Luka 17 - Libuka Lya Kuyela

Wubi

¹ Yeshu wambile ku bandongesha bendi ngayi, “Byuma bikupukalisha bantu ngayi batende wubi binafwanini kwiza, ngoboni makando wendi uyo muntu ukabileta!

² Shikenga shashiwahe kukwendi ngayi bamumangilile limanya lyalinene lya kupelesha mu ncingo na kumuyumbila mu liwate, kupitakana kupukalisha umo wa babashe aba ngayi batende wubi.

³ Haya lilamenu enu bamwine. “Ndi kawushinda wobe unatende wubi, mwambile. Ndi ukutenguluka, muyatile.

⁴ Ndi unakubipishili ka mutanu na kabili ha mutena umo, pe ka mutanu na kabili hakwiza kukwobe na kwamba ngayi, ‘Natenguluku,’ nafwanina kumuyatila.”

Kukulupila

⁵ Bantumwana bambile kuli Mwene ngayi, “Wezelela ku kukulupila kwetu.”

⁶ Mwene wakumbwile ngayi, “Shinga muli na kukulupila kwakukuma ha luncaca lwa mashitandi, shinga mu kutwesha kwamba ku mutondo wa mukuyu ngayi, ‘Zukuka ukalitampike mu liwate,’ shinga ukumyombatala.

Ebye atendanga mukamulimo

⁷ “Haya yani kukwenu ndi uli na mukamulimo ukulima hinge ukulisha bambelele, hakwamba kukwendi oho nafumu ku mafuba ngayi, ‘Yeka ulye taha?’

⁸ Mwa shikuma wufwako, ngoboni ukwamba kukwendi ngayi, ‘Ngwahishile mulalilo, vwala shivwalo sha milimo, mpane byakulya hantu nali na kunwa, nohoboni nobe ulye na kunwa!’

⁹ Kati ukakambilila kuli uyo mukamulimo ndaba ya kutenda biya anamutongweze ndi?

¹⁰ Nohobene nanenu kami ndi munatende nimwabyo ebye banamitongweze, ambenu ngayi, ‘Tuli tuhu bakamilimo, tunatende ndaba wenga mulimo wetu!’ ”

Yeshu ukunyongomanisha balume likumi

¹¹ Oho Yeshu ayilenga ku Yelushalema, wapitile mu nginza ya Shamaliya na Ngalileya.

¹² Oho enginine mu munzi umo, walihanganine na balume likumi bakolelenga bimakwa. Bemanine kwakutali shashishe,

¹³ pe babilikizile ngayi, “Yeshu! Obe Hekulu! Tuyuvwileko nceshe!”

¹⁴ Oho abamonene, wambile kukwabo ngayi, “Yenunga mukalimonekeshe ku bakankombela.” Oho bayilenga, bayeleshiwile.

¹⁵ Umo kukwabo, oho amonene ngayi unanyongomana, wabokele, pe wayemezele Nyambi na lizu lyalinene.

¹⁶ Wafukumanine na kukinka lupala hanci ku mawulu a Yeshu na kumukambilila. Niye wengile Kashamaliya.

¹⁷ Niho Yeshu ambile ngayi, “Kati baya banyongomana kaliha benga likumi ndi? Haya ba mutanu na banaa balikuti?

¹⁸ Kowa umo unaboko ngayi ayemeze Nyambi, ndele ou lipukwenda tuhu ndi?”

¹⁹ Niho Yeshu ambile kukwendi ngayi, “Katuka uyenga, kukulupila kwobe kunakunyongomanishi.”

Kwiza kwa Wene wa Nyambi

²⁰ Bafwalishi bamo bepwile Yeshu ngayi, “Kati Wene wa Nyambi ukeza mwaka ngani?” Yeshu waba kumbwile ngayi, “Wene wa Nyambi kukeza na nzila oyo mu kutatilila wufwako.

²¹ Kowa ukamba ngayi, ‘Monenu, uli kuno!’ Hinge ngayi, ‘Monenu, uli kuyo!’ Ndaba Wene wa Nyambi uli mukati kenu.”

²² Niho Yeshu ambile ku bandongesha bendi ngayi, “Shikati shikeza oho mukashinga ku mona mutena umo ha matena a Mwana Muntu, ngoboni kukawumona mufwako.

²³ Kami bakamba kukwenu ngayi, ‘Monenu, uli kuno!’ Hinge ngayi, ‘Monenu, uli kuyo!’ Ngoboni hinga muka bakonka.

²⁴ Ndaba ngonehe lumuni lwa mvula lwamweshanga kutatika ku mbalila yamina ya mbimbayilu kukuma na ku mbalila yamina, kukenga noho kami ku Mwana Muntu ha mutena wendi.

²⁵ Ngoboni ha kutatika nafwanini kuyanda byuma byabingi na kukaniwa ku mukoka ou uliko.

²⁶ Ngonehe kwekalile ha matena a Nowa, nisho kami kukenga ha matena a Mwana Muntu.

²⁷ Bantu balilenga, banwinenga, bayekelenga na ku yekiwisha, hantu noho bakumine ha mutena uyo enginine Nowa mu wato, niho libazi lyezile, pe lya banongeshele nimwabo.

²⁸ Shikenga ngonehe shengile kami ha matena a Lote. Bantu balilenga na kunwa, balandilenga na kulandisha, ba kuninenga na kuzika matala.

²⁹ Ngoboni ha mutena uyo Lote afumine mu Shondoma, liyilu lyalokeshele mundilo na shalufwa, bya banongeshele nimwabo.

³⁰ Shikenga nahiyo ha mutena oho Mwana Muntu akaholoka.

³¹ “Ha mutena uyo, uya uli hayilu ya litala lyendi, hinga akahuluka hanci na kwingina mu litala ngayi ashimbe byuma byendi. Nohobene ou uli mu mfuba, hinga akaboka ku litala.

³² Anukenu mukaza Lote!

³³ Ou nimwendi ukushinga kupulwisha wumi wendi, ukawuyongesha. Ou nimwendi ukuyongesha wumi wendi ukawulama.

³⁴ Nikumitongweza ngayi ha wushiku uyo, bantu babili bakalangana ha wulili umo, umo bakamushimba, wamina ukashala.

³⁵ Bambuyama babili bakekala na kutwa hamo, umo bakamushimba, wamina ukashala.

³⁶ Balume babili bakekala mu mfuba, umo bakamushimba, wamina ukashala.”

³⁷ Bandongesha bepwile Yeshu ngayi, “Mwene, kati kuti?” Yeshu waba kumbwile ngayi, “Oku kuli mutuntu, makubi niko akutulila.”