Kututika 8 - Libuka Lya Kuyela

Malwa a wubili Mambotwe

¹ Niho Nyambi ya Ngula ambile kuli Moshesha ngayi, “Yanga kuli Fwalo pe ukamutongweze ngayi, ‘Nyambi ya Ngula ukwamba nehe ngayi, yitabilisha bantu bami baye bakandemeshe.

² Ngoboni ndi unakana nikashushula litunga lyobe nimwalyo na mambotwe.

³ Mushinzi wa Nayilo ukapalala na mambotwe pe akazabuka na kuya mumusheke wobe namu malalo wobe naha wulili wobe namu matala a babilolo bobe nawa a bantu bobe namu bivulu byobe namu zindonga zobe za kuvubila mankende.

⁴ Akakilokela hahobe na ha bantu bobe naha babilolo bobe nimwabo.’”

⁵ Nyambi ya Ngula wambile kuli Moshesha ngayi, “Tongweza Aloni ngayi, ‘Olola liboko lyobe na muwana wobe ha mishinzi nimwayo naha malomba naha maziba na kututwisha mambotwe ngayi azabukile ha litunga lya Engepita.’”

⁶ Nohobene Aloni wolwele liboko lyendi na muwana ha mema nimwawo, pe mambotwe azabukile na kubumba litunga.

⁷ Ngoboni bakamalele nanibo batendele kami shuma shimo na malele wabo na kututwisha mambotwe ha litunga lya Engepita.

⁸ Niho Fwalo ehanine Moshesha na Aloni, pe wambile ngayi, “Lombelenu kuli Nyambi ya Ngula ngayi mwanga afumishe mambotwe kukwami naku bantu bami. Pe niketabilisha bantu ba Ishalela ngayi baye bakakombelele nkombela kuli Nyambi ya Ngula.”

⁹ Moshesha wambile kuli Fwalo ngayi, “Netabili kukulombelela. Shashiwahe, ntongweze tuhu shikati osho nika kulombelela, obe na babilolo bobe na bantu bobe. Niho mambotwe akafume kukwobe naku matala wenu, kowa kami mambotwe akashalako ndele tuhu mu mushinzi wa Nayilo.”

¹⁰ Fwalo wakumbwile ngayi, “Nzona ukandombelele.” Moshesha wambile ngayi, “Nikatenda ngonehe osho unamba, mwanga ulimuke ngayi kowa nyambi washenge wakufweka ngo Nyambi ya Ngula, Nyambi yetu.

¹¹ Mambotwe akafuma kukwobe naku matala wobe naku matala a babilolo bobe naku matala a bantu bobe. Kowa mambotwe akashalako ndele tuhu mu mushinzi wa Nayilo.”

¹² Niho Moshesha na Aloni bafumine kuli Fwalo, Moshesha walombelele shikuma kuli Nyambi ya Ngula ngayi afumishe mambotwe, awa aletele hali Fwalo.

¹³ Pe Nyambi ya Ngula wayuvwile lilombelo lya Moshesha, mambotwe afwile mu matala namu bipango na mumafuba.

¹⁴ Pe Baengepita bawakungwile hamo mishiinzi yayinene na litunga lyanukile nuu!

¹⁵ Oho Fwalo amonene ngayi mambotwe anafu wakaluhishile kami mutima wendi, pe kaliha wayuvwililile ba Moshesha na Aloni ngonehe shiya Nyambi ya Ngula ambile.

Malwa a wuhatu Mbalembale

¹⁶ Niho Nyambi ya Ngula ambile kuli Moshesha ngayi, “Tongweza Aloni ngayi olole liboko lyendi na muwana, awukame hanci pe lukungu lifutuke mbalembale mu litunga nimwalyo lya Engepita.”

¹⁷ Nohobene Aloni wolwele liboko lyendi na muwana na kuwu kama hanci, pe lukungu lwafutukile mbalembale ha bantu naha bimuna. Lukungu nimwalwo mu Engepita lwafutukile mbalembale.

¹⁸ Bakamalele nanibo bezekele na malele wabo kufutula mbalembale ngoboni kaliha batweshele. Pe kwekalile mbalembale ha bantu naha bimuna.

¹⁹ Niho bakamalele bambile kuli Fwalo ngayi, “Eshe shinatendiwi na munwe wa Nyambi.” Ngoboni mutima wa Fwalo wakaluhile, pe kaliha wetabilile kubayuvwilila ba Moshesha na Aloni, ngonehe eshe Nyambi ya Ngula ambile.

Malwa a wunaa Banzinzi

²⁰ Niho Nyambi ya Ngula ambile kuli Moshesha ngayi, “Ukalimeneke kupinduka zona lumenemene ukaye mu kuliwana na Fwalo akayanga ku mushinzi, umutongweze ngayi, ‘Nyambi ya Ngula unamba nehe ngayi, yitabilisha bantu bami baye bakandemeshe.

²¹ Ndi ukukana kwitabilisha bantu bami ngayi baye, nika kushushula pe nika kutumina banzinzi

²² Ngoboni nika shiyaho tuhu litunga lya Ngosheni omu bazika bantu bami. Banzinzi kukekalako bafwako, mwanga ukalimuke ngayi Ami Nyambi ya Ngula, nili muno mu litunga.

²³ Nikatapulula mukati ka bantu bami na bantu bobe. Nzona bikomokesho ebye bikekalako.’”

²⁴ Pe Nyambi ya Ngula watendele eshe, kwezile matanga amanene a banzinzi enginine mu musheke wa Fwalo namu matala a babilolo bendi, banzinzi babipishile litunga nimwalyo lya Engepita.

²⁵ Niho Fwalo ehanine Moshesha na Aloni, wambile kukwabo ngayi, “Yenunga mukakombelele kuli Nyambi yenu mu litunga lino.”

²⁶ Moshesha wakumbwile ngayi, “Kaliha shiku fwanina kutenda noho, ndaba tukakombelela nkombela ya wunyengwe ku Baengepita. Twakukombelela kuli Nyambi ya Ngula, Nyambi yetu, bimuna biya bya wunyengwe ku Baengepita na kukombelela oku hibatumona, pe bakatupuha mamanya tukafwa.

²⁷ Tuku fwanina kuya mukala wa matena ahatu mulibelelengwa na kukombelela kuli Nyambi ya Ngula, Nyambi yetu ngonehe atutongwezele.”

²⁸ Fwalo wambile ngayi, “Nikamitabilisha ngayi muye mukakombelele kuli Nyambi ya Ngula, Nyambi yenu mulibelelengwa, ngoboni hinga muya kwakutali shikuma. Haya ndombelelenuko.”

²⁹ Moshesha wambile ngayi, “Nafuma tuhu kukwobe, pe nikalombela kuli Nyambi ya Ngula ngayi nzona matanga a banzinzi mwanga akafume kukwobe naku babilolo bobe naku bantu bobe ngoboni kaliha wafwanina kutwongeza kami na kukanisha bantu kuya na kukombelela kuli Nyambi ya Ngula.”

³⁰ Moshesha washiyile Fwalo, walombelele kuli Nyambi ya Ngula.

³¹ Nyambi ya Ngula wayuvwile lilombelo lya Moshesha. Banzinzi bafumine kuli Fwalo naku babilolo bendi naku bantu bendi, kaliha kwashalile banzinzi hinge umo.

³² Ngoboni Fwalo hinge noho, wakaluhishile mutima wendi, kami kaliha wetabilishile bantu ngayi baye.