Ngoboni bahanganikile ngayi kampe wekalile mu likunge, pe bayile mukala wa mutena umo, niho batatikile kumushinga mukati ka bawushinda wabo na bahoni babo.

⁴⁵ Oho babulile kumuwana, babokele ku Yelushalema na kumushinga.

⁴⁶ Oho kwapitile matena ahatu, bamuwanine mu Litala lya Nyambi hinga ekala na balongeshi ha yuvwilila kukwabo kami habepula mayipu.

⁴⁷ Nimwabo baya bamuyuvwile bakomokele ku kalimukisho kendi na kukumbula kwendi.

⁴⁸ Oho bahemi bendi bamumonene, balikomokelele. Mandiyendi wambile kukwendi ngayi, “Mwanami, shumangani unatende nehe kukwetu? Tatiyobe na nami tunakushinga-shinginga shikuma.”

⁴⁹ Yeshu wambile kukwabo ngayi, “Kati mwancingilinga bishini? Kulimuka ngayi niku fwanina kwikala mu Litala lya Tate mufwako ndi?”

⁵⁰ Ngoboni kaliha bayuvwishishile ebye ambile kukwabo.

⁵¹ Niho Yeshu abokele nabo ku Nazaleta, wabombatalile. Ngoboni mandiyendi walamine ebye nimwabyo mu mutima wendi.

⁵² Yeshu wakulile mu ngana na mwimo na kuyamiziziwa kwa Nyambi na bantu.