Luka 19 - Libuka Lya Kuyela

Yeshu na Zakiyashi

¹ Yeshu wenginine mu Yeliko, pe wapitile mukati ka munzi.

² Kwekalile mukulwane wa bakakutelesha wa lizina lya Zakiyashi, wengile wakuheta.

³ Washingile ku mona Yeshu ngayi niye yani, ngoboni Zakiyashi wengile muntu wamwipi, pe kaliha watweshele kumumona ndaba ya likunge lya bantu.

⁴ Niho etukilile kumbili, wakakandamine ku mutondo wa mukuyu ngayi amumone, ndaba Yeshu wezilenga mu nzila yiyo.

⁵ Oho Yeshu akumine ha mwanya uyo, watilaminine kuyilu, pe wambile kukwendi ngayi, “Zakiyashi, huluka shawangu, ndaba nafwanini kwikala ku litala lyobe lelo.”

⁶ Hohobene Zakiyashi wahulukile watambwile Yeshu na ku wahilila.

⁷ Bantu nimwabo baya bamonene eshe bangungutile ngayi, “Nayi na kwinga muyeni ku mukawubi!”

⁸ Ngoboni Zakiyashi wemanine, wambile kuli Mwene ngayi, “Mona Mwene! Nikapana shitika sha wuheti wami ku ba kushepwa, kami ndi nayangile muntu shuma shamina nikamubweshela bya kufwanikiza binaa.”

⁹ Niho Yeshu ambile kukwendi ngayi, “Lelo kupuluka kunezi mu litala lino, ndaba naniye kami nengi mwana Abulahama.

¹⁰ Ndaba Mwana Muntu wezile mukushinga na kupulwisha bakakuyongala.”

Nguli ya mali a muwayawaya wa ngolinde

¹¹ Oho bantu bayuvwililenga ebye, Yeshu wanungileko, pe wabatongwezele nguli. Wekalile hahepi na Yelushalema, kami bantu bahanganikile ngayi Wene wa Nyambi uli hahepi na ku moneka.

¹² Yeshu wambile ngayi, “Muntu wamina wa liziko lya wene wayile ku litunga lya kwakutali ngayi akashwanishiwe wene niho aboke.

¹³ Oho shilolo aye, wehanine bakamilimo bendi balikumi, wapanikile muntu na muntu muwayawaya wa ngolinde yimo na kubatongweza ngayi, ‘Hehezenunga kutwala aha eze nikabokele.’

¹⁴ Ngoboni bantu bendi bamuzimbile, pe bamutuminine ntumwana mu kumutongweza ngayi, ‘Kushinga tufwako ngayi ou muntu enge mwene wetu.’

¹⁵ “Oho bakamushwanishile ha wene, wabokele. Niho atongwezele bantu ngayi bakamilimo bendi bayo apanikile mali, behaniwe, ngayi muntu na muntu ashimike ebye anawana mu kuheheza kwendi.

¹⁶ Wa muntanzi wezile, wambile ngayi, ‘Hekulu, mali obe a muwayawaya wa ngolinde yimo ninawaniniho likumi.’

¹⁷ Wambile kukwendi ngayi, ‘Unatende shiwahe, mukamulimo wamuwahe! Ndaba unengi wa kupwisha ku shuma shashishe, haya ukalela minzi likumi.’

¹⁸ Wa wubili wezile wambile ngayi, ‘Hekulu, mali obe a muwayawaya wa ngolinde yimo ninawaniniho mutanu.’

¹⁹ Wambile kukwendi ngayi, ‘Nobe kami ukalela minzi ya mutanu.’

²⁰ “Niho wamina ezile kukwendi wambile ngayi, ‘Hekulu, mali obe a muwayawaya wa ngolinde yimo awa nawaholekele mu kakwiza.

²¹ Natinine, ndaba uli muntu wamukalu, washimbanga omu unabulu kuyaka na kuteza omu unabulu kukuba.’

²² Wambile kukwendi ngayi, ‘Mukamulimo wamubi! Nikukuyata na mazu obe. Walimukile ngayi nili muntu wamukalu nashimbanga omu nabulu kuyaka na kuteza omu nabulu kukuba.

²³ Nohobene bishini wabulile kuyaka mali wami kupanga? Aha naboko shinga natambulu mali wami hamo na nkambiko.’

²⁴ Niho ambile ku bayo bemanine kuyo ngayi, ‘Muyangulenu owo mali a muwayawaya wa ngolinde yimo, mupanike ou uli na likumi.’

²⁵ Ngoboni bantu bambile kukwendi ngayi, ‘Hekulu, ou uli mwaka na mali likumi a muwayawaya!’

²⁶ Waba kumbwile ngayi, ‘Ou ulinabyo bakamuwezelelako, ngoboni ou unabibulu bakamuyanga nanaka alinako.’

²⁷ Ngoboni baya bamalamo bami bakanine ngayi ninge mwene wabo, baletenu kuno mubazihile ha meho wami!”

Yeshu ukwingina mu Yelushalema

²⁸ Oho Yeshu amanishile kwamba ebye, watwaminine bandongesha kumbili, bayile ku Yelushalema.

²⁹ Oho akumine hahepi na Mbetefwange na Mbetani, ku lipili lya mitondo ya Olive, watumine bandongesha bendi babili, pe wambile kukwabo ngayi,

³⁰ “Yenunga ku munzi uli kumbili yenu, oho mukenginamo, mukawana mwana mbongolo namangiwi uya wabula kuliyavwishiwa ku muntu. Mukamushobole, pe mumulete kuno.

³¹ Ndi muntu ukamipula ngayi mu kumushobolwela bishini, mukambe ngayi Mwene uli na kumushinga.”

³² Baya bandongesha batumiwile bayile, bakawanine ngonehe abatongwezele Yeshu.

³³ Oho bamushobolwelenga, mwine wa uya mbongolo wabepwile ngayi, “Ndabangani mu kushobola ou mwana mbongolo?”

³⁴ Bandongesha bakumbwile ngayi, “Mwene uli na kumushinga.”

³⁵ Bamuletele kuli Yeshu, pe bantu bayalile bivwalo byabo ha mbongolo, bakandamishileho Yeshu.

³⁶ Oho ayilenga, bantu bayalile bivwalo byabo mu mukwakwa.

³⁷ Oho Yeshu akumine kwakwipi na Yelushalema, haya wakunkulukilile mu mukwakwa ukuya ku lipili lya mitondo ya Olive, likunge nimwalyo lya bandongesha batatikile ku wahilila na kulemesha Nyambi na lizu lyalinene, ha byuma byabinene nimwabyo bamonene,

³⁸ bambile ngayi, “Uli na mfuywezi hekulu ou ukwiza mu lizina lya Mwene! Ku mwena muyilu, wuwahe kuli Nyambi!”

³⁹ Bafwalishi bamo mu likunge bambile kuli Yeshu ngayi, “Mulongeshi, kalihila bandongesha bobe bamwene!”

⁴⁰ Yeshu wakumbwile ngayi, “Nikumitongweza ngayi, ndi aba ba ku mwena, pe mamanya akabilikiza.”

Yeshu ukulilila Yelushalema

⁴¹ Yeshu oho ahenyenene ku Yelushalema, wamonene munzi, walilile ndaba yawo

⁴² wambile ngayi, “Shinga obe munzi unalimuku mutena walelo byuma bikuleta ku mwena, ngoboni binaholekiwi ku meho obe.

⁴³ Shikati shikeza oho bamalamo bobe bakakutungila shipata bakakuzinguluka na kukushinkila mu zimbalila nimwazo.

⁴⁴ Bakakunongesha hamo na bana bobe nimwabo. Kukashiya limanya limo hayilu ya lyamina bafwako, ndaba wufwako kulimuka shikati sha kuzingula kwa Nyambi kukwobe.”

Yeshu ukutanda bakakulandishila mu Litala lya Nyambi

⁴⁵ Yeshu wenginine mu Litala lya Nyambi, pe watatikile ku tandila ha munkanda baya balandishilenga.

⁴⁶ Wambile kukwabo ngayi, “Kwatikitiwile ngayi, ‘Litala lyami likatumbiwa ngayi litala lya malombelo.’ Ngoboni munalifutulu kwinga liteke lya bezi!”

⁴⁷ Yeshu walongeshelenga mu Litala lya Nyambi ha mutena ha mutena. Ngoboni bakankombela ba bakulwane na bakakulongesha ndayano na bakulwane ba Bayunda bashingile kumuziha.

⁴⁸ Ngoboni bakwangile kuwana nzila mwa kutendela, ndaba bantu nimwabo bashingile shikuma kumuyuvwa.