Kututika 9 - Libuka Lya Kuyela

Malwa a mutanu Lufu lwa bimuna

¹ Nyambi ya Ngula wambile kuli Moshesha ngayi, “Yanga kuli Fwalo ukamutongweze ngayi Nyambi ya Ngula, Nyambi wa Bahebelu ukwamba nehe ngayi, ‘Yitabilisha bantu bami baye bakandemeshe.

² Ndi ukukana kubetabilisha ngayi baye,

³ mona, liboko lya Nyambi ya Ngula likakuwila na wulweli wawukalu ha bimuna byobe nimwabyo, bambishi na bambongolo bobe na makamela na zingombe na bambelele na bampongo.

⁴ Pe kami nika tapulula mukati ka bimuna bya Baishalela na nobyo bya Baengepita, kami kowa hinge shimuna wa Baishalela ukafwa.’”

⁵ Nyambi ya Ngula, nemiki kukatenda eshe ku shikati sha mutena wa nzona.

⁶ Oho kwashile Nyambi ya Ngula watendele ngonehe ambile, bimuna nimwabyo bya Baengepita byafwile, ngoboni bimuna bya Baishalela kowa hinge umo wafwile.

⁷ Pe Fwalo wepwile ebye byatendiwile, mona, kowa hinge umo ku bimuna bya Baishalela unafu, hinge noho Fwalo mutima wendi wakaluhile, kaliha wetabilishile bantu ngayi baye.

Malwa a mutanu na amo Manzunge

⁸ Niho Nyambi ya Ngula ambile kuli Moshesha na Aloni ngayi, “Kundulenu mutoko wa maboko akwinzala waha ngaanze, pe Moshesha uka fukumuna mutoko hayilu kumbili ya Fwalo.

⁹ Pe niwo ukafukumukila mu litunga nimwalyo lya Engepita kwinga lukungu lwa kulembuka. Pe nimwako lukafukumukila lukaleta manzunge awa akafutuka kwinga mambongola akekala ha bantu naha bimuna.”

¹⁰ 10 Nohobene ba Moshesha na Aloni ba kundwile mutoko na kwimana kumbili ya Fwalo. Moshesha wawufukumwinine muyilu, pe waletele manzunge awa afutukile kwinga mambongola ha bantu naha bimuna.

¹¹ Pe Bakamalele kaliha batweshele kwimana kumbili ya Moshesha ndaba ya manzunge bekalile nawo, ngonehe Baengepita bamina nimwabo.

¹² Ngoboni Nyambi ya Ngula wakaluhishile mutima wa Fwalo, kami kaliha wetabilishile ngayi baye, ngonehe eshe ambile Nyambi ya Ngula kuli Moshesha.

Malwa a mutanu na abili Likandavula

¹³ Niho Nyambi ya Ngula ambile kuli Moshesha ngayi, “Ukameneke lumenemene ukaye na kuliwana na Fwalo, pe uka mutongweze ngayi, ‘Nyambi ya Ngula, Nyambi ya Bahebelu ukwamba nehe ngayi, yitabilisha bantu bami baye bakandemeshe.

¹⁴ Shikati shino nikutuma malwa amanene, kaliha ha babilolo bobe naha bantu bobe tuhu, ngoboni nikashushwila kumo na nobe ngayi mwanga mulimuke ngayi kowa umo wafweka Ami muno mu litunga.

¹⁵ Shinga ndi natandubwile liboko lyami na kukukama na bantu bobe na wulweli shinga mwalobelelakale,

¹⁶ ngoboni ha shuma eshe nakulehe ngayi uyoye, ngayi nimoneshe ngovu zami kukwobe, mwanga lizina lyami litumbalale hano hanci nimwaho.

¹⁷ Hinge noho ushili kuliyemeza na kukanisha bantu bami ngayi baye.

¹⁸ Haya yuvwililenu, nzona ha shikati shino nikalokesha mvula wa likandavula wakwinga hinga atanga ku moneka mu Engepita kubalika ku kutatika kwa litunga.

¹⁹ Haya panika ndayano za ha bimuna byobe na byuma nimwabyo ebye uli nabyo ha munkanda. Biyakiwe mu bishawashawa, ndaba bantu nimwabo na bimuna ebye bikashala ha munkanda bya kubula kukoweziwa, oho bikalokiwa ku likandavula bikafwa.’”

²⁰ Niho babilolo ba Fwalo baya batinine lizu ambile Nyambi ya Ngula, baletele bandungo babo na bimuna byabo kwiza mu ku yuwama ku bishawashawa.

²¹ Hinge noho, bamina kaliha bayuvwilile ebye Nyambi ya Ngula ambile, pe bashiyile bandungo babo na bimuna byabo ha munkanda ha kayelele.

²² Niho Nyambi ya Ngula ambile kuli Moshesha ngayi, “Olwela liboko lyobe kuyilu, ngayi mwanga kwize likandavula mu litunga nimwalyo lya Engepita, ha bantu na ha bimuna naha mbuto nimwayo ya mumafuba.”

²³ Nohobene Moshesha wolwele liboko lyendi na muwana kuyilu, pe Nyambi ya Ngula watumine mishika na likandavula na lumuni lwashulukile hanci. Nyambi ya Ngula walokeshele mvula wa mamanya mu Engepita.

²⁴ Kwekalile likandavula na mishika na kumwesha liyilu nimwalyo. Likandavula wanenehele shikuma hinga kwatanga kwikala mvula wanoho mu Engepita kubalika ku kutatika kwa litunga.

²⁵ Likandavula lya cancwele byuma nimwabyo byekalile ha kayelele mu litunga nimwalyo lya Engepita, ha bantu nimwabo naha bimuna. Pe likandavula lyacancwele mbuto nimwayo ya mumafuba, pe lyapokwezele mitondo nimwayo.

²⁶ Mbalila yaku Ngosheni oku kwekalile Baishalela, niko tuhu kwabulile mvula wa likandavula.

²⁷ Niho Fwalo ehanine ba Moshesha na Aloni pe wambile ngayi, “Shikati shino nabipishi. Nyambi ya Ngula Kubipisha wufwako. Ami na bantu bami tunabipishi.

²⁸ Lombelenu kuli Nyambi ya Ngula. Twakwangakale na yino mishika yayinene na likandavula! Nikamitabilisha ngayi muye, kwikala muno kami mufwako.”

²⁹ Moshesha wambile kukwendi ngayi, “Nafuma tuhu mulukena, nikolola maboko wami na kulombela kuli Nyambi ya Ngula. Mishika yika mwena, kowa likandavula kami likekalako, mwanga mulimuke ngayi kati lino litunga linengi lya Nyambi ya Ngula.

³⁰ Ngoboni nikulimuka ngayi obe na babilolo bobe shilolokale mutine Nyambi ya Ngula.”

³¹ (Kami katatalanzenze na mbale byapokozokele ndaba mbale ya hokelenga shawangu na katatalanzenze kami kahengwilenga shawangu. Luku lwa kufweka ngo ncongamincale.

³² Ngoboni loto kaliha yapokozokele ndaba yahokanga kukotokela.)

³³ Moshesha washiyile Fwalo, watutikile mu lukena. Wolwele maboko na kulomba kuli Nyambi ya Ngula, pe mishika na likandavula na mvula byaketukile.

³⁴ Ngoboni oho Fwalo amonene ngayi mishika na likandavula byaketukakale, wabipishile kami. Niye na babilolo bendi bakaluhishile mitima ngonehe mwaka.

³⁵ Nohobene Fwalo kaliha wetabilishile Baishalela ngayi baye, ngonehe shiya Nyambi ya Ngula atongwezele Moshesha.