Kututika 6 - Libuka Lya Kuyela

¹ Niho Nyambi ya Ngula ambile kuli Moshesha ngayi, “Haya ukamona eshe nikatenda kuli Fwalo. Ndaba na liboko lyami lya ngovu nikamukandamika kwitabilisha bantu bami ngayi baye, ukabatanda mu litunga lyendi ndaba ya liboko lyami lya ngovu.”

Nyambi ukwihana Moshesha

² Nyambi wambile kuli Moshesha ngayi, “Ami Nyambi ya Ngula.

³ Naliholwele kuli Abulahama na Ishaki na Yakobo ngayi Ami Nyambi Mpandashilanga. Ngoboni kaliha nalimukiwile kukwabo na lizina lyami lya kuyela.

⁴ Nalimamine nabo kami na kuba kulupisha kubapana litunga lya Kenaani, mu litunga muya bazikilenga ngo mapukwenda.

⁵ Haya nayuvwu kami ku shunga kwa Baishalela aba bahetiwa ku Baengepita, pe nanuku kulimama kwami.

⁶ Nohobene tongwezenu Baishalela nehe ngayi, ‘Ami Nyambi ya Ngula. Nikamilubula na kumi kuliza ku wulungo ba kumikandamika Baengepita, pe nikakatula liboko lyami lya ngovu na kuleta kashushwilo kakanene hahabo, pe nikamilamwina.

⁷ Nikamitambula kwinga bantu bami, kami nikenga Nyambi yenu. Kami oho nikamilubula ku wulungo wamu Engepita mukalimuka ngayi, Ami Nyambi ya Ngula, Nyambi yenu.

⁸ Nikamitwala mu litunga liya na kulupishile na lubeza mu kulipana kuli Abulahama na Ishaki na Yakobo pe nikalipanika kukwenu kwinga likona lyenu. Ami Nyambi ya Ngula.’

⁹ Moshesha watongwezele Baishalela eshe, ngoboni kaliha bayuvwililile kukwendi, ndaba mitima yabo yapokokele na wulungo wabo wanguma.”

¹⁰ Niho Nyambi ya Ngula ambile kuli Moshesha ngayi,

¹¹ “Yanga ukatongweze Fwalo wamu Engepita ngayi nafwanini kwitabilisha bantu ba Ishalela kufuma mu litunga lyendi.”

¹² Ngoboni Moshesha wakumbwile kuli Nyambi ya Ngula ngayi, “Hingebene bantu ba Ishalela kunyuvwa bafwako, haya Fwalo ukanyuvwa nahiti? Nili muntu wakuluba sha kwamba.”

¹³ Ngoboni Nyambi ya Ngula watongwezele Moshesha na Aloni ngayi, “Tongwezenu Baishalela na Fwalo wa mu Engepita ngayi Ami namitumu kufumisha Baishalela mu Engepita.”

Mapashi a Moshesha na Aloni

¹⁴ Aba nibo bengile bakulwane ba mavumo wabo. Lubena, mweli wa Yakobo wabelekele ba Hanoki na Palu na Heziloni na Kalimi. Aba nibo ba livumo lya Lubena.

¹⁵ Shimiyoni wabelekele ba Yemuwele na Yamini na Ohandi na Yakini na Zohali na Shaule, mwana waku mbuyama wa Kenaani, aba nibo ba livumo lya Shimiyoni.

¹⁶ Levi wabelekele ba Ngeshona na Kohati na melali. Levi wayoyele myaka 137.

¹⁷ Ngeshona wabelekele ba Limbini na Shimeyi, kami bekalile na bazukulu babengi.

¹⁸ Kohati wabelekele Amalama na Iza na Hembuloni na Uziyelu. Kohati wayoyele myaka 133.

¹⁹ Melali wabelekele ba Mahili na Mushi. Aba nibo ba lupashi lwa Balevi ngo ku bihemunwino byabo.

²⁰ Amalama washimbile Yokibendi mpanza tatiyendi, ou wamubelekelele ba Aloni na Moshesha. Pe myaka ya kuyoya kwa Amalama yengile myaka 137.

²¹ Iza wabelekele ba Kola na Nefwengi na Zikali.

²² Uziyelu wabelekele ba Mishayela na Elizafwani na Shitili.

²³ Aloni washimbile Elisheba mwana Aminandabe mpanza Nahishoni. Wamubelekelele ba Nandabi na Ambihu na Eliza na Itama.

²⁴ Kola wabelekele ba Ashila na Elikana na Ambiyashafwi, aba nibo ba livumo lya Kola.

²⁵ Eliza mwana Aloni washimbile umo ku bana ba Putiwelu, ou wamubelekelele Fwinihashi. Aba nibo mapashi na mavumo a mushobo wa Balevi.

²⁶ Ba Aloni na Moshesha nibo bayo Nyambi ya Ngula ambile kukwabo ngayi, “Fumishenu bantu ba Ishalela mu litunga lya Engepita.”

²⁷ Aba nibo batongwezele Fwalo wa mu Engepita kufumisha Baishalela mu wulungo mu litunga lya Engepita. Moshesha bene na Aloni.

Ndayano za Nyambi ya Ngula kuli Moshesha na Aloni

²⁸ Oho Nyambi ya Ngula ambile kuli Moshesha mu litunga lya Engepita,

²⁹ wambile ngayi, “Ami Nyambi ya Ngula. Tongwezenu Fwalo wa mu Engepita byuma nimwabyo nikumitongweza.”

³⁰ Ngoboni Moshesha wakumbwile Nyambi ya Ngula ngayi, “Obe walimuka ngayi nenga muntu wakuluba sha kwamba, haya Fwalo ukanyuvwilila nahiti?”