Luka 15 - Libuka Lya Kuyela

Mbelele wakuyongala

¹ Oho bakakutelesha na bakawubi nimwabo bezilenga kuli Yeshu na kuyuvwilila,

² Bafwalishi na bakakulongesha ndayano bangungutile ngayi, “Ou muntu ukutambula bakawubi na kulya nabo hamo.”

³ Niho Yeshu abatongwezele eye nguli ngayi,

⁴ “Yani kukwenu ndi uli na bambelele ba mwanda, ndi ku nayongala yimo ukubula ku shiya bambelele makumi mutanu na anaa na mutanu na banaa mu libelelengwa, ha kuya na kushinga uya mbelele nayongala hantu namuwana?

⁵ Oho anamuwana, ukumuyaka ha bifuzi byendi na ku wahilila

⁶ na kuya ku munzi wendi. Niho ukukungula bahoni bendi hamo na bandambo bendi hamo na kwamba kukwabo ngayi, ‘Wahililenu na nami, ndaba nawana mbelele wami wayongalile!’ ”

⁷ Nohobene nikumitongweza ngayi, kukekala ku wahilila muyilu ndaba ya mukawubi umo ukutenguluka, kupitakana bakakwoloka ba makumi mutanu na anaa na ba mutanu na banaa bakubula kushinga kutenguluka.

Nguli ya mali akuyongala

⁸ “Hinge ndi yani mbuyama uli na mali likumi lya muwayawaya wa shiliva, ndi nayongesheho yimo, ha kubula kumunika mumuni na kukomba mu litala lyendi na kuyishinga shiwahe hantu nayiwana?

⁹ Oho anayiwana, ukukungula bahoni bendi na bandambo bendi hamo na kwamba kukwabo ngayi, ‘Wahililenu na nami, ndaba nawana mali yami ya muwayawaya yayongalile!’

¹⁰ Nohobene nikumitongweza ngayi, muli ku wahilila muyilu ku meho a mangeloyi a Nyambi ndaba ya mukawubi umo ukutenguluka.”

Nguli ya mwana wa kuyongala

¹¹ Yeshu wambile kami ngayi, “Muntu wamina wekalile na bana bendi babalume babili.

¹² Mwanendi wa kanuke wambile kuli tatiyendi ngayi, ‘Tate, mpanike likona lyami lya wuheti wobe.’ Niho tatiyabo atapililile wuheti ku bana bendi babili.

¹³ Kwapitile matena amashe, niho mwanendi wa kanuke alandishile byuma byendi nimwabyo, wayile ku litunga lya kwakutali, oko akapanzanishile wuheti wendi mu nyoyelo ya lwiholwiho.

¹⁴ Oho amanishile byendi nimwabyo, kwezile nzala yayinene mu litunga liyo nimwalyo, kami niye kaliha wekalile na byamina.

¹⁵ Niho ayile na kushinga milimo kuwamina wa mu litunga liyo, ou wamutumine ku mafuba wendi mu kulisha bangulube.

¹⁶ Niye washingilenga kulya byakulya biya balilenga bangulube, ngoboni kowa muntu wamupanikilebyo ngayi alye.

¹⁷ “Oho alihanganikile, wambile mu mutima wendi ngayi, ‘Bakamilimo nimwabo kuli tate ba kulya na kubikwangilako, ngoboni ami nili na kufwa ku nzala!

¹⁸ Nakukatuka niye kuli tate, nikamba kukwendi ngayi, tate nabipishi ku meho a Nyambi na ku meho wobe.

¹⁹ Kufwanina kwihaniwa ngayi mwanobe nifwako, untende ngo umo wa bakamilimo bobe.’

²⁰ Niho akatukile, wayile kuli tatiyendi. “Oho ushili kwakutali tatiyendi wamumonene, wamuyuvwilile nceshe, niho amwitukilile na kumubumbatila mu ncingo yendi, pe wamuzupezele.

²¹ “Mwanendi wambile kukwendi ngayi, ‘Tate nabipishi ku meho a Nyambi na ku meho wobe, ku fwanina kwihaniwa ngayi mwanobe nifwako.’

²² Ngoboni tatiyendi wambile ku bakamilimo bendi ngayi, ‘Letenu shawangu shivwalo shashiwahe shikuma mumuvwalikesho. Mulete na kambalamunwe mukayake ku munwe wendi, mumuvwalike ncangwa ku mawulu.

²³ Letenu namani ya ku shuwa muyizihe, mwanga tutende shimbo na ku wahilila!

²⁴ Ndaba ngayi ou mwanami wafwile, haya unayoyo, wayongele haya unawaniwi.’ Niho batatikile ku wahilila.

²⁵ “Hashikati shiyo mwanendi wa mukulwane wekalile mu mfuba. Ha kuboka kwendi oho akumine hahepi na litala, wayuvwile bantu hibembila na ku shinda.

²⁶ Wehanine umo wa bakamilimo, wamwipwile ngayi, ‘Kati bishini bikutendiwa?’

²⁷ Mukamulimo wamukumbwile ngayi, ‘Mukonzowobe nezi, kami tatiyobe nazihi namani ya ku shuwa, ndaba unaboko kukwendi hinga enga wamumi.’

²⁸ “Yayiyendi wapilamine na kukana kwingina mu litala. Niho Tatiyendi atutikile, wamulombele ngayi engine mukati.

²⁹ Ngoboni niye wakumbwile tatiyendi ngayi, ‘Mona, ninakutendele milimo myaka yayingi kwakubula kukiluka ndayano zobe hinge mutena umo, shilolo umpanike hinge mpongo wamushe ngayi niwahilile na bahoni bami.

³⁰ Ngoboni ou mwanobe, unakabipishi wuheti wobe na bakalwiholwiho, aha anakumu unamuzihili namani ya kushuwa!’

³¹ Tatiyendi wambile kukwendi ngayi, ‘Mwanami, obe wekala nami myaka nimwayo, kami byuma byami nimwabyo byenga byobe.

³² Ngoboni shinafwanini ngayi tuwahilile na kutangala, ndaba ou mukonzowobe wafwile, haya unayoyo, wayongalile haya unawaniwi.’ ”